Read Traducción Kadosh Israelita Mesiánica იგავნი სოლომონისა 21 Bible Online

იგავნი სოლომონისა 21 - Traducción Kadosh Israelita Mesiánica bible

იგავნი სოლომონისა 21

¹მეფის გული წყლის ნაკადია უფლის ხელში, საითაც მოისურვებს, იქით მიუშვებს.

²კაცის ყველა გზა მართებულია მის თვალში, მაგრამ უფალი გულებს სწონის.

³სიმართლისა და სამართლის ქმნა მსხვერპლზე სასურველია უფლისთვის.

⁴ზვიადი თვალები და ამაყი გული - უკეთურთა ლამპარი და ცოდვაა.

⁵ბეჯითის ზრახვანი მხოლოდ მატებისკენაა, დაუდევარი კი გაღატაკდება.

⁶მატყუარა ენით სიმდიდრის მოხვეჭა წარმავალი ორთქლია და სიკვდილის მახე.

⁷უმართლოთა ძალადობა მათვე მიუბრუნდება, ვინაიდან სამართლის ქმნა უგულებელჰყვეს.

⁸მრუდეა უმართლოს გზა, სუფთა კაცი კი პირდაპირია მოქმედებაში.

⁹ერდოს კუთხეში ცხოვრება სჯობს, ანჩხლ ქალთან ერთ ჭერქვეშ ყოფნას.

¹⁰ბოროტი სწადია უმართლოს გულს, წყალობას ვერ ჰპოვებს მის თვალში მოყვასი.

¹¹დამცინავის დასჯისას გულუბრყვილო გონიერდება ბრძენი კი შეგონებით იძენს ცოდნას.

¹²აკვირდება მართალი უმართლოს სახლს, როგორ ეცემა და ნადგურდება.

¹³ვინც ყურს მოიყრუებს ღარიბის ღაღადზე, თვითონაც მოუხმობს ერთ დღეს და არავინ უპასუხებს.

¹⁴ფარულად მიძღვნილი საჩუქარი რისხვას აცხრობს და ქრთამი უბეში - ძლიერ გულისწყრომას.

¹⁵სიმართლის ქმნა - სიხარულია მართლისთვის და შიშის ზარი - ბოროტის მქმნელისთვის.

¹⁶გონიერების გზიდან გადავარდნილი ადამიანი მკვდართა კრებულში დაისვენებს.

¹⁷სიამეთა მოყვარული გაჭირვებაში იქნება, ღვინისა და ზეთის მოყვარული ვერ გამდიდრდება.

¹⁸ბოროტეული მართლის გამოსასყიდია, მოღალატე კი - გულწრფელისა.

¹⁹უდაბურ მიწაზე ცხოვრება სჯობს, ანჩხლ და ბრაზიან ქალთან ყოფნას.

²⁰სანუკვარი განძი და ზეთია ბრძენის სახლში, ბრიყვი კაცი კი შთანთქავს მათ.

²¹სიმართლისა და მოწყალების მიმდევარი სიცოცხლეს, სიმართლესა და პატივს ჰპოვებს.

²²ძლიერთა ქალაქს დაიპყრობს ბრძენი და დაანგრევს მის საიმედო სიმაგრეს.

²³ვინც თავის ბაგესა და ენას უფრთხილდება უბედურებისგან იცავს თავის თავს.

²⁴ამაყი, ქედმაღალი და დამცინავია მისი სახელი, ვინც ამპარტავნულად მოქმედებს.

²⁵ზარმაცს საკუთარი სიხარბე კლავს, რადგან მისი ხელები უარს ამბობენ მუშაობაზე;

²⁶მთელ დღეს ხარბად სწადია რაღაც, მართალი კი გასცემს და არ ზოგავს.

²⁷უკეთურთა მსხვერპლი სისაძაგლეა, მით უმეტეს, თუ ცბიერებით მოაქვს იგი.

²⁸ცრუ მოწმე მოიკვეთება, ჭეშმარიტების გამგონი კაცი კი მუდამ ილაპარაკებს.

²⁹ბოროტი კაცი სახეს ისასტიკებს, მართალი კი თავის გზას აკვირდება.

³⁰არ არსებობს სიბრძნე, გონება და რჩევა, უფალს რომ დაუპირისპირდეს.

³¹ცხენს ბრძოლის დღისთვის ამზადებენ, მაგრამ გამარჯვება უფლისგანაა.