Read Traducción Kadosh Israelita Mesiánica იგავნი სოლომონისა 3 Bible Online

იგავნი სოლომონისა 3 - Traducción Kadosh Israelita Mesiánica bible

იგავნი სოლომონისა 3

¹შვილო! ჩემს მოძღვრებას ნუ დაივიწყებ და ჩემი მცნებანი დაიცვას შენმა გულმა,

²რადგან დღეგრძელობას, სიცოცხლის წლებს და მშვიდობას შეგმატებენ.

³წყალობა და ჭეშმარიტება ნუ დაგტოვებს, ყელზე მოიბი, გულის ფიცარზე დაიწერე.

⁴მადლსა და კეთილგონიერებას მოიპოვებ ღვთისა და ადამიანის თვალში.

⁵მთელი შენი გულით მიენდე უფალს და შენს გონიერებას ნუ დაეყრდნობი.

⁶ყოველ შენს გზაზე შეიცანი უფალი და ის მოგისწორებს ბილიკებს.

⁷ნუ იქნები ბრძენი საკუთარ თვალში, უფლის გეშინოდეს და ბოროტებას განერიდე.

⁸კურნება იქნება ეს შენი სხეულისთვის და სინედლე შენი ძვლებისთვის.

⁹პატივი ეცი უფალს შენი ქონებიდან და მთელი შენი მოსავლის პირველნაყოფიდან;

¹⁰და დოვლათით გაივსება შენი ბეღლები და მაჭარი იდინებს შენი საწნახლიდან.

¹¹შვილო, უფლისგან წვრთნას ნუ უგულებელყოფ და მისი შეგონება ნუ მოგძულდება.

¹²რადგან, ვინც უყვარს უფალს, იმას სჯის კიდეც, როგორც მამა - შვილს, თავის საქებარს!

¹³ნეტარია კაცი სიბრძნის მპოვნელი და ადამიანი - გონიერების მომხვეჭი!

¹⁴რადგან მისით მონახვეჭი ვერცხლით მონახვეჭს სჯობია და შემოსავალი - ბაჯაღლოს.

¹⁵მარგალიტზე ძვირფასია იგი და შენი არც ერთი საწადელი არ შეედრება მას.

¹⁶დღეგრძელობა მის მარჯვენაშია, მარცხენაში - სიმდიდრე და პატივი.

¹⁷მისი გზები საამურია, ბილიკები - მშვიდობიანი.

¹⁸სიცოცხლის ხეა მათთვის, ვინც ჩაეჭიდა მას და ნეტარნი არიან მასზე ჩაბღაუჭებულნი.

¹⁹უფალმა სიბრძნით დააფუძნა დედამიწა, გონიერებით განამტკიცა ცანი.

²⁰ჯურღმულნი გაიპო მისი ცოდნით და ცვარს აფრქვევენ ღრუბელნი.

²¹შვილო, ნუ მიეფარება შენს თვალს ისინი, ჯანსაღი აზრი და ავკარგიანობა დაიცავი.

²²და იქნებიან სიცოცხლედ შენი სულისთვის და მადლის სამკაულად - შენი ყელისთვის.

²³მაშინ უსაფრთხოდ ივლი შენს გზებზე და ფეხი შენი არ წაბორძიკდება.

²⁴როცა დაწვები, არ შეგეშინდება და ტკბილი იქნება შენი ძილი.

²⁵არც უეცარი შიში შეგაძრწუნებს და არც სიავე, ბოროტეულთაგან რომ მოვა,

²⁶რადგან უფალი იქნება შენი საყრდენი და ის დაიფარავს შენს ფეხს მახისგან.

²⁷ნუ დაუკავებ სიკეთეს მას, ვინც ამას იმსახურებს, თუკი ძალუძს შენს ხელს ამის გაკეთება,

²⁸ნუ ეტყვი მოყვასს: "წადი, ხვალ მოდი და მაშინ მოგცემ!” თუ მისაცემი თან გაქვს.

²⁹ნუ განიზრახავ ბოროტებას შენი მოყვასისთვის, როცა დანდობილად ცხოვრობს იგი შენს გვერდით.

³⁰ნურც უმიზეზოდ შეედავები კაცს, თუ არ უბოროტია შენთვის.

³¹ნუ შეგშურდება მოძალადე კაცისა, მის ნურც ერთ გზას ნუ აირჩევ;

³²რადგან მზაკვარნი საძაგელნი არიან უფლის წინაშე, წრფელებთან კი ახლობლობს იგი.

³³უფლის წყევლაა ბოროტეულის სახლზე, მართალთა სამკვიდრებელს კი აკურთხებს.

³⁴დამცინავთ დასცინის, თავმდაბალთ კი მადლს ანიჭებს.

³⁵ბრძენნი პატივს დაიმკვიდრებენ, ბრიყვთა მემკვიდრეობა კი დამცირებაა.