Read Traducción Kadosh Israelita Mesiánica იგავნი სოლომონისა 13 Bible Online

იგავნი სოლომონისა 13 - Traducción Kadosh Israelita Mesiánica bible

იგავნი სოლომონისა 13

¹ბრძენი შვილი მამის წვრთნას ღებულობს, ბრიყვი კი საყვედურს არ ისმენს.

²თავის პირის ნაყოფთაგან იგემებს კაცი სიკეთეს, მოღალატეთა წადილი კი ძალადობაა.

³ვინც თავის ბაგეს უფრთხილდება, თავის სიცოცხლეს იცავს; ბაგემორღვეულს კი განადგურება მოელის.

⁴ზარმაცის სულს სწადია და არა აქვს, ბეჯითთა სული კი დამსუყდება.

⁵მართალს სძულს სიყალბე, უკეთური კი სამარცხვინოდ და უღირსად იქცევა.

⁶უბიწო გზით მავალს სიმართლე იცავს, ცოდვილს კი ბოროტება ღუპავს.

⁷ზოგი მდიდრად აჩვენებს თავს და - არაფერი არა აქვს, ზოგი კი ღარიბად - და დიდი ქონება აქვს.

⁸ადამიანის სიცოცხლის გამოსასყიდი მისი სიმდიდრეა, ღარიბი კი მუქარასაც არ მოისმენს.

⁹მართალთა სინათლე კაშკაშებს, ბოროტთა ლამპარი კი ჩაქრება.

¹⁰ქედმაღლობასა და თავხედობას მხოლოდ შეხლა-შემოხლა მოსდევს, რჩევის მძებნელთ კი სიბრძნე აქვთ.

¹¹არაკეთილსინდისიერად შეძენილი ქონება დაილევა, შრომით შემგროვებელი კი ამრავლებს მას.

¹²გაცრუებული იმედი გულს ასნეულებს, ასრულებული წადილი კი სიცოცხლის ხეა.

¹³სიტყვის აბუჩად ამგდები თავს იზიანებს, მცნების მოშიშს კი საზღაური ელის.

¹⁴ბრძენისგან დამოძღვრა სიცოცხლის წყაროა, სიკვდილის მახეების ამრიდებელი.

¹⁵კეთილგონიერება წყალობას გაპოვნინებს, მოღალატეთა გზა კი მძიმეა.

¹⁶ყოველი გონიერი ცოდნით მოქმედებს, რეგვენი კი სიბრიყვეს ავლენს.

¹⁷უკეთური მაცნე ჭირში ვარდება, ერთგულ დესპანს კი კურნება მოაქვს.

¹⁸დარიგების უგულებელმყოფელს სიღარიბე და სირცხვილი მოელის, მხილების გამგონე კი პატივდებული იქნება.

¹⁹ტკბილია სულისთვის ასრულებული წადილი, უგუნურთათვის კი სისაძაგლეა ბოროტებისგან განდგომა.

²⁰ბრძენკაცებთან მავალი დაბრძენდება, რეგვენთა მეგობარი კი ზიანს განიცდის.

²¹ცოდვილთ ბოროტება დასდევს, მართალთ კი სიკეთე მიეზღვებათ.

²²კეთილი კაცი შვილიშვილებს მემკვიდრეობას უტოვებს, ცოდვილის ქონება კი მართლისთვის ინახება.

²³ღარიბი კაცის დაუმუშავებელ მიწაზეც შეიძლება უხვი საზრდო მოვიდეს, მაგრამ უსამართლობის გამო აღიგვება.

²⁴წკეპლის დამზოგავს სძულს თავისი ძე, შვილის მოყვარული კი გულმოდგინედ წვრთნის მას.

²⁵მართალი ძღომამდე ჭამს, ბოროტეულთა მუცელს კი მუდამ შია.