Read Traducción Kadosh Israelita Mesiánica იგავნი სოლომონისა 16 Bible Online

იგავნი სოლომონისა 16 - Traducción Kadosh Israelita Mesiánica bible

იგავნი სოლომონისა 16

¹გულის ზრახვები კაცს ეკუთვნის, ენის პასუხი კი უფლისგან მოდის.

²კაცის ყველა გზა სუფთაა მის თვალში, მაგრამ უფალი სწონის სულებს.

³უფალს მიანდე შენი საქმეები და შენი გეგმები განმტკიცდება.

⁴უფალმა ყველაფერი თავისი მიზნისთვის შექმნა, ბოროტეულიც კი - ავი დღისთვის.

⁵ყველა გულით ამაყი საძაგელია უფლისთვის, უსათუოდ დაუსჯელი ვერ გადარჩება ასეთი.

⁶წყალობითა და ჭეშმარიტებით გამოისყიდება დანაშაული, უფლის შიშით განერიდებიან ბოროტებას.

⁷როდესაც მოსაწონია უფლისათვის კაცის გზები, მტერთანაც კი შეარიგებს მას.

⁸სჯობს სიმართლით მცირედი, უმართლობით მოხვეჭილ დიდ შემოსავალს.

⁹კაცი თავის გულში გეგმავს გზას, ნაბიჯებს კი უფალი წარუმართავს.

¹⁰ღვთიური განაჩენია მეფის ბაგეზე, განკითხვისას არ უნდა უმართლობდეს მისი პირი.

¹¹მართალი სასწორი და საწყაო აქვს უფალს, მისი შექმნილია აბგის ყველა საწონი.

¹²სისაძაგლეა მეფეთათვის უკანონობის ქმნა, რადგან სიმართლით განმტკიცდება ტახტი.

¹³მოსაწონია მეფეთათვის მართალი ბაგენი და უყვართ მათ წრფელად მოლაპარაკენი.

¹⁴სიკვდილის მაუწყებელია მეფის რისხვა, ბრძენი კი დააცხრობს მას.

¹⁵მეფის ხალას მზერაში სიცოცხლეა, მისი კეთილგანწყობა კი გაზაფხულის წვიმის ღრუბელივითაა.

¹⁶სიბრძნის შეძენა ოქროზე ბევრად უკეთესია, გონიერების შეძენა - რჩეულ ვერცხლზე უმჯობესი.

¹⁷წრფელთა გზა ბოროტებისგან განშორებაა, თავისი გზის დამცველი სიცოცხლეს უფრთხილდება.

¹⁸დაღუპვას წინ სიამაყე უძღვის, დაცემას - ქედმაღლობა.

¹⁹ჯობია თავმდაბლობის სული გქონდეს და მდაბიოებთან იყო, ვიდრე ამაყებთან იყოფდე ნადავლს.

²⁰საქმის გონივრულად მკეთებელი სიკეთეს ჰპოვებს; ნეტარია უფალზე დაიმედებული.

²¹გულით ბრძენს გონიერს უწოდებენ, ტკბილი საუბარი დამაჯერებლობას მატებს.

²²გონიერება სიცოცხლის წყაროა მისი პატრონისთვის, უგუნურთა შეგონება კი სისულელეა.

²³ბრძენის გული გონიერს ხდის მის პირს და მის ბაგეთ ცოდნას მატებს.

²⁴სასიამოვნო სიტყვები გოლეული თაფლივითაა, ტკბილი - სულისთვის და კურნება - ძვლებისთვის.

²⁵არის გზა, რომელიც სწორი ჩანს კაცის წინაშე, მისი ბოლო კი სიკვდილია.

²⁶მშრომელს თავისი მადა აშრომებს, შიმშილი უბიძგებს შრომისკენ.

²⁷უღირსი კაცი სიავეს განიზრახავს, მწველი ცეცხლივითაა მისი სიტყვები.

²⁸უკუღმართი კაცი განხეთქილებას თესავს, ცილისმწამებელი მეგობრებს აშორებს.

²⁹მოძალადე მოყვასს აცდუნებს და უკეთურ გზაზე ატარებს.

³⁰ვინც თვალებს ჭუტავს უკუღმართობას განიზრახავს, ვინც ბაგეს იკვნეტს ბოლომდე მიჰყავს ბოროტი ზრახვები.

³¹ჭაღარა, დიდების გვირგვინია, სიმართლის გზაზე იპოვება იგი.

³²რისხვაში ნელი მამაცს სჯობია, საკუთარი თავის მმართველი კი ქალაქის ამღებს.

³³წილს კალთაში ყრიან, მაგრამ ყველა განაჩენი უფლისგან მოდის.