Read Traducción Kadosh Israelita Mesiánica იგავნი სოლომონისა 20 Bible Online

იგავნი სოლომონისა 20 - Traducción Kadosh Israelita Mesiánica bible

იგავნი სოლომონისა 20

¹ღვინო მასხრად აგიგდებს, მაგარი სასმელი შფოთს აგატეხინებს; ვინც მათ ეტანება უგუნურია.

²მეფის რისხვა ლომის ბრდღვინვასავითაა, მისი განმარისხებელი თავს საფრთხეში იგდებს.

³დავისგან თავშეკავება კაცის ღირსებაა, ყველა ბრიყვი კი შფოთის ამტეხია.

⁴ზარმაცს ზამთარში ხვნა ეზარება; მკის დროს მოიკითხავს და არაფერი ექნება.

⁵კაცის გულის ზრახვა ღრმა წყალია, გონიერი კაცი კი ამოზიდავს მას.

⁶ბევრს მოაქვს თავი ერთგულ ადამიანად, მაგრამ სანდო კაცს ვინ იპოვის?

⁷მართალი თავის უბიწობით დადის, ნეტარნი არიან მისი ძენი მის შემდეგ.

⁸მსაჯულის ტახტზე მჯდომი მეფე თავისი თვალებით ფანტავს ბოროტებას.

⁹ვინ იტყვის: გული გავისუფთავე, განწმედილი ვარო ჩემი ცოდვისგან?

¹⁰მრუდე საწონი, მრუდე საზომი - ერთიც და მეორეც სისაძაგლეა უფლისთვის.

¹¹ბავშვიც კი იცნობა თავისი საქციელით, სუფთა და მართალი თუა მისი ნამოქმედარი.

¹²მსმენელი ყური და მხილველი თვალი - ერთიც და მეორეც უფალმა შექმნა.

¹³ძილს ნუ შეიყვარებ, თორემ გაღარიბდები; გაახილე თვალები და პურით გაძღები.

¹⁴არ ვარგა, არ ვარგაო - ამბობს მყიდველი; მაგრამ წავა და ნავაჭრით ტრაბახობს.

¹⁵არის ოქრო და მრავალი მარგალიტი, მაგრამ ძვირფასი სამკაული - გონიერი ბაგეებია.

¹⁶აიღე მისი სამოსელი, რადგან უცხოს უდგება თავდებად. უცხოს წილად გამოართვი გირაო.

¹⁷ტკბილია კაცისთვის სიცრუის პური, მერე კი ღორღით გაევსება პირი.

¹⁸ყველა გეგმა რჩევით მტკიცდება; ბრძნული მითითებით წარმართე ომი.

¹⁹დაიარება ცილისმწამებელი და საიდუმლოს ამხელს; ჭორიკანას ნუ დაუახლოვდები.

²⁰დედ-მამის მაწყევარს უკუნეთ სიბნელეში ჩაუქრება ლამპარი.

²¹სწრაფად შეძენილი ქონება, საბოლოოდ კურთხეული არ იქნება.

²²ნუ იტყვი: მივაგებო ბოროტის სანაცვლოდ; უფალს დაელოდე და ის გიხსნის.

²³სისაძაგლეა უფლისთვის ორგვარი საწონი, მატყუარა სასწორი არ არის კარგი.

²⁴ადამიანს უფალი წარუმართავს ნაბიჯებს, როგორღა გაიგოს კაცმა თავისი გზა-კვალი?

²⁵კაცისთვის მახეა რაიმეს ნაჩქარევად შერაცხვა ‘წმიდად’ და აღთქმის დადების შემდეგ დაფიქრება.

²⁶გაფანტავს ბოროტეულთ ბრძენი მეფე და კევრით გალეწავს მათ.

²⁷უფლის ლამპარია კაცის სული, მთელი მისი წიაღის გამომკვლეველი.

²⁸წყალობა და ჭეშმარიტება იცავს მეფეს, სიმართლით განამტკიცებს თავის ტახტს.

²⁹ჭაბუკთა მშვენება მათი ძალაა, მოხუცთა ღირსება კი - მათი ჭაღარა.

³⁰ბოროტისგან განწმენდს მათრახით მიყენებული ჭრილობები და დარტყმები - შიგანს რომ წვდება.