Read Traducción Kadosh Israelita Mesiánica ფსალმუნები 87 Bible Online

ფსალმუნები 87 - Traducción Kadosh Israelita Mesiánica bible

ფსალმუნები 87

¹უფალო, ჩემი ხსნის ღმერთო! შენ წინაშე ვღაღადებთ დღისით და ღამით.

²მოვიდეს შენ წინაშე ჩემი ლოცვა. ყური მოაპყარ ვედრებას ჩემსას.

³რადგან სიავით აივსო ჩემი სული და ჩემი სიცოცხლე საფლავს უახლოვდება.

⁴სამარეში ჩამავალთა შორის შევირაცხე. უძლური კაცივით შევიქენი;

⁵მკვდრებს შორის ჩაგდებული, როგორც სამარხში მწოლიარე მოკლულნი, რომლებიც აღარ გახსოვს, რადგან მოკვეთილნი არიან შენი ხელით.

⁶ქვესკნელის ორმოში მომათავსე, ბნელეთში, სიღრმეებში.

⁷შენი რისხვა დამატყდა თავს და ყველა შენმა ტალღამ ჩემზე გადაიარა.

⁸შენ განმაშორე ნაცნობნი ჩემნი, საზიზღარი გამხადე მათთვის; დატყვევებული ვარ და ვერ გამოვდივარ.

⁹თვალები მომექანცა ტანჯვით; ყოველდღე მოგიხმობდი, უფალო, შენკენ ვიწვდიდი ხელებს.

¹⁰განა მკვდრებისთვის ახდენ სასწაულს? განა მიცვალებულნი წამოდგებიან და შეგაქებენ?

¹¹განა საფლავში ილაპარაკებენ შენს წყალობაზე და შენს ჭეშმარიტებაზე - აბადონში?

¹²განა შეიცნობენ წყვდიადში შენს სასწაულებს და შენს სიმართლეს - დავიწყების ქვეყანაში?

¹³მე კი უფალო, შენ გევედრები და დილდილობით ჩემი ლოცვა წინ გეგებება.

¹⁴უფალო, რად მიატოვე ჩემი სული, რატომ დამალე შენი სახე ჩემგან?

¹⁵ტანჯული ვარ და სიკვდილის პირას მყოფი ყრმობიდანვე, შენს შიშის ზარს ვზიდავ, უძლური ვარ.

¹⁶თავზე გადამიარა შენმა მრისხანებამ, შენმა შიშის ზარმა გამანადგურა.

¹⁷მთელი დღე წყალივით გარს მივლიდნენ, ყველა ერთად მერტყმოდა გარს.

¹⁸შენ განმაშორე მოყვარე და მეგობარი, სიბნელეა - ჩემი ახლობელი.