Read Traducción Kadosh Israelita Mesiánica იგავნი სოლომონისა 4 Bible Online

იგავნი სოლომონისა 4 - Traducción Kadosh Israelita Mesiánica bible

იგავნი სოლომონისა 4

¹ისმინეთ შვილებო მამის დარიგება, ყური დაუგდეთ, რომ გონიერება შეიძინოთ.

²რადგან ჯანსაღ მოძღვრებას გაძლევთ; ჩემს შეგონებებს ნუ მიატოვებთ.

³მეც სათუთი შვილი ვიყავი მამაჩემისა და ერთადერთი დედის წინაშე.

⁴მასწავლიდა მამაჩემი და მეუბნებოდა: "გულში შეინახე ჩემი სიტყვები, დაიცავი ჩემი მცნებები და იცოცხლებ.

⁵შეიძინე სიბრძნე, შეიძინე გონიერება, ნუ დაივიწყებ და ნუ გადაუხვევ ჩემს სიტყვებს.

⁶ნუ მიატოვებ და ის დაგიცავს, გიყვარდეს და ის შეგინახავს.

⁷სიბრძნის დასაწყისი სიბრძნის მოხვეჭაშია, მთელი შენი ქონებით გონიერება შეიძინე.

⁸დააფასე იგი და აგამაღლებს; პატივს მოგაგებს, თუ გულში ჩაიკრავ.

⁹თავზე მადლის შარავანდედს დაგადგამს, დიდების გვირგვინს გიბოძებს”.

¹⁰ისმინე შვილო, მიიღე ჩემი ნათქვამი და გაგიმრავლდება სიცოცხლის წლები.

¹¹სიბრძნის გზისკენ მიგმართე და სწორ ბილიკებზე წარგიძეხი.

¹²სიარულისას, არ დაგიბრკოლდება ნაბიჯი და გაქცევისას - არ წაბორძიკდები.

¹³ჩაეჭიდე დარიგებას, არ გაუშვა, დაიცავი, რადგან შენი სიცოცხლეა იგი.

¹⁴ბოროტეულთა ბილიკს ნუ დაადგები და სიავის გზაზე ნუ ივლი.

¹⁵თავი აარიდე, ახლოსაც ნუ ჩაუვლი, გადაუხვიე და გაიარე.

¹⁶რადგან ვერ იძინებენ, თუ სიავე არ ჩაიდინეს; ძილი უკრთებათ, თუ ვინმეს არ ავნეს,

¹⁷რადგან ბოროტების პურს ჭამენ და ძალადობის ღვინოს სვამენ.

¹⁸მართალთა ბილიკი განთიადის სინათლეს ჰგავს, რომელიც უფრო და უფრო ძლიერდება შუადღემდე.

¹⁹წყვდიადივითაა ბოროტეულთა გზა: არ იციან, რაზე წაბორძიკდებიან.

²⁰შვილო, ჩემს სიტყვას მოუსმინე, ჩემს ნათქვამს დაუგდე ყური.

²¹თვალი არ მოაშორო, გულის წიაღში შეინახე.

²²რადგან სიცოცხლეა იგი მისი მპოვნელისთვის და კურნებაა მისი სხეულისთვის.

²³ყველაფერზე მეტად დაიცავი შენი გული, რადგან მისგან მოედინებიან სიცოცხლის წყაროები.

²⁴მოიცილე მზაკვრობა ბაგიდან და უკუღმართი საუბარი განიშორე.

²⁵წინ იყურონ შენმა თვალებმა და პირდაპირი იყოს შენი მზერა შენს წინაშე.

²⁶მოასწორე შენი ფეხის ბილიკი და ყველა შენი გზა განმტკიცდება.

²⁷ნურც მარჯვნივ გადაუხვევ, ნურც მარცხნივ; განაშორე ფეხი ბოროტებას.