Read Traducción Kadosh Israelita Mesiánica ფსალმუნები 88 Bible Online

ფსალმუნები 88 - Traducción Kadosh Israelita Mesiánica bible

ფსალმუნები 88

¹მუდამ ვუგალობებ უფლის წყალობას, თაობიდან თაობას ვაცნობებ ჩემი ბაგით შენს ერთგულებას.

²რადგანაც ვთქვი: უკუნისამდეა დაფუძნებული შენი წყალობა და ცებშია განმტკიცებული შენი ერთგულება.

³შენ თქვი: აღთქმა დავუდე ჩემს რჩეულს, შევფიცე დავითს, ჩემს მსახურს:

⁴სამუდამოდ განვამტკიცებ შენს შთამომავლობას და თაობიდან თაობამდე დავაფუძნებ შენს ტახტს.

⁵ცანი განადიდებენ შენს საოცრებებს უფალო, და შენს ერთგულებას - წმიდანთა კრებულში.

⁶რადგან ვინ არის ცაში უფლის სადარი? ან ვინ არის უფლის მსგავსი ღვთის შვილებს შორის?

⁷დიდად საშიშია ღმერთი წმინდანთა კრებულში, შიშის მომგვრელია ის მის ირგვლივ მყოფთა შორის.

⁸უფალო, ცაბაოთ ღმერთო! ვინ არის შენებრ ძლევამოსილი უფალო? ძლიერი ხარ და ერთგულება გარტყავს გარშემო, უფალო!

⁹შენ ბატონობ ზღვის მოქცევაზე, აბობოქრებულ ტალღებს შენ ამშვიდებ.

¹⁰შენ შემუსრე რახაბი და მოკლულს დაამსგავსე; შენი ძლიერი მკლავით გაფანტე შენი მტრები.

¹¹შენია ცანი, დედამიწაც შენია, სამყარო და მისი სავსება შენ დააფუძნე.

¹²ჩრდილოეთი და სამხრეთი შენ შექმენი; თაბორი და ხერმონი სიხარულით აქებენ შენს სახელს.

¹³ძლიერია შენი მკლავი; ძლევამოსილია შენი ხელი და შემართულია მარჯვენა შენი.

¹⁴სიმართლე და მართლმსაჯულებაა შენი ტახტის საფუძველი, წყალობა და ჭეშმარიტება დგანან შენ წინაშე.

¹⁵ნეტარია ხალხი, რომელიც სცნობს საზეიმო შეძახილს; შენი სახის სინათლეში ივლიან ისინი, უფალო;

¹⁶შენი სახელით ილხენენ მთელ დღეს და შენი სიმართლით მაღლდებიან.

¹⁷რადგან შენ ხარ მათი ძალის დიდება და შენი ნებით მომაღლდება ჩვენი რქა ღირსებისა.

¹⁸რადგან უფალია ჩვენი ფარი და ისრაელის წმიდა - მეფე ჩვენი.

¹⁹ოდესღაც ხილვაში ელაპარაკე შენს ერთგულებს და უთხარი: დახმარება ვუბოძე გმირს; ხალხში ავამაღლე რჩეული.

²⁰ვპოვე დავითი, მსახური ჩემი და ჩემი წმიდა ზეთი ვცხე მას.

²¹ჩემი ხელი წარმართავს მას, და ჩემი მკლავი განამტკიცებს მას.

²²მტერი ვერ დაჯაბნის მას და ურჯულო ვერ დაჩაგრავს.

²³მის წინაშე შევმუსრავ მის მტრებს და მის მოძულეებს დავლახვრავ.

²⁴ჩემი ერთგულება და წყალობა იქნება მასთან; ჩემი სახელით მომაღლდება მისი რქა ღირსებისა.

²⁵ზღვას გადავაწვდენ მის ხელს და მდინარეებს - მის მარჯვენას.

²⁶ის მომიხმობს: მამა ხარ ჩემი, ჩემი ღმერთი და ხსნის კლდე;

²⁷მეც პირმშოდ დავადგენ მას, ქვეყნიერების მეფეებზე მეტად ავამაღლებ,

²⁸უკუნისამდე შევუნახავ ჩემს წყალობას და ჩემი აღთქმა მტკიცე იქნება მისთვის.

²⁹სამუდამოდ დავაფუძნებ მის შთამომავალს და მის ტახტს - ვითარცა ცათა დღეებს.

³⁰თუ მიატოვებენ მისი ძენი ჩემს რჯულს და ჩემს სამართალს არ გაჰყვებიან,

³¹თუ ჩემს წესდებებს დაარღვევენ და ჩემს მცნებებს არ დაიცავენ,

³²კვერთხით მოვკითხავ მათ დანაშაულს და გვემით - შეცოდებას.

³³მაგრამ ჩემს წყალობას არ მოვუშლი მას და არ გავაცრუებ ჩემს ერთგულებას.

³⁴არ დავარღვევ ჩემს აღთქმას და ჩემი პირით ნათქვამს არ შევცვლი.

³⁵ერთხელ დავიფიცე ჩემი სიწმიდით: არ ვეცრუები დავითს.

³⁶მარადჟამს იქნება მისი შთამომავალი და მისი ტახტი - როგორც მზე ჩემს წინაშე;

³⁷მთვარესავით დაფუძნდება უკუნისამდე, როგორც ერთგული მოწმე ზეცაში.

³⁸მაგრამ ახლა მიატოვე და უკუაგდე, განრისხდი შენს ცხებულზე.

³⁹უგულებელჰყავი აღთქმა შენს მორჩილთან, მიწას დაანარცხე მისი გვირგვინი.

⁴⁰მისი ყველა ზღუდე მოშალე, ნანგრევებად აქციე მისი სიმაგრენი.

⁴¹ძარცვავს მას ყველა გამვლელ-გამომვლელი, მეზობლების დასაცინი გახდა.

⁴²მაღლა ასწიე მის მოშუღართა მარჯვენა, გაახარე ყველა მისი მტერი.

⁴³მისი მახვილიც დააჩლუნგე და არ შეეწიე ბრძოლაში.

⁴⁴გააცამტვერე მისი დიდება და მისი ტახტი მიწასთან გაასწორე.

⁴⁵შეამოკლე დღენი მისი სიჭაბუკისა და სირცხვილით შემოსე იგი.

⁴⁶როდემდე დაგვემალები უფალო, სამუდამოდ იგიზგიზებს ცეცხლივით შენი მრისხანება?

⁴⁷გაიხსენე, რა ხანმოკლეა ჩემი სიცოცხლე, რა ამაოებისთვის შეჰქმენი ყოველი ძე კაცისა?

⁴⁸ვინ არის კაცი, რომ იცოცხლოს და სიკვდილი არ იხილოს, თავი გადაირჩინოს საფლავისგან?

⁴⁹სად არის შენი ადრინდელი წყალობა, უფალო, შენი ერთგულებით რომ შეჰფიცე დავითს?

⁵⁰გაიხსენე უფალო, შენი მსახურების დამცირება, უბით რომ ვატარებდი ყველა ძლიერი ხალხისგან;

⁵¹როგორ ლანძღავენ შენი მტრები უფალო, როგორ ლანძღავენ შენი ცხებულის კვალს.

⁵²კურთხეულ იყოს უფალი უკუნისამდე. ამინ და ამინ!