Read Traducción Kadosh Israelita Mesiánica იგავნი სოლომონისა 24 Bible Online

იგავნი სოლომონისა 24 - Traducción Kadosh Israelita Mesiánica bible

იგავნი სოლომონისა 24

¹ბოროტი ადამიანების ნუ შეგშურდება და მათთან ყოფნას ნუ ისურვებ,

²რადგან ძალადობას განიზრახავს მათი გული და ბოროტებაზე ლაპარაკობენ მათი ბაგეები.

³სიბრძნით შენდება სახლი და გონიერებით მტკიცდება იგი.

⁴ცოდნის გამო ივსება ოთახები ყოველგვარი ძვირფასი და საამური სიმდიდრით.

⁵ბრძენი ადამიანი ძლიერია, მცოდნე კაცი ძალას იკრებს,

⁶რადგან ბრძნული მითითებით წარმართავს ომს და მრავალი მრჩევლის წყალობით ექნება გამარჯვება.

⁷მიუწვდომელია სიბრძნე უგუნურისთვის; კარიბჭესთან პირს ვერ გახსნის იგი.

⁸ვინც სიავეს განიზრახავს, ბოროტგანმზრახველს უწოდებენ.

⁹უგუნურის განზრახვა ცოდვაა და უზნეო კაცი საძაგელია ხალხისთვის.

¹⁰თუ გაჭირვების დღეს დაუძლურდი, მცირე ყოფილა შენი ძალა.

¹¹იხსენი სასიკვდილოდ წაყვანილნი და დასახოცად განწირულებს ნუ მიატოვებ!

¹²თუ იტყვი: აჰა, არ ვიცოდიო ეს! განა ის, ვინც გულს წონის, ვერ მიხვდება? განა შენი სულის მცველმა არ იცის? განა კაცს თავისი საქმეებისამებრ არ მიუზღავს?

¹³შვილო, ჭამე თაფლი, რადგან კარგია და გოლეული ფიჭაც ეტკბილება შენს სასას;

¹⁴იცოდე, ასევეა სიბრძნე შენი სულისთვის; თუ ჰპოვე იგი - მომავალი გექნება და შენი იმედი არ წარიკვეთება.

¹⁵ბოროტეულო! მართალი კაცის სამკვიდროს ნუ ჩაუსაფრდები და თავს ნუ დაესხმი მის სამყოფელს!

¹⁶რადგან შვიდჯერაც რომ დაეცეს მართალი, მაინც წამოდგება, ბოროტეულნი კი უბედურების ჟამს წაბორძიკდებიან.

¹⁷ნუ გაიხარებ შენი მტრის დაცემისას და მისი წაბორძიკებისას ნუ ილხენს შენი გული;

¹⁸თორემ დაინახავს უფალი, არ მოეწონება და მოაქცევს მისგან თავის რისხვას.

¹⁹ბოროტმოქმედთა გამო ნუ გაბრაზდები და უმართლოსი ნუ შეგშურდება,

²⁰რადგან ბოროტს მომავალი არ გააჩნია და უკეთურთა ლამპარი ჩაქრება.

²¹შვილო, უფლისა და მეფის გეშინოდეს და მეამბოხეებს ნუ გაეკარები.

²²რადგან მოულოდნელად მოვა მათგან განადგურება და ვინ იცის, რა უბედურებას დაგატეხენ?

²³ესეც ბრძენთა გამონათქვამია: მიკერძოება სასამართლოზე კარგი არ არის.

²⁴ვინც ბოროტს ეუბნება, მართალი ხარო, იმას ხალხები დასწყევლიან და ერები შეაჩვენებენ.

²⁵მის მამხილებელთ კი სიამე ექნებათ და მათზე გადმოვა კეთილი კურთხევა.

²⁶გულწრფელი პასუხი პირზე კოცნას ჰგავს.

²⁷დაასრულე შენი საქმე გარეთ, მოამზადე მინდორი, შემდეგ კი აიშენე სახლი.

²⁸ნუ გამოხვალ ცრუ მოწმედ შენი მოყვასის წინააღმდეგ, ნუ იცრუებ შენი ბაგეებით.

²⁹ნურც იმას იტყვი: როგორც მომექცა, ისევე მოვექცევი, თავისი ქცევისამებრ მივუზღავო.

³⁰ზარმაცი კაცის მინდორთან და ჭკუათხელი ადამიანის ვენახთან ჩავიარე;

³¹აჰა, ჭინჭრითა და ეკლით იყო ყველაფერი დაფარული, ყორე კი ჩამონგრეულიყო.

³²როცა ეს ვნახე, დავფიქრდი, შევხედე და ჭკუა ვისწავლე:

³³ცოტა ძილი, ცოტა თვლემა, ცოტა გულხელდაკრეფა მოსასვენებლად

³⁴და ყაჩაღივით მოგადგება შენი სიღატაკე და შენი გაჭირვება - იარაღასხმული კაცივით.