Read Traducción Kadosh Israelita Mesiánica იგავნი სოლომონისა 18 Bible Online

იგავნი სოლომონისა 18 - Traducción Kadosh Israelita Mesiánica bible

იგავნი სოლომონისა 18

¹თავნება კაცი თავის სურვილებს მიჰყვება და ყოველგვარ საღ აზრს ეწინააღმდეგება.

²ბრიყვს გონიერება კი არ ეამება, არამედ მხოლოდ თავისი აზრის - გამხელა.

³მოვა ბოროტი კაცი და მოჰყვება სიძულვილი, უღირსობას კი შერცხვენა მოჰყვება.

⁴კაცის პირის სიტყვები ღრმა წყლებია, სიბრძნის წყარო - მოჩუხჩუხე ნაკადული.

⁵არ არის კარგი დამნაშავესადმი მიმხრობა, არც მართლის გამტყუნება სამსჯავროზე.

⁶ბრიყვის ბაგეები დავას იწვევს და მისი პირი დასარტყმელად მოუწოდებს.

⁷ბრიყვს თავისი პირი ღუპავს, მისი ბაგეები მისივე სულის მახეა.

⁸ჭორის გამავრცელებლის სიტყვები ნუგბარივითაა, მუცლის სიღრმემდე აღწევენ.

⁹თავის საქმეში დაუდევარი დამაქცევლის ძმაა.

¹⁰უფლის სახელი მყარი კოშკია; მასში შერბის მართალი და დაცულია.

¹¹მდიდრის ქონება მისი მტკიცე ქალაქია და მაღალი გალავანივითაა მის თვალში.

¹²დაცემას წინ ქედმაღლობა უსწრებს, დიდებას - თავმდაბლობა.

¹³მოსმენამდე პასუხის გაცემა სიბრიყვეა და სირცხვილი.

¹⁴კაცის სულს სნეულების ატანა შეუძლია, მაგრამ ვინ აიტანს შემუსვრილ სულს?

¹⁵გონიერის გული ცოდნას იძენს და ბრძენის ყური ცოდნას ეძიებს.

¹⁶ძღვენი გზას უფართოებს კაცს და დიდკაცთა წინაშე მიჰყავს.

¹⁷თითქოს მართალია დავის წამომწყები, მაგრამ მოდის მისი მოსარჩლე და გამოიძიებს მას.

¹⁸წილისყრა ბოლოს უღებს დავას და აშველებს ძლიერებს.

¹⁹განაწყენებული ძმა გამაგრებულ ქალაქზე მიუდგომელია და უთანხმოებანი ციხე-სიმაგრის ურდულებს ჰგავს.

²⁰კაცის მუცელი მისი პირის ნაყოფით გაძღება, თავის ბაგეთა მოსავლით გაძღება იგი.

²¹სიკვდილ-სიცოცხლე ენის ხელშია და მისი მოყვარულნი შეჭამენ მის ნაყოფს.

²²ვინც ცოლი ჰპოვა, სიკეთე ჰპოვა და უფლის კეთილგანწყობა მოიხვეჭა.

²³ღარიბი ვედრებით ლაპარაკობს, მდიდარი კი უკმეხად პასუხობს.

²⁴არიან მეგობრები, ერთმანეთს რომ მტრობენ, მაგრამ არის მეგობარი - ძმაზე უფრო ახლობელი.