Read Traducción Kadosh Israelita Mesiánica ფსალმუნები 73 Bible Online

ფსალმუნები 73 - Traducción Kadosh Israelita Mesiánica bible

ფსალმუნები 73

¹ღმერთო, რატომ მიგვატოვე სამუდამოდ, რატომ აინთო შენი რისხვა შენი სამწყსოს ცხვარზე?

²გაიხსენე შენი ხალხი, ადრევე რომ შეიძინე, ტომი რომელიც შენს მემკვიდრეობად გამოისყიდე! გაიხსენე მთა სიონისა, რომელზეც მკვიდრობ შენ.

³წარმართე შენი ნაბიჯები მარადიული ნანგრევებისკენ; ყველაფერი გაანადგურა მტერმა შენს საწმიდარში.

⁴შენი მტრები ღმუიან შენს საკრებულოში; თავისი ნიშნები დადეს სასწაულების მაგიერ.

⁵ხის ტოტებზე ცულშემართულებს ჰგავდნენ,

⁶და ახლა საწმიდრის ყველა ჩუქურთმას უროსა და ცულს ურტყამენ.

⁷ცეცხლს მისცეს შენი საწმიდარი, მიწასთან გაასწორეს შენი სახელის სამკვიდრებელი.

⁸თქვეს თავიანთ გულში: გავანადგურებთ მათ ერთიანად. გადაწვეს ღმერთის ყველა შესაკრებელი ადგილი ქვეყანაზე.

⁹ჩვენს ნიშნებს ვეღარ ვხედავთ, აღარ გვყავს წინასწარმეტყველი და არვინ არის ჩვენთან, რომ იცოდეს - როდემდე გაგრძელდება ასე.

¹⁰ო, ღმერთო, როდემდე უნდა შეურაცხგვყოს მტერმა? ნუთუ მარადჟამს უნდა ლანძღავდეს მტერი შენს სახელს?

¹¹უკან რად მიგაქვს შენი ხელი, შენი მარჯვენა? გამოიღე უბიდან და მოსპე.

¹²მაგრამ ღმერთი, ჩემი მეფეა ძველთაგანვე, დიდი ხსნა მოაქვს ქვეყანაზე.

¹³შენ გააპე ზღვა შენი ძალით, თავები მიუმტვრიე წყლის ურჩხულებს.

¹⁴შენ გაუჭეჭყე თავი ლევიათანს და საკვებად მიეცი იგი უდაბნოს მხეცებს.

¹⁵შენ გააპე წყარო და ხევი, შენ დააშრე დაუშრობელი მდინარენი.

¹⁶შენია დღე, ღამეც შენია; შენ დაადგინე მთვარე და მზე.

¹⁷ქვეყნიერების ყველა საზღვარი შენ დაადგინე, გაზაფხული და ზამთარი შენ შექმენი.

¹⁸უფალო, გაიხსენე: როგორ გალანძღა მტერმა და უგუნურმა ხალხმა ჰგმო შენი სახელი.

¹⁹ნუ მისცემ მხეცებს შენი გვრიტის სიცოცხლეს, ნურასოდეს დაივიწყებ შენი ღარიბების სიცოცხლეს.

²⁰გაიხსენე შენი აღთქმა, რადგან ძალადობით აივსო ქვეყნიერების ბნელი ადგილები.

²¹შერცხვენილი ნუ დაბრუნდება ჩაგრული, დაე, აქებდნენ შენს სახელს ღარიბნი და საწყალნი.

²²აღსდექ უფალო და ედავე შენს მოდავეებს, გაიხსენე ყოველდღე რომ გლანძღავდნენ უგუნურნი.

²³ნუ დაივიწყებ შენი მტრების ხმას; შენი მოწინააღმდეგეების ღრიალს, მუდამ რომ ამოდის!