Read Traducción Kadosh Israelita Mesiánica ფსალმუნები 67 Bible Online

ფსალმუნები 67 - Traducción Kadosh Israelita Mesiánica bible

ფსალმუნები 67

¹დაე, აღდგეს ღმერთი, გაიფანტნონ მისი მტრები და უკუიქცნენ მისი მოძულენი მისგან.

²კვამლივით გაფანტე ისინი; როგორც ცვილი დნება ცეცხლზე, ასე დაიღუპნონ ბოროტნი ღვთის წინაშე.

³მართლებმა კი გაიხარონ ღვთის წინაშე, იხარონ და სიხარულით იზეიმონ.

⁴უმღერეთ ღმერთს, უმღერეთ მის წმიდა სახელს, უმღერეთ მას, ვინც უდაბნოს სერავს; უფალია მისი სახელი და ილხინეთ მის წინაშე.

⁵ობოლთა მამაა და ქვრივთა მსაჯული - ღმერთი, თავის წმიდა სამყოფელში,

⁶ღმერთი სახლს აძლევს მარტოხელებს, კეთილდღეობაში გამოჰყავს პატიმრები, ურჩნი კი ხრიოკზე რჩებიან.

⁷ღმერთო, როცა შენი ხალხის წინაშე გამოხვედი, როცა უდაბნოში მიდიოდი,

⁸დედამიწა შეირყა, ცანიც კი წვეთავდნენ ღვთის სახის წინაშე; თვით სინაიც იძვროდა უფლის, ისრაელის ღმერთის გამო.

⁹ბარაქიანი წვიმა აწვიმე, ღმერთო, შენს სამკვიდროს და როცა დაუძლურდა, შენ გაამაგრე.

¹⁰შენი სამწყსო დასახლდა იქ; ღმერთო, შენ განუმზადე სიკეთე ღარიბებს.

¹¹უფალი იძლევა სიტყვას და ქალები, რომლებიც მას ახარებენ, დიადი ლაშქარია:

¹²გარბიან ჯარების მეფენი, გარბიან და სახლში დარჩენილი ქალები ნადავლს ინაწილებენ.

¹³როცა ცხვრის სადგომებს შორის იწექით, მტრედივით იყავით, ვერცხლით დაფარული ფრთები რომ აქვს და მოოქროვილი ბუმბული.

¹⁴როცა გაფანტა ყოვლისშემძლემ მეფენი ქანაანისა, თოვლი ბრწყინავდა ცალმონზე.

¹⁵ღვთის მთაა - მთა ბაშანისა, მწვერვალთა კრებულია მთა ბაშანისა,

¹⁶რატომ შეჰყურებთ შურით, მაღალო მწვერვალნო, მთას, რომელიც თავის სამკვიდრებლად ისურვა ღმერთმა? სამუდამოდ დამკვიდრდება იქ უფალი!

¹⁷ათიათასობითაა ღმერთის ეტლები, ათასობით ათასი. მათ შორის არის უფალი სინაიზე, სიწმიდეში.

¹⁸ახვედი მაღლა, ტყვეობა დაატყვევე, ძღვენი მიიღე ადამიანთა შორის, დიახ, ურჩთა შორისაც, რათა უფალი დამკვიდრდეს იქ.

¹⁹კურთხეულ იყოს უფალი, რომელიც ყოველდღე ზრუნავს ჩვენზე. ღმერთი ჩვენი მხსნელი.

²⁰ღმერთია, ჩვენი ხსნის ღმერთი, უფალი ღმერთის ხელშია ხსნა სიკვდილისგან.

²¹დიახ, ღმერთი გაუჭეჭყავს თავს თავის მტრებს, ბანჯგვლიან კეფას - დანაშაულის გზით მოსიარულეს.

²²თქვა უფალმა - ბაშანიდან დავაბრუნებ ჩემს ხალხს, დავაბრუნებ ზღვის სიღრმეებიდან,

²³რათა მტრების სისხლში ჩადგა შენი ფეხი, და შენმა ძაღლებმა ენით ალოკონ შენი მტრების სისხლი;

²⁴ნახეს შენი სვლა ღმერთო, სვლა ჩემი ღმერთისა, ჩემი მეფისა, საწმიდარისკენ.

²⁵წინ მგალობლები მიდიოდნენ, უკან - მუსიკოსნი, შუაში - მედაირე ქალწულები.

²⁶კრებულთა შორის ადიდეთ ღმერთი, უფალი, წყარო ისრაელისა.

²⁷პატარა ბენიამინი წინ მიუძღვის მათ, იუდას მთავრებიც ურიცხვი ხალხით, ზებულონისა და ნაფთალის მთავრებთან ერთად.

²⁸შენმა ღმერთმა მოგაკუთვნა ძალა; ღმერთო განამტკიცე ის, რაც მოიმოქმედე ჩვენთვის.

²⁹შენი ტაძრის გამო, რომელიც იერუსალიმშია, ძღვენს მოგიტანენ მეფენი,

³⁰შერისხე მხეცი ლერწმიანისა, ხარების ჯოგი - ხალხთა ზვარაკებს შორის, ფეხქვეშ რომ გათელეს ვერცხლი. მიმოფანტე ომის მოსურნე ხალხები.

³¹მოვლენ ეგვიპტის ელჩები, ქუში სწრაფად გაიწვდის ძღვენით სავსე ხელებს ღვთისკენ.

³²ქვეყნიერების სამეფოებო, ღმერთს უმღერეთ, უფალს უგალობეთ!

³³ამხედრებულს უძველეს ცათა ცაზე - აჰა, ის გამოსცემს თავისი ძლიერების ხმას.

³⁴აღიარეთ ღვთის ძლიერება; მისი სიდიადე ისრაელზეა და მისი სიძლიერე - ღრუბლებში.

³⁵შიშის მომგვრელი ხარ შენს საწმიდარში ღმერთო, ღმერთო ისრაელისა, რომელიც ძალას და ძლევამოსილებას აძლევ ხალხს. კურთხეულ არს ღმერთი!