Read Traducción Kadosh Israelita Mesiánica ფსალმუნები 68 Bible Online

ფსალმუნები 68 - Traducción Kadosh Israelita Mesiánica bible

ფსალმუნები 68

¹მიხსენი ღმერთო, რადგან ყელამდე მომადგა წყალი.

²გაუვალ ლაფში ჩავეფლე და არაა ტერფის დასადგმელი; ღრმა წყალში შევედი და სწრაფმა დინებამ დამფარა.

³მოვიქანცე ღაღადით, ყელი გამიშრა, თვალები ამომიღამდა ჩემი ღმერთის მოლოდინში.

⁴ჩემი თავის თმაზე მეტად მომიმრავლდნენ უმიზეზოდ მოძულენი; გაძლიერდნენ ჩემი მოსპობის მსურველნი, ჩემზე უმიზეზოდ გადამტერებულნი. რაც არ წამირთმევია, ის უნდა დავუბრუნო.

⁵ღმერთო, შენ იცი ჩემი უგუნურება და ჩემი დანაშაული დაფარული არ არის შენგან.

⁶ნუ შერცხვებიან ჩემ გამო შენი მოიმედენი უფალო,ცაბაოთ ღმერთო; ნუ გაწბილდებიან ჩემ გამო, ვინც შენ გეძებს, ღმერთო ისრაელისა.

⁷რადგან შენთვის მივიღე ლანძღვა, სირცხვილმა დაფარა ჩემი სახე.

⁸გარიყული გავხდი ჩემი ძმებისთვის და უცხო - დედაჩემის შვილთათვის.

⁹რადგან შენი სახლის მოშურნეობამ დამღრღნა და შენი მლანძღველების ლანძღვა დამატყდა თავს.

¹⁰ვტიროდი და ვმარხულობდი, მაგრამ ლანძღვა მივიღე,

¹¹ძაძებით შევიმოსე და დასაცინი გავხდი მათთვის.

¹²ჩემზე ლაპარაკობენ კარიბჭესთან მსხდომნი და მღერიან ღვინის მსმელნი.

¹³მე კი შენ მიმართ ვლოცულობ უფალო, სასურველ დროს; ღმერთო, შენი დიდი წყალობით მიპასუხე და მიხსენი შენი ერთგულებით.

¹⁴მიხსენი ჭაობისგან, შიგ რომ არ ჩავეფლა; ჩემი მოძულეებისგან და ღრმა წყლებისგან გადამარჩინე.

¹⁵ნუ გამიტაცებს წყლის ტალღა, ნუ ჩამყლაპავს მორევი და პირს ნუ შეიკრავს ჩემზე ორმო.

¹⁶მიპასუხე უფალო, რადგან კარგია შენი წყალობა; შენი დიდი სიბრალულით გადმომხედე.

¹⁷ნუ დაფარავ სახეს შენი მორჩილისგან, რადგან მიჭირს; სწრაფად მიპასუხე.

¹⁸მოუახლოვდი ჩემს სულს, გადამარჩინე; გამომისყიდე ჩემი მტრებისგან.

¹⁹შენ იცი ჩემი გალანძღვა, გაწბილება და შერცხვენა; შენ წინაშეა ყველა ჩემი მტერი.

²⁰დამცირებამ გული გამიტეხა და დავსნეულდი; თანამგრძნობს ველოდი და არავინ იყო, მანუგეშებელს და - ვერ ვპოვე.

²¹ნაღველი მომცეს საჭმელად და წყურვილისას ძმარი შემასვეს.

²²დაე, თავისივე ტაბლა ექცეთ ხაფანგად და მახედ - ის, რაც კეთილდღეობისთვის აქვთ.

²³თვალები დაუბნელდეთ, რომ ვერ ხედავდნენ და მუდმივად კანკალებდეს მათი წელი.

²⁴შენი მრისხანება გადმოღვარე მათზე და შენი რისხვის ალი ეწიოთ.

²⁵მათი საცხოვრებელი გაპარტახდეს, არავინ მკვიდრობდეს მათ კარვებში.

²⁶რადგან შენ მიერ ნაგვემს დევნიან და შენ მიერ განგმირულთა ტკივილებზე ლაპარაკობენ.

²⁷მიუმატე ცოდვა მათ ცოდვებს და ნუ შემოვლენ შენს სიმართლეში.

²⁸ამოიშალონ ისინი ცოცხალთა წიგნიდან და მართლებთან ნუ ჩაიწერებიან.

²⁹მე კი ჩაგრული და ტკივილით შეწუხებული ვარ; შენმა ხსნამ, ღმერთო, ამამაღლოს მე.

³⁰გალობით შევაქებ ღვთის სახელს და მადლიერებით განვადიდებ.

³¹ეს უფრო მოეწონება უფალს, ვიდრე ხარი ან რქიანი და ჩლიქიანი მოზვერი.

³²იხილავენ ამას თავმდაბალნი და გაიხარებენ; გაცოცხლდეს გული თქვენი, ღვთის მაძიებელნო.

³³რადგან უსმენს უფალი გაჭირვებულებს და თავის ტყვეებს არ უგულებელყოფს.

³⁴განადიდოს იგი ცამ და დედამიწამ, ზღვამ და ყოველივემ, რაც მათში მოძრაობს.

³⁵რადგან ღმერთი დაიხსნის სიონს, ააშენებს იუდას ქალაქებს; იქ დასახლდება მისი ერი და დაეპატრონება მას.

³⁶მის მსახურთა შთამომავლობა დაეუფლება მას და მისი სახელის მოყვარულნი იცხოვრებენ მასში.