Read Traducción Kadosh Israelita Mesiánica ფსალმუნები 70 Bible Online

ფსალმუნები 70 - Traducción Kadosh Israelita Mesiánica bible

ფსალმუნები 70

¹უფალო, შენში ვეძებ თავშესაფარს, ნუმც შევრცხვენილვარ უკუნისამდე.

²მიხსენი შენი სიმართლით და გადამარჩინე, ყური მომაპყარ და მიშველე.

³იყავი ჩემთვის კლდოვანი თავშესაფარი, რომ ყოველთვის იქ შევდიოდე; ბრძანე ჩემი შველა, რადგან კლდე და სიმაგრე ხარ ჩემი.

⁴ღმერთო ჩემო, ბოროტის ხელისგან მიხსენი, უკანონობის მოქმედისა და მძარცველის ხელისგან.

⁵რადგან შენა ხარ ჩემი იმედი, უფალო, ღმერთო ჩემო, შენზე ვარ მონდობილი ყრმობიდანვე.

⁶დედის მუცლიდანვე შენზე ვიყავი დანდობილი, შენ გამომიყვანე დედის საშოდან; მუდამ შენ გეკუთვნის ჩემი ხოტბა.

⁷საკვირველი გავხდი მრავალთათვის; მაგრამ შენ ხარ ჩემი მტკიცე თავშესაფარი.

⁸შენი ქებითაა სავსე ჩემი პირი; მთელი დღე შენს დიდებულებაზე ვლაპარაკობ.

⁹ნუ უკუმაგდებ სიბერის ჟამს, ნუ მიმატოვებ, როცა დაიშრიტება ძალა ჩემი.

¹⁰რადგან მოილაპარაკეს ჩემმა მტრებმა და ერთად იზრახავენ ჩემი სიცოცხლის წინააღმდეგ ჩასაფრებულნი.

¹¹ამბობენ, ღმერთმა მიატოვაო იგი, დაედევნეთ და შეიპყარით, რაკი არა ჰყავს მხსნელი.

¹²ღმერთო, ნუ გამშორდები; ღმერთო ჩემო, გამოეშურე ჩემს შესაწევნად.

¹³დაე, შერცხვნენ და მოისპონ ჩემი მტრები; სირცხვილმა და გაჭირვებამ დაფაროს ჩემთვის სიავის მაძიებლები.

¹⁴მე კი გამუდმებით შენ გელოდები და ვამრავლებ შენს დიდებას;

¹⁵ბაგენი ჩემი ილაპარაკებენ შენს სიმართლეზე, მთელ დღეს - შენმიერ ხსნაზე, რადგან არ ვიცი მათი რიცხვი.

¹⁶მოვალ და ღმერთის, უფლის დიად საქმეებზე ვილაპარაკებ; შენს სიმართლეს, მხოლოდ შენსას გავიხსენებ.

¹⁷ღმერთო, შენ მასწავლიდი ყრმობიდანვე და დღესაც შენს საოცრებაზე ვლაპარაკობ.

¹⁸ჭაღარამდე, ღრმა სიბერემდე ნუ მიმატოვებ ღმერთო, ვიდრე გავუცხადებდე შენს ძლიერებას ამ თაობას და ყველა მომავალს - შენს შეძლებას.

¹⁹ცას სწვდება შენი სიმართლე ღმერთო; დიადია საქმენი შენი, ვინ შეგედრება, ღმერთო?!

²⁰შენ მაჩვენებდი მრავალ და მძიმე გასაჭირს, მაგრამ კვლავ მაცოცხლებდი და დედამიწის უფსკრულიდან ამოგყავდი.

²¹შენ მმატებდი დიდებას და ბრუნდებოდი ჩემს სანუგეშებლად.

²²და მეც ებნით შევაქებ შენს ერთგულებას, ღმერთო; ქნარით გიმღერებ, ისრაელის წმიდავ.

²³სიხარულით იყიჟინებენ ჩემი ბაგეები, როცა გიგალობებ და ჩემი სულიც - შენ რომ გამოისყიდე.

²⁴ჩემი ენაც ყოველდღე ილაპარაკებს შენს სიმართლეზე, რადგან შერცხვნენ და დამცირდნენ ჩემი ავის მაძიებელნი.