Read Traducción Kadosh Israelita Mesiánica ფსალმუნები 93 Bible Online

ფსალმუნები 93 - Traducción Kadosh Israelita Mesiánica bible

ფსალმუნები 93

¹ღმერთო შურისგებისა, უფალო, ღმერთო შურისგებისა, გამოჩნდი.

²აღსდექ, მსაჯულო ქვეყნიერებისა, საზღაური მიაგე ამპარტავნებს.

³როდემდე ილხინონ ბოროტებმა უფალო, როდემდე ილხინონ ბოროტებმა?

⁴სიტყვებს აფრქვევენ ქედმაღლურად, ტრაბახობენ სიავის მოქმედნი.

⁵ჩაგრავენ შენს ხალხს უფალო, ტანჯავენ შენს სამკვიდროს.

⁶ქვრივსა და ხიზანს ხოცავენ და ობლებს კლავენ.

⁷ამბობენ: "ვერ დაინახავს უფალი და ვერც გაიგებს იაკობის ღმერთი”.

⁸გონს მოდით, უგუნურნო ხალხს შორის; ბრიყვნო, როდისღა დაბრძენდებით?

⁹განა ვერ მოისმენს ყურის შემქმნელი? განა ვერ დაინახავს თვალის შემქმნელი?

¹⁰განა ვერ ამხელს ერთა შემგონებელი - ის, ვინც აწვდის ადამიანს ცოდნას?

¹¹უფალმა იცის ადამიანთა ზრახვანი, რომ ამაოა ისინი.

¹²ნეტარია კაცი, რომელსაც წვრთნი უფალო, და ასწავლი შენს რჯულს.

¹³რათა მოასვენო ავი დღეებისგან, ვიდრე ორმო გაეთხრებოდეს ბოროტეულს.

¹⁴რადგან არ მიატოვებს უფალი თავის ხალხს და თავის სამკვიდროს არ დატოვებს.

¹⁵რადგან სიმართლე დაუბრუნდება სამართალს და მას გაჰყვებიან გულმართალნი.

¹⁶ჩემ გამო ვინ აღუდგება ბოროტმოქმედებს? მხარში ვინ ამომიდგება სიავის მქმნელთა წინააღმდეგ?

¹⁷უფალი რომ არ დამხმარებოდა, ცოტაც და, დასახლდებოდა ჩემი სული დუმილის ქვეყანაში.

¹⁸როდესაც ვთქვი: მომიცურდა-მეთქი ფეხი, შენმა წყალობამ გამამაგრა უფალო.

¹⁹როცა საზრუნავით მევსება გული, შენი ნუგეში ამხიარულებს ჩემს სულს.

²⁰ნუთუ შეკრავს შენთან კავშირს უკუღმართობის ტახტი, შენი რჯულის საწინააღმდეგოდ რომ სჩადის უსამართლობას?

²¹ილაშქრებენ მართლის სულზე და მსჯავრს დასდებენ უდანაშაულო სისხლს,

²²მაგრამ უფალია ჩემი სიმაგრე, ღმერთია ჩემი თავშესაფრის კლდე.

²³მათ დაუბრუნებს მათივე დანაშაულს და მათივე ბოროტებისთვის მოსპობს მათ; უფალი, ჩვენი ღმერთი მოსპობს მათ.