Read Traducción Kadosh Israelita Mesiánica ფსალმუნები 9 Bible Online

ფსალმუნები 9 - Traducción Kadosh Israelita Mesiánica bible

ფსალმუნები 9

¹მთელი გულით მადლობას შემოგწირავ, უფალო, ვილაპარაკებ ყველა შენს სასწაულზე.

²ვიმხიარულებ და ვიხარებ შენით, შენს სახელს ვუმღერებ, უზენაესო,

³როცა მიიქცევიან ჩემი მტრები, წაიფორხილებენ და დაიღუპებიან შენ წინაშე.

⁴ვინაიდან შენ იდავე ჩემთვის და ჩემი სიმართლისთვის, ტახტზე დაბრძანდი, მართალო მსაჯულო.

⁵განრისხდი ერებზე, მოსპე ბოროტი და სამუდამოდ, სამარადისოდ ამოშალე მათი სახელი.

⁶გაქრა მტერი, საბოლოოდ გაპარტახდა, შენ დაანგრიე მათი ქალაქები და მათთან ერთად მოსპე მათი სახსენებელი.

⁷უფალი კი საუკუნოდ მკვიდრობს. სამართლისთვის დააფუძნა თავისი ტახტი.

⁸სიმართლით განიკითხავს იგი ქვეყნიერებას და მიუკერძოებლად გაასამართლებს ხალხებს.

⁹უფალი იქნება ჩაგრულის თავშესაფარი და დასაყრდენი გაჭირვების დროს.

¹⁰შენ მოგენდობიან შენი სახელის მცნობელნი, ვინაიდან არ მიატოვებ შენს მაძიებელს, უფალო.

¹¹უგალობეთ უფალს, სიონის მკვიდრთ, აუწყეთ ერებს მისი საქმენი.

¹²რადგან ის მოიკითხავს მათ სისხლს, ახსოვს ისინი, არ დავიწყებია ჩაგრულთა გოდება.

¹³შემიწყალე, უფალო, იხილე ჩემი შეჭირვება ჩემს მოძულეთაგან, აღმამაღლე სიკვდილის კარიბჭიდან,

¹⁴რათა შენი ყოველი ქება განვაცხადო სიონის ასულის კარიბჭესთან და შენმიერი ხსნით ვილხინო.

¹⁵თავიანთ ამოთხრილ ორმოში ჩაცვივდნენ ერები, მათ მიერვე დაგებულ ბადეში გაება მათი ფეხი.

¹⁶გაცხადდა უფალი, სამართლის მოქმედი, უმართლო თავისი ხელით დაგებულ მახეში გაება.

¹⁷შავეთს დაუბრუნდებიან ბოროტეულნი, ყველა ერი, ვინც დაივიწყა ღმერთი.

¹⁸ვინაიდან სამუდამოდ არ იქნება დავიწყებული ღატაკი, არც ტანჯულთა იმედი დაიღუპება სამარადისოდ.

¹⁹აღსდექ, უფალო, ნუ იმძლავრებს კაცი; დაე, გასამართლდნენ ერები შენ წინაშე.

²⁰შიშის ზარი დაეცი მათ, უფალო. დაე, იცოდნენ ერებმა, რომ მხოლოდ და მხოლოდ ადამიანები არიან ისინი.

²¹რატომ დგახარ შორს, უფალო? თვალს მარიდებ გაჭირვების ჟამს.

²²ამპარტავნობით დევნის ბოროტი ღატაკს; შეპყრობილნი იქნებიან მზაკვრობით, რომელიც განიზრახეს.

²³რადგან თავისი გულის ავხორცობით ტრაბახობს ბოროტი, ანგარების მოყვარული კი წყევლის და უარყოფს უფალს.

²⁴თავისი ქედმაღლობის გამო არ ეძებს ღმერთს ბოროტი; მისი აზრით, არ არსებობს ღმერთი.

²⁵წარმატებულია თავის ყველა გზაზე; მიუწვდომელია შენი სასამართლო მისთვის, სულის შებერვით ამარცხებს თავის მტრებს.

²⁶ამბობს თავის გულში: "არ წავიფორხილებ, თაობიდან თაობამდე არ შემხვდება სიავე”.

²⁷წყევლით, თაღლითობითა და სიცრუითაა სავსე მისი პირი; სიმრუდე და ბოროტებაა მის ენაზე.

²⁸ჩასაფრდება ეზოს უკან, სამალავიდან მოკლავს უდანაშაულოს, საწყალს უთვალთვალებს მისი თვალი,

²⁹საფარში დაუდარაჯდება, შამბნარში ჩასაფრებული ლომივით. ელოდება ღარიბს, რომ მოიტაცოს და მოიტაცებს, როგორც კი მის ბადეში გაებმება.

³⁰მოიზნიქება, გაწვება და თავის ბრჭყალებში მოაქცევს საწყალს.

³¹ამბობს თავის გულში: "დაივიწყა ღმერთმა, სახე დამალა, რომ აღარასოდეს იხილოს”.

³²აღსდექ, უფალო, აღმართე ხელი, ღმერთო, და ნუ დაივიწყებ ჩაგრულს.

³³როდემდე უნდა შეურაცხჰყოს ღმერთი უკეთურმა? ამბობდა გულში, არ მომკითხავსო ღმერთი!

³⁴მაგრამ შენ ხედავ, ხედავდი წყენასა და შევიწროებას, რათა შენი ხელით მიაგო სამაგიერო, შენ განდობს თავს ჩაგრული და შემწე ხარ ობლისა.

³⁵მკლავი გადაუმტვრიე ბოროტსა და უკეთურს, ისე მოჰკითხე მათი ბრალის გამო, რომ აღარაფერი დარჩეს მოსაკითხი.

³⁶მარადიული მეფეა უფალი, საუკუნო, აღიგავნენ ერები მისი მიწიდან.

³⁷ისმინა უფალმა თავმდაბალთა წადილი, გულს განუმტკიცებს მათ და ყურს მიაპყრობს მოსასმენად;

³⁸სამართალი გაუჩინე ობოლს და ჩაგრულს, რომ ვეღარ დათესონ ადამიანებმა შიში ქვეყანაზე.