Read Traducción Kadosh Israelita Mesiánica იგავნი სოლომონისა 15 Bible Online

იგავნი სოლომონისა 15 - Traducción Kadosh Israelita Mesiánica bible

იგავნი სოლომონისა 15

¹ტკბილი პასუხი მიაქცევს გულისწყრომას, შეურაცხმყოფელი სიტყვა კი რისხვას ანთებს.

²ბრძენთა ენა ცოდნას მიმზიდველს ხდის, ბრიყვთა პირი კი სისულელეს აფრქვევს.

³ყველგანაა უფლის თვალები, ხედავს ბოროტთა და კეთილთ.

⁴მშვიდი ენა სიცოცხლის ხეა, მზაკვრული კი სულს მუსრავს.

⁵ბრიყვი უარყოფს მამის შეგონებას, მხილების შემსმენი კი გონიერდება.

⁶მართლის სახლში დიდი განძია, უკეთურის მონახვეჭში კი გასაჭირი.

⁷ბრძენთა ბაგენი ცოდნას ავრცელებენ, ბრიყვთა გონებას კი ეს არ შეუძლია.

⁸უფლისთვის ბოროტეულის მსხვერპლი სისაძაგლეა, წრფელთა ლოცვა კი საამურია მისთვის.

⁹უფლის წინაშე სისაძაგლეა უკეთურის გზა, სიმართლის მიმდევარი კი უყვარს.

¹⁰მკაცრი სასჯელი ელის სწორი გზის მიმტოვებელს; მხილების მოძულე მოკვდება.

¹¹უფლის წინაშე ქვესკნელი და ჯოჯოხეთია გაშიშვლებული, მით უმეტეს ადამის შვილთა გულები.

¹²დამცინავს არ უყვარს თავისი მამხილებელი, ბრძენთან არ წავა იგი.

¹³მხიარული გული სახესაც ამხიარულებს, გულის წუხილისას კი სული შემუსრულია.

¹⁴კეთილგონიერის გული ცოდნას ეძიებს, ბრიყვის პირი კი სისულელით იკვებება.

¹⁵ავია ჩაგრულის ყოველი დღე, მხიარულ გულს კი მუდამ ლხინი აქვს.

¹⁶მცირედი სჯობია უფლისმოშიშებაში, ვიდრე დიდი საუნჯე შფოთვაში.

¹⁷სჯობს გქონდეს ბოსტნეულის სადილი და სიყვარული, ვიდრე ნასუქალი ხარი და სიძულვილი მასთან ერთად.

¹⁸ფიცხი კაცი შუღლს აღვივებს, სულგრძელი კი აცხრობს დავას.

¹⁹ზარმაცის გზა ეკლიანი ღობესავითაა, წრფელთა გზა კი მოსწორებულია.

²⁰ბრძენი შვილი მამას ახარებს, უგუნურს კი სძულს საკუთარი დედა.

²¹ბრიყვის სიხარული უგუნურებაა, გონიერი კაცი კი სწორი გზით დადის.

²²რჩევის გარეშე განზრახვა იშლება, ბევრი მრჩევლისას კი სრულდება.

²³კაცის სიხარული მისი ბაგეების პასუხშია; კარგია თავის დროზე ნათქვამი სიტყვა.

²⁴ბრძენის ცხოვრების გზა აღმავალია, რათა დაბლა ქვესკნელს განერიდოს.

²⁵ამპარტავანთა სახლს უფალი დაანგრევს, ქვრივის საზღვარს კი განამტკიცებს.

²⁶საძაგელია უფლისთვის ბოროტის ზრახვანი, წრფელი სიტყვები კი სასიამოვნო.

²⁷მტაცებლობით მომხვეჭელი თავის სახლს აპარტახებს, ქრთამის მოძულე კი იცოცხლებს.

²⁸დაფიქრდება მართლის გული სანამ უპასუხებს, ბოროტთა პირი კი სიავეს აფრქვევს.

²⁹შორსაა უკეთურთაგან უფალი, მართალთა ლოცვას კი ისმენს.

³⁰ნათელი თვალები გულს ახარებს და კარგი ამბავი ძვლებს აპოხიერებს.

³¹სასიცოცხლო მხილების შემსმენი ყური ბრძენთა შორის გაათევს ღამეს.

³²დარიგების უარმყოფელს სძულს საკუთარი თავი, შეგონების შემსმენი კი საზრიანობას იხვეჭს.

³³უფლის შიში სიბრძნეს ასწავლის კაცს; და დიდებას წინ მორჩილება უსწრებს.