Read Traducción Kadosh Israelita Mesiánica ფსალმუნები 71 Bible Online

ფსალმუნები 71 - Traducción Kadosh Israelita Mesiánica bible

ფსალმუნები 71

¹ღმერთო, შენი სამართალი მიეცი მეფეს და შენი სიმართლე - მეფის ძეს.

²რათა სიმართლით განსაჯოს შენი ერი და შენი ჩაგრულნი - სამართლიანად.

³მთები მშვიდობას მოუტანენ ხალხს და ბორცვები სიმართლეს.

⁴სამართალს გაუჩენს ჩაგრულ ხალხს, იხსნის ღარიბთა შვილებს და შემუსრავს მჩაგვრელთ.

⁵შენი შიში ექნებათ, ვიდრე მზე და მთვარეა, თაობიდან თაობამდე.

⁶ის წვიმასავით ჩამოვა მოთიბულ ბალახზე, შხაპუნა წვიმასავით, მიწას რომ ალბობს.

⁷მის დღეებში გაიფურჩქნება მართალი და იქნება დიდი მშვიდობა, ვიდრე იარსებებს მთვარე.

⁸იბატონებს ზღვიდან ზღვამდე და მდინარედან დედამიწის კიდეებამდე.

⁹ქედს მოიდრეკენ მის წინაშე უდაბნოს მცხოვრებნი და მისი მტრები მტვერს ალოკავენ.

¹⁰თარშიშისა და კუნძულთა მეფენი ხარკს მოუტანენ მას; შებას და საბას მეფენი ძღვენს მოართმევენ.

¹¹ყველა მეფე მოიდრიკება მის წინაშე და ყველა ერი მოემსახურება მას.

¹²რადგან იხსნის ღარიბს, როდესაც შეჰღაღადებს და ჩაგრულს, რომელსაც შემწე არა ჰყავს.

¹³შეიწყნარებს დავრდომილსა და გაჭირვებულს, იხსნის ღარიბთა სიცოცხლეს.

¹⁴ჩაგვრისა და ძალადობისგან დაიხსნის მათ სიცოცხლეს, ძვირფასია მათი სისხლი მის თვალში.

¹⁵დღეგრძელი იყოს და მიეცეს მას შებას ოქრო; განუწყვეტლივ ილოცონ მისთვის და მთელ დღეს აქებდნენ მას.

¹⁶იყოს სიუხვე პურისა დედამიწაზე, მთათა მწვერვალებზე. ლიბანის ტყესავით იბიბინებს მისი ნაყოფი; აყვავდნენ კაცნი ქალაქებში, როგორც ბალახი დედამიწაზე.

¹⁷უკუნისამდე დამკვიდრდეს მისი სახელი, იდიდებს - ვიდრე მზე არსებობს, მის მიერ იკურთხება ყოველი ერი და უწოდებს მას კურთხეულს.

¹⁸კურთხეულ იყოს უფალი ღმერთი, ღმერთი ისრაელისა, მხოლოდ ის ახდენს სასწაულებს.

¹⁹კურთხეულ იყოს მისი დიდებული სახელი უკუნისამდე და აივსოს მისი დიდებით მთელი დედამიწა. ამინ, ამინ!

²⁰დასრულდა ლოცვანი დავითისა, იესეს ძისა.