Read Traducción Kadosh Israelita Mesiánica იგავნი სოლომონისა 27 Bible Online

იგავნი სოლომონისა 27 - Traducción Kadosh Israelita Mesiánica bible

იგავნი სოლომონისა 27

¹ნუ დაიკვეხნი ხვალინდელი დღით, რადგან არ იცი რას მოიტანს ის დღე.

²სხვამ გაქოს და არა შენმა პირმა, უცხომ და არა შენმა ბაგეებმა.

³მძიმეა ქვა და ქვიშის ტვირთი, სულელის ბრაზი კი ორივეზე მძიმეა.

⁴მრისხანება სისასტიკეა, რისხვა წამლეკავია, მაგრამ შურს ვინ დაუდგება წინ?

⁵აშკარა მხილება სჯობს დაფარულ სიყვარულს.

⁶მეგობრისგან ჭრილობა ერთგულების ნიშანია, მოძულე კი კოცნით აგავსებს.

⁷მაძღარი გოლეულსაც დაიწუნებს, მშიერს კი ყოველივე მწარეც ეტკბილება.

⁸თავისი ბუდის მიმტოვებელი ჩიტივითაა კაცი, რომელიც თავის სახლს ტოვებს.

⁹ნელსაცხებელი და საკმეველი გულს ახარებს, ხოლო მეგობრის რჩევა უფრო ტკბილია.

¹⁰შენს მეგობარს და მამაშენის მეგობარს ნუ მიატოვებ; ნურც შენი ძმის სახლში მიხვალ შენი უბედურების დღეს. ახლო მეზობელი გერჩიოს შორს მყოფ ძმას.

¹¹ბრძენი იყავ შვილო და გული გამიხარე, რათა პასუხი გავცე ჩემზე აუგის მთქმელს.

¹²წინდახედული ხედავს საფრთხეს და თავს არიდებს, გულუბრყვილონი კი აგრძელებენ სიარულს და ისჯებიან.

¹³აიღე მისი ტანსაცმელი, ვინც უცნობს დაუდგა თავდებად; უცხოტომელის წილად გამოართვი მას გირაო.

¹⁴თუ ვინმე დილაადრიან ხმამაღლა აკურთხებს თავის მეგობარს - წყევლად ჩაეთვლება ეს.

¹⁵რაღა წვიმიან დღეს მჟონავი სახურავი, და რაღა ანჩხლი ცოლი;

¹⁶გინდა ასეთი ქალი შეგიფარია და გინდა ქარი ან ზეთი დაგიჭერია მარჯვენა ხელით.

¹⁷რკინა რკინას ლესავს, კაცი კი - თავისი მოყვასის სახეს.

¹⁸ლეღვის მომვლელი მის ნაყოფს შეჭამს, თავისი ბატონის მომვლელი პატივდებული იქნება.

¹⁹როგორც წყალი ირეკლავს სახეს, ისე ირეკლავს კაცის გული კაცს.

²⁰როგორც ქვესკნელი და ჯოჯოხეთია გაუმაძღარი ასე ადამიანის თვალიც გაუმაძღარია.

²¹ბრძმედი ვერცხლისთვისაა, ღუმელი ოქროსთვის, კაცი კი ქებით გამოიცდება.

²²როდინში ბურღულთან ერთად ფილთაქვითაც რომ ჩანაყო ბრიყვი, მაინც არ მოსცილდება თავისი სიბრიყვე.

²³კარგად იცნობდე შენს ფარას, ყურადღებით იყავი შენი ნახირის მიმართ,

²⁴ვინაიდან სამუდამო არ არის სიმდიდრე და არც გვირგვინი გადაეცემა თაობიდან თაობაში.

²⁵გაითიბა ბალახი და ამოიწვერა ჯეჯილი, მთის ბალახს მოიმარაგებენ;

²⁶და გეყოლება ბატკნები შენი სამოსლისთვის და თხები - მინდვრის საფასურისთვის.

²⁷საკმარისი იქნება თხის რძე შენთვის, შენი სახლეულისა და შენი მოახლეების გამოსაკვებად.