Read Traducción Kadosh Israelita Mesiánica ფსალმუნები 72 Bible Online

ფსალმუნები 72 - Traducción Kadosh Israelita Mesiánica bible

ფსალმუნები 72

¹ნამდვილად კეთილია ღმერთი ისრაელისადმი, გულით სუფთების მიმართ.

²მე კი - კინაღამ გადაუხვიეს ჩემმა ფეხებმა, ლამის მომიცურდა ნაბიჯები,

³რადგან შემშურდა უგუნურებისა, ვხედავდი რა ბოროტთა კეთილდღეობას.

⁴რადგან არა აქვთ ტკივილი სიკვდილამდე და ჯანსაღნი არიან.

⁵კაცთა სიძნელეებს არ განიცდიან და სხვა ადამიანებივით არ ტვირთმძიმობენ,

⁶ამიტომ მძივივით გარს შემოერტყა მათ ამპარტავნობა და ძალადობა სამოსელივით ჩაიცვეს.

⁷სიმსუქნისგან თვალები გადმოკარკლეს, სიბრიყვით აევსოთ გულები.

⁸ავად და დამცინავად ლაპარაკობენ, ძალადობით იმუქრებიან.

⁹ზეცის წინააღმდეგ დააღეს პირები, მათი ენები კი დედამიწაზე დაიარება.

¹⁰ამიტომ მისი ხალხიც მათ მიმართავს ხოლმე და სვამენ მათ სიტყვებს, როგორც წყალს სავსე თასიდან.

¹¹ამბობენ: როგორ შეიტყობს ღმერთი? განა აქვს ცოდნა უზენაესს?

¹²აჰა, ბოროტნი ამა ქვეყნისა, უზრუნველნი არიან და დოვლათს იხვეჭენ;

¹³განა, ამაოდ არ განვიწმიდეთ გულები და დავიბანეთ ხელები უდანაშაულობით?

¹⁴ყოველ დღე ვიტანჯებოდით და ვისჯებოდით ყოველ დილით.

¹⁵რომ მეთქვა: მეც ასე ვილაპარაკებ-მეთქი, მაშინ ვუღალატებდი შენი შვილების თაობას.

¹⁶და განვიზრახე, რომ გამეგო ეს, მაგრამ ძნელად მეჩვენებოდა,

¹⁷ვიდრე ღვთის საწმიდარში მოვიდოდი და მათ ბოლოს მივხვდებოდი.

¹⁸ნამდვილად მოლიპულ გზაზე დააყენე ისინი; შენ მოსპობ მათ.

¹⁹როგორ მეყსეულად განადგურდნენ, დაიღუპნენ შიშის ზარისგან!

²⁰როგორც სიზმარი ქრება გამოღვიძების შემდეგ, ისე მოიძულებ მათ სახეებს, როცა აღსდგები, უფალო.

²¹როცა გული მიმწარდებოდა და შინაგანი მეფლითებოდა,

²²უგუნური ვიყავი და ვერ ვხვდებოდი, პირუტყვს დავემსგავსე შენ წინაშე.

²³და მაინც მუდამ შენთან ვარ, შენ გიჭირავს ჩემი მარჯვენა.

²⁴შენი რჩევით მიმიძღვი წინ და დიდებამდე მიგყავარ.

²⁵ვინ არის ჩემთვის ზეცაში? და შენ გარდა არაფერი მსურს დედამიწაზე.

²⁶ქანცგამოლეულია ჩემი სხეული და გული, მაგრამ ღმერთია სიმაგრე ჩემი გულისა და ჩემი წილხვედრი უკუნისამდე.

²⁷რადგან, აჰა, შენგან განშორებულნი დაიღუპებიან; შენ სპობ ყველას, ვინც არ გიერთგულებს.

²⁸ჩემთვის კი სასიკეთოა ღმერთთან სიახლოვე; უფალი ღმერთი გავიხადე ჩემს თავშესაფრად. ყველა შენს საქმეზე ვილაპარაკებ.