Read Traducción Kadosh Israelita Mesiánica იგავნი სოლომონისა 1 Bible Online

იგავნი სოლომონისა 1 - Traducción Kadosh Israelita Mesiánica bible

იგავნი სოლომონისა 1

¹იგავნი სოლომონისა, დავითის, ისრაელის მეფის ძისა.

²სიბრძნისა და დარიგების შესაცნობად, გონივრული ნათქვამის გასაგებად;

³ბრძნული დარიგების, სიმართლის, სამართლისა და სამართლიანობის მისაღებად;

⁴გულუბრყვილოთათვის საზრიანობის, ხოლო ყმაწვილთათვის ცოდნისა და განსჯის უნარის მისაცემად.

⁵მოისმენს ბრძენი და ცოდნას გაიმრავლებს, გონიერი და - დაკვალიანდება;

⁶იგავის, ქარაგმის, ბრძენთა სიტყვებისა და არაკების გასაგებად.

⁷უფლის შიში ცოდნის სათავეა, ბრიყვებს კი სძულთ სიბრძნე და დარიგება.

⁸ისმინე შვილო, მამაშენის დარიგება და დედაშენის სწავლებას ნუ მიატოვებ.

⁹რადგან ეს მშვენიერი გვირგვინია შენს თავზე და სამკაული შენს ყელზე.

¹⁰შვილო, თუ შეეცდებიან ცოდვილნი შენს შეცდენას, ნუ დაჰყვები მათ ნებას.

¹¹რომ გითხრან: წამოგვყევი, ჩავუსაფრდეთ სისხლის დასაღვრელად, უდანაშაულოს უმიზეზოდ დავუდარაჯდეთ,

¹²ქვესკნელივით ჩავყლაპოთ ისინი, ცოცხლად და მთლიანად, სამარეში ჩამსვლელთა მსგავსად,

¹³ყოველგვარ ძვირფასეულობას მოვიპოვებთ, ნადავლით ავივსებთ სახლებს,

¹⁴ჩვენთან იყარე წილი, ერთი ქისა გვექნება ჩვენ ყველასო!

¹⁵შვილო, ნუ ივლი მათ გზაზე, აარიდე ფეხი მათ გზასავალს,

¹⁶რადგან მათი ფერხნი ბოროტების ჩასადენად გარბიან და სისხლის საღვრელად ისწრაფიან;

¹⁷ვინაიდან, ამაოებაა ფრინველის თვალწინ ბადის გაშლა;

¹⁸ხოლო ისინი საკუთარი სისხლის საღვრელად საფრდებიან და თავიანთი სიცოცხლის წასაგებად დარაჯობენ.

¹⁹ასეთია გზა ყველა ძალადობით მომხვეჭელისა, სიცოცხლეს ართმევს მის პატრონს*.

²⁰სიბრძნე ქუჩაში გასძახის, მოედნებზე იმაღლებს ხმას.

²¹ხალხმრავალ ადგილებში ღაღადებს, კარიბჭესთან, ქალაქში ამბობს თავის სათქმელს:

²²"როდემდე გეყვარებათ მიამიტნო გულუბრყვილობა? როდემდე დატკბებით დაცინვით დამცინავნო? როდემდე გეძულებათ ცოდნა ბრიყვებო?

²³მიუბრუნდით ჩემს შეგონებებს; აჰა, ჩემს სულს გადმოვღვრი თქვენზე, გამოგიცხადებთ ჩემს სიტყვებს.

²⁴რადგან გიხმობდით და უარმყოფდით, ხელს ვიწვდენდი და არავინ ისმენდით;

²⁵უკუაგდეთ ჩემი რჩევები; ყური არ ათხოვეთ ჩემს შეგონებებს.

²⁶მეც გავიცინებ თქვენს უბედურებაზე და დაგცინებთ, როცა აგიტანთ ძრწოლა.

²⁷როცა ქარიშხალივით მოგეწევათ, რისიც გეშინოდათ და გრიგალივით დაგატყდებათ უბედურება, როცა ჩაცვივდებით განსაცდელსა და გაჭირვებაში.

²⁸მაშინ მომიხმობენ და არ ვუპასუხებ, ძიებას დამიწყებენ, მაგრამ ვერ მიპოვიან.

²⁹რადგან ცოდნა სძულდათ და უფლის შიში არ აირჩიეს,

³⁰არ მიიღეს ჩემი რჩევა და მოიძულეს ჩემი ყველა შეგონება.

³¹იგემებენ თავიანთი გზების ნაყოფიდან და მათივე ბოროტი ზრახვებით დანაყრდებიან.

³²ვინაიდან გულუბრყვილოებს განდგომილება მოკლავს და ბრიყვებს - არხეინობა;

³³ხოლო ვინც მომისმენს, მშვიდად იცხოვრებს და ბოროტების შიშის გარეშე მოისვენებს”.