Read Traducción Kadosh Israelita Mesiánica ფსალმუნები 85 Bible Online

ფსალმუნები 85 - Traducción Kadosh Israelita Mesiánica bible

ფსალმუნები 85

¹ყური მომაპყარ უფალო და მიპასუხე, რადგან ღარიბ-ღატაკი ვარ.

²დაიფარე ჩემი სიცოცხლე, რადგან ღვთისმოსავი ვარ; იხსენი შენი მსახური, ღმერთო ჩემო, რომელიც შენზეა მონდობილი.

³შემიწყალე, უფალო, რადგან შენ მოგიხმობ ყოველდღე.

⁴გაახარე შენი მსახური, რადგან შენკენ აღვაპყარ ჩემი სული, უფალო.

⁵რადგან, კეთილი და მიმტევებელი ხარ შენ, უფალო, და დიდად მოწყალე ყველასთვის, ვინც შენ მოგიხმობს.

⁶უფალო, ისმინე ჩემი ლოცვა და ყურად იღე ჩემი ვედრება,

⁷ჩემი გაჭირვების დღეს მოგიხმობ, რადგან მიპასუხებ.

⁸არაა შენი მსგავსი ღმერთებს შორის, უფალო, და არც მსგავსი საქმეთა შენთა.

⁹შენ მიერ გაჩენილი ყოველი ერი მოვა და მოიდრიკება შენ წინაშე, უფალო, და განადიდებს შენს სახელს,

¹⁰რადგან დიადი და სასწაულმოქმედი ხარ, შენ ხარ ერთადერთი ღმერთი.

¹¹შენი გზა მასწავლე უფალო და ვივლი შენს ჭეშმარიტებაში. წარმართე ჩემი გული შენი სახელის მოშიშებით.

¹²ქებას მოგიძღვნი უფალო, ღმერთო ჩემო, მთელი გულით და უკუნისამდე განვადიდებ შენს სახელს,

¹³რადგან დიდია შენი სიკეთე ჩემს მიმართ, შენ გადამარჩინე შავეთის ქვესკნელისგან.

¹⁴ღმერთო, აღდგნენ ქედმაღალნი ჩემს წინააღმდეგ და მტარვალთა მთელი კრებული ეძიებს ჩემს სიცოცხლეს, რადგან დაგივიწყეს.

¹⁵შენ კი უფალო ღმერთო, შემწყალევ და მადლიანო, რისხვაში ნელი - ხოლო, წყალობასა და ჭეშმარიტებაში უხვი ხარ.

¹⁶მომხედე და შემიწყალე, მიეცი შენი ძალა შენს მორჩილს და იხსენი ძე შენი მხევლისა.

¹⁷სასიკეთო ნიშანი მიჩვენე, რათა იხილონ ჩემმა მოძულეებმა და შერცხვნენ, რადგან შენ შემეწიე და მანუგეშე უფალო.