Read Traducción Kadosh Israelita Mesiánica ფსალმუნები 78 Bible Online

ფსალმუნები 78 - Traducción Kadosh Israelita Mesiánica bible

ფსალმუნები 78

¹ღმერთო! ხალხები შემოიჭრნენ შენს სამკვიდრებელში, შებილწეს შენი წმიდა ტაძარი, ნანგრევებად აქციეს იერუსალიმი.

²შენი მსახურების გვამები ცის ფრინველებს მისცეს საჭმელად, შენი ერთგული ხალხის ხორცი - დედამიწის მხეცებს.

³წყალივით დაღვარეს მათი სისხლი იერუსალიმის გარშემო, და დამმარხავი არავინაა.

⁴სალანძღად გავხდით ჩვენი მეზობლებისთვის, მასხრად ასაგდები და დასაცინი - ჩვენ ირგვლივ მყოფთათვის.

⁵როდემდე იქნები, უფალო, განრისხებული? სამუდამოდ? როდემდე იგიზგიზებს ცეცხლივით შენი მოშურნეობა?

⁶გადმოღვარე შენი რისხვა იმ ხალხებზე, რომ არ გცნობენ და სამეფოებზე, შენს სახელს რომ არ მოუხმობენ.

⁷რადგან შეჭამეს იაკობი და გააპარტახეს მისი სადგომი.

⁸ნუ გაგვიხსენებ მამების ცოდვებს; მალე შეგვეგებოს შენი წყალობა, რადგან მეტისმეტად დავუძლურდით.

⁹გვიშველე, ჩვენი ხსნის ღმერთო, შენი სახელის სადიდებლად გადაგვარჩინე და შენი სახელის გამო შეგვინდე ჩვენი ცოდვები.

¹⁰რატომ უნდა თქვან ერებმა - სად არისო მათი ღმერთი? დაე, ცნობილი იყოს ჩვენს თვალწინ, ხალხებს შორის, რომ შენი მსახურების დაღვრილი სისხლის გამო შურს იძიებ.

¹¹მოაღწიოს შენამდე ტუსაღის კვნესამ. შენი მკლავის სიძლიერით დაიფარე სასიკვდილოდ განწირულნი.

¹²შვიდმაგად დაუბრუნე ჩვენს მეზობლებს მათ წიაღში ის დამცირება, რომლითაც შენ გამცირებდნენ უფალო.

¹³ჩვენ კი შენი ხალხი და შენი სამწყსოს ცხვარი, სამუდამოდ მოგიძღვნით ხოტბას და თაობიდან თაობას მოვუთხრობთ შენს დიდებას.