Read Traducción Kadosh Israelita Mesiánica იგავნი სოლომონისა 30 Bible Online

იგავნი სოლომონისა 30 - Traducción Kadosh Israelita Mesiánica bible

იგავნი სოლომონისა 30

¹სიტყვები აგურ იაქეს ძისა, მასაელისა. ამ კაცის ნათქვამი ითიელის, ითიელისა და უქალის მიმართ:

²"მართლაც უმეცარი ვარ კაცთა შორის და ადამიანური გონიერება არ გამაჩნია.

³ვერც სიბრძნე მისწავლია და წმიდის შემეცნებაც არ გამაჩნია.

⁴ვინ ავიდა ზეცად და ვინ ჩამოვიდა? ქარი ვინ დაიჭირა მუჭით? წყალი ვინ შეკრა მოსასხამით? ვინ დაადგინა დედამიწის ყოველი კიდე? რა არის მისი სახელი და რა არის მისი ძის სახელი, თუ იცი?

⁵ღმერთის ყოველი სიტყვა ნაცადია; ფარია იგი მათთვის, ვინც მას შეეფარება.

⁶ნურაფერს მიუმატებ მის სიტყვებს, თორემ გამხელს და მატყუარა გამოხვალ.

⁷ორ რამეს გთხოვ და სანამ მოვკვდებოდე, უარს ნუ მეტყვი:

⁸ამაოება და ტყუილი განმაშორე, ნურც სიღარიბეში ჩამაგდებ და ნურც სიმდიდრეს მომცემ; ჩემი სამყოფი პურით გამომკვებე,

⁹რომ გამაძღარმა არ უარგყო და არ ვთქვა, ვინ არის უფალი-მეთქი, ან გაღარიბებულმა არ ვიქურდო და არ შევბღალო ჩემი ღმერთის სახელი.

¹⁰ცილს ნუ დასწამებ მონას ბატონის წინაშე, თორემ დაგწყევლის და დადანაშაულდები.

¹¹არიან ისეთნი, ვინც წყევლის თავის მამას და საკუთარ დედას არ აკურთხებს.

¹²არიან, საკუთარ თვალში სუფთანი, მაგრამ არ განბანილან საკუთარი სიბინძურისგან,

¹³არიან ისეთნი - და რა ზვიადია მათი თვალები, როგორ აუზიდავთ ქუთუთოები.

¹⁴არიან, რომელთა კბილებიც მახვილებია და ყბები - დანები, რათა გადაჭამონ ქვეყნის ჩაგრულნი და კაცთა შორის უქონელნი.

¹⁵წურბელას ორი ასული ჰყავს: მომეცი, მომეცი! ეს სამნი გაუმაძღარნი არიან და ოთხნი არ იტყვიან: კმარა!

¹⁶ქვესკნელი, უნაყოფო საშო, წყლით გაუმაძღარი მიწა და ცეცხლი არასოდეს იტყვიან: კმარა!

¹⁷მამის დამცინავ და დედის მორჩილების მოძულე თვალებს ხევის ყორნები ამოკორტნიან და არწივის მართვენი შეჭამენ.

¹⁸სამი რამ მაოცებს და ოთხი რამ ვერ გამიგია:

¹⁹ცაში არწივის გზა, კლდეზე გველის გზა, შუაგულ ზღვაში გემის გზა და მამაკაცის გზა ქალწულისკენ.

²⁰მრუში ქალის ზნე ასეთია: შეჭამს, პირს მოიწმენდს და იტყვის - არაფერი დამიშავებიაო!

²¹სამი რამის ქვეშ ზანზარებს მიწა და ოთხ რამეს ვერ იტვირთავს:

²²გამეფებულ მონას და უგუნურს - პურით რომ ძღება,

²³კახპა ქალს, როცა გათხოვდება და მხევალს, თავისი ქალბატონის ადგილს რომ იმკვიდრებს.

²⁴ოთხნი არიან დედამიწაზე, მცირედნი, მაგრამ ბრძენთა ბრძენნი:

²⁵ჭიანჭველები ძლიერნი არ არიან, მაგრამ საზრდოს ზაფხულობით იმარაგებენ;

²⁶დამანები - ძლიერი ხალხი არ არიან, მაგრამ კლდეებში იშენებენ სახლებს;

²⁷კალიებს მეფე არა ჰყავთ, მაგრამ მწყობრად გამოდიან;

²⁸ხვლიკს ხელით დაიჭერ, ის კი მეფის სასახლეებშია.

²⁹ეს სამნი მედიდურად დააბიჯებენ, ოთხნი თამამად დადიან:

³⁰ლომი - ცხოველთა შორის ძლიერი, არავის წინაშე დაიხევს უკან.

³¹შემართული მამლაყინწა, ვაცი და მეფე ჯარს რომ მიუძღვის!

³²თუ ბრიყვულად მოიქეცი და თავი აღიმაღლე ან ბოროტება განიზრახე - ხელი მიიფარე პირზე!

³³რადგან რძის ჯანჯღარით, კარაქი გამოდის; ცხვირის ქექვით, სისხლი გამოდის; ბრაზის ჯანჯღარით, ჩხუბი გამოდის”.