Read Traducción Kadosh Israelita Mesiánica იგავნი სოლომონისა 31 Bible Online

იგავნი სოლომონისა 31 - Traducción Kadosh Israelita Mesiánica bible

იგავნი სოლომონისა 31

¹სიტყვანი მეფე ლემუელისა, რომლითაც მისი დედა არიგებდა:

²"რაო, ძეო ჩემო? რაო, ძეო ჩემი მუცლისა? რაო, ძეო ჩემი აღთქმებისა?

³ნუ შეალევ ქალებს შენს ძალას და შენს გზებს - მეფეთა დამღუპველებს!

⁴მეფეთ არ შეეფერებათ ლემუელ, მეფეთ არ შეეფერებათ ღვინის სმა, და არც მთავრებს - მაგარ სასმელთა სიყვარული;

⁵თორემ დალევენ, დაივიწყებენ დადგენილებებს და გაამრუდებენ ჩაგრულთა სამართალს.

⁶მიეცით მაგარი სასმელი მომაკვდავს და ღვინო - სულგამწარებულს;

⁷რათა დალიოს და დაივიწყოს თავისი სიღარიბე და აღარ ახსოვდეს თავისი ტანჯვა!

⁸გახსენი პირი დამუნჯებულისთვის და ყოველი განწირულის დასაცავად,

⁹გახსენი პირი, განსაჯე სამართლიანად და დაიცავი გლახაკთა და გაჭირვებულთა უფლებები.

¹⁰გამრჯე ცოლს ვინ იპოვის? მარგალიტზე ძვირფასია იგი.

¹¹დანდობილია მასზე მისი ქმრის გული და შემოსავალი არ მოაკლდება.

¹²სიკეთეს მიაგებს მას და არა ბოროტს, მთელი მისი ცხოვრების დღეებში.

¹³მატყლს და სელს მოიძევს და სიხარულით შრომობს თავისი ხელებით.

¹⁴სავაჭრო ხომალდების მსგავსად შორიდან მოაქვს თავისი საზრდო.

¹⁵ღამიანად დგება, საკვებს აძლევს სახლეულს და საქმეზე აყენებს მხევალთ.

¹⁶იფიქრებს მინდორზე და შეიძენს მას, საკუთარ ხელთა მტევნით რგავს ვენახს.

¹⁷ძალას ისარტყლავს წელზე და მკლავებს იმაგრებს.

¹⁸ხვდება, რომ კარგია მისი მონაგები; ღამითაც არ ქრება მისი ლამპარი.

¹⁹იწვდენს ხელს სართავი ჯარასკენ და თითისტარს დაიჭერს.

²⁰ხელს უმართავს ღარიბს და ხელს უწვდის გაჭირვებულს.

²¹არ შიშობს თავის სახლეულზე თოვლიანობისას, რადგან ძოწისფერითაა შემოსილი მთელი მისი სახლეული.

²²ფარდაგებს იმზადებს, ბისონი და მეწამულია მისი სამოსელი.

²³ცნობილია მისი ქმარი კარიბჭეებთან და ქვეყნის უხუცესთა შორის ზის იგი.

²⁴სელის ტანსაცმელს კერავს და ყიდის, სარტყლებით ამარაგებს ვაჭარს.

²⁵ძალითა და ღირსებით არის შემოსილი და უღიმის მომავალს.

²⁶სიბრძნით ხსნის პირს და კეთილი დარიგებაა მის ენაზე.

²⁷თვალყურს ადევნებს თავისი სახლეულის სვლას და სიზარმაცის პურს არ ჭამს.

²⁸დგებიან მისი შვილები და ლოცავენ მას, ქმარიც აქებს და ეუბნება:

²⁹მრავალი ასული მოქცეულა სანაქებოდ, მაგრამ შენ ყველას გადააჭარბე!

³⁰მაცდურია მომხიბვლელობა და ამაოა სილამაზე, უფლის მოშიში ქალი კი განდიდებული იქნება!

³¹მიეცით საკუთარ ხელთა ნაყოფისაგან და საქმენი მისნი განადიდებენ მას კარიბჭეებთან”.