Read Traducción Kadosh Israelita Mesiánica იგავნი სოლომონისა 10 Bible Online

იგავნი სოლომონისა 10 - Traducción Kadosh Israelita Mesiánica bible

იგავნი სოლომონისა 10

¹იგავნი სოლომონისა: ბრძენი შვილი მამას ახარებს, უგუნური შვილი კი დედის დარდია.

²სარგებელი არ მოაქვს ბოროტებით მოხვეჭილ საგანძურს, სიმართლე კი სიკვდილისგან გიხსნის.

³არ დაამშევს მართალ კაცს უფალი, უკეთურთა გულისწადილს კი ხელს კრავს.

⁴ზარმაცი ხელი აღარიბებს, გამრჯე ხელი ამდიდრებს.

⁵ზაფხულში შემგროვებელი ჭკვიანი შვილია, მკის დროს მძინარე - შემარცხვენელი.

⁶მართლის თავზე კურთხევაა, ბოროტეულთა პირს კი ძალადობა დაფარავს.

⁷კურთხეულია მართლის სახსენებელი, ბოროტეულთა სახელი კი დალპება.

⁸გულბრძენი მცნებებს მიიღებს, ხოლო ბაგეუგუნური დაეცემა.

⁹უმწიკვლოდ მოარული უსაფრთხოდ დადის, ხოლო თავისი გზის გამამრუდებელი გამომჟღავნდება.

¹⁰თვალის ჩამკვრელი ტკივილს იწვევს და ბაგეუგუნური დაეცემა.

¹¹მართლის პირი სიცოცხლის წყაროა, ბოროტეულთა პირს კი ძალადობა დაფარავს.

¹²სიძულვილი განხეთქილებას აღვივებს, სიყვარული კი ყველა დანაშაულს ფარავს.

¹³ბოროტისა და კეთილის განმასხვავებლის ბაგეებში სიბრძნე იპოვება, უგუნურის ზურგზე კი - ჯოხი.

¹⁴ბრძენნი ცოდნას აგროვებენ, სულელის პირი კი დაღუპვასთანაა ახლოს.

¹⁵მდიდრის ქონება მისი მტკიცე ქალაქია, ღარიბთა სიღატაკე კი მათი ნანგრევები.

¹⁶მართლის შრომას სიცოცხლე მოაქვს, ბოროტეულთა ნაყოფი კი ცოდვაა.

¹⁷დარიგების შემნახველი სიცოცხლის ბილიკით დადის, შეგონების წამყრუებელი კი გზას ასცდა.

¹⁸სიძულვილის დამმალავს ცრუ ბაგეები აქვს; ჭორის გამავრცელებელი ბრიყვია.

¹⁹ვინც ბევრს ლაპარაკობს, ცოდვას ვერ ასცდება, თავისი ენის მომთოკველი კი ბრძენია.

²⁰მართლის ენა რჩეული ვერცხლია, ბოროტეულის გული კი არად ფასობს.

²¹მართლის ბაგენი მრავალს მწყემსავენ, სულელნი კი თავის უგუნურებაში იხოცებიან.

²²უფლის კურთხევაა, რომ ამდიდრებს და დარდი არ მოყვება მას.

²³ბრიყვის გართობა ბოროტის ქმნაშია, ხოლო გონიერი კაცისა - სიბრძნეში.

²⁴უკეთურს ის შეემთხვევა, რისაც ეშინია, მართალს კი საწადელი აუსრულდება.

²⁵გადაივლის ქარიშხალი და აღარ არის უკეთური, მართლის საძირკველი კი საუკუნოა.

²⁶რაც ძმარია კბილებისთვის და კვამლი თვალებისთვის, იგივეა ზარმაცი კაცი მისი წარმგზავნელისთვის.

²⁷უფლის შიში სიცოცხლეს ახანგრძლივებს, ბოროტეულთა წლები კი შემოკლდება.

²⁸მართალთა სასოება სიხარულია, ბოროტეულთა იმედი კი მოისპობა.

²⁹უფლის გზა სიმაგრეა უბიწოთათვის, სიავის ჩამდენთათვის კი განადგურება.

³⁰საუკუნოდ არ შეირყევა მართალი, ბოროტეული კი ვერ დამკვიდრდება ქვეყანაზე.

³¹მართლის პირიდან სიბრძნე მოედინება, უკუღმართი ენა კი მოიკვეთება.

³²მართლის ბაგეთ სიკეთე მოაქვს, უკეთურისას კი უკუღმართობა.