Read Traducción Kadosh Israelita Mesiánica იგავნი სოლომონისა 23 Bible Online

იგავნი სოლომონისა 23 - Traducción Kadosh Israelita Mesiánica bible

იგავნი სოლომონისა 23

¹როცა მთავართან დაჯდები სადილად, კარგად დააკვირდი, რა არის შენს წინ;

²და ყელზე დანა მიიბჯინე, თუ მსუნაგი ხარ.

³ნუ მოისურვებ მის ნუგბარს, ვინაიდან მაცდურია ის პური.

⁴ძალღონეს ნუ შეალევ სიმდიდრის შეძენას, შეეშვი ამაზე ფიქრს.

⁵მიაპყრობ თვალებს და აღარ არის; არწივივით ფრთებს შეისხამს და ცად აფრინდება.

⁶ძუნწი კაცის პურს ნუ შეჭამ და მის ნუგბარს ნუ ისურვებ,

⁷რადგან როგორც გულში ფიქრობს, ისეთია იგი: ჭამე და სვიო გეტყვის, მისი გული კი შენთან არ იქნება.

⁸ნაჭამ ლუკმას ამოარწყევ და ამაოდ დახარჯავ თავაზიან სიტყვებს.

⁹ბრიყვის გასაგონად ნუ ილაპარაკებ, რადგან აბუჩად აიგდებს შენს გონივრულ სიტყვებს.

¹⁰ნურც ძველ საზღვარს გადასცდები და ნურც ობოლთა მინდვრებზე გადახვალ,

¹¹ვინაიდან ძლიერია მათი გამომსყიდველი, ის შეგედავება მათ საქმეზე.

¹²გული შენი დარიგებას მიაპყარ და ყური შენი - ცოდნის სიტყვებს.

¹³წვრთნას ნუ დაუკავებ ყმაწვილს, წკეპლაც რომ მოსცხო, არ მოკვდება;

¹⁴წკეპლით სცემ მას და შავეთისგან იხსნი მის სულს.

¹⁵შვილო, თუ გული დაგიბრძენდება, ჩემი გულიც გაიხარებს;

¹⁶ჩემი შინაგანიც გამხიარულდება, როდესაც სიმართლეს ილაპარაკებენ შენი ბაგენი.

¹⁷ნურც ცოდვილებისა შეშურდება შენს გულს, არამედ უფლის შიში გქონდეს მუდამ,

¹⁸რადგან არსებობს მომავალი და შენი იმედი არ მოისპობა.

¹⁹შვილო, ისმინე და დაბრძენდი; მიმართე შენი გული სწორ გზაზე.

²⁰ნურც ღვინის მსმელთა და ხორცით გაუმაძღართა შორის იქნები;

²¹ვინაიდან გაღატაკდება ლოთი და ღორმუცელა, თვლემა კი ძონძებით შემოსავს მათ.

²²უსმინე მამაშენს, რომელმაც გაგაჩინა და ნუ მოიძულებ დედაშენს, როცა მოხუცდება.

²³ჭეშმარიტება იყიდე და ნუ გაყიდი, შეიძინე სიბრძნე, დარიგება და გონიერება.

²⁴ლხენით ილხენს მართლის მამა და ბრძენის მშობელი იხარებს მისით.

²⁵გაიხარონ მამაშენმა და დედაშენმა; მოილხინონ შენმა მშობლებმა.

²⁶შვილო, მე მომეცი შენი გული და შენმა თვალებმა ჩემი გზები დაიცვან.

²⁷ვინაიდან ღრმა ორმოა მეძავი და ვიწრო ჭა - უცხო ქალი.

²⁸ყაჩაღივითაა ჩასაფრებული და კაცთა შორის ორგულებს ამრავლებს.

²⁹ვინ ოხრავს და ვინ წუხს? ვინ დაობს და ვინ ჩივის? ვისა აქვს უმიზეზოდ ჭრილობები და ვისა აქვს ჩაწითლებული თვალები?

³⁰ვინც გვიანობამდე უზის ღვინოს, ვინც შეზავებული ღვინის საჭაშნიკოდ დადის.

³¹ნუ უყურებ ღვინის სიწითლეს, ფიალაში რომ ელვარებს და ლაღად გადადის ყელში.

³²ბოლოს გველივით იკბინება და ასპიტივით იგესლება.

³³შენს თვალებს უცნაურობანი მოელანდება და შენი გული უკუღმართად ილაპარაკებს.

³⁴და იქნები ზღვის შუაგულსა და ანძის წვერზე მძინარესავით.

³⁵იტყვი: "მცემდნენ და არ მტკიოდა! მირტყამდნენ და ვერ ვგრძნობდი! გავიღვიძებ და ისევ სასმელს დავუწყებ ძებნას”.