Read Traducción Kadosh Israelita Mesiánica იგავნი სოლომონისა 5 Bible Online

იგავნი სოლომონისა 5 - Traducción Kadosh Israelita Mesiánica bible

იგავნი სოლომონისა 5

¹შვილო, ჩემს სიბრძნეს მოუსმინე და ყური მიაპყარ ჩემს გონიერებას,

²რათა შეგეძლოს განსჯა და ცოდნის სადარაჯოზე იყვნენ შენი ბაგენი.

³რადგან გოლეულ თაფლს აწვეთებენ ბაგენი უცხო ქალისა და ზეთზე ნაზია მისი საუბარი.

⁴ნაღველივით მწარეა მისი ბოლო და ბასრი - ორლესული მახვილივით.

⁵სიკვდილში ჩადის მისი ფეხები, ქვესკნელისკენ მიემართება მისი ნაბიჯები.

⁶სიცოცხლის გზაზე არ ფიქრობს, არამყარია მისი გზები, ვერაფერი გაუგია.

⁷ახლა მე მომისმინეთ შვილებო და ნუ გადაუხვევთ ჩემს ნათქვამს.

⁸შორს იყოს მისგან შენი გზა და მისი სახლის ზღურბლს ნუ მიუახლოვდები,

⁹თორემ, სხვებს მისცემ შენს ძალას და წლებს შენსას - დაუნდობელს,

¹⁰შენი შეძლებით მეძავნი გაძღებიან და შენი ნაჯაფარით სახლი - უცხოტომელისა.

¹¹ბოლოს კი აკვნესდები, როცა ჩამოგიხმება ხორცი და ტანი,

¹²იტყვი: "როგორ შევიძულე დარიგება და უკუაგდო შეგონება ჩემმა გულმა;

¹³არც ჩემს მასწავლებელს მოვუსმინე და არც ჩემს დამრიგებელს დავუგდე ყური.

¹⁴ლამის საბოლოოდ გავნადგურდი ხალხსა და კრებულში”.

¹⁵სვი წყალი შენი წყალსატევიდან და ნაკადული შენი ჭიდან,

¹⁶რად უნდა იღვრებოდეს შენი წყაროები ქუჩაში და წყლის ნაკადები - მოედნებზე?

¹⁷მხოლოდ შენი იყოს ისინი და არ შეგეზიარონ უცხონი.

¹⁸კურთხეული იყოს შენი წყარო და გაიხარე შენი სიყმაწვილის ცოლით,

¹⁹მოსიყვარულე ფურ-ირმითა და მადლიანი ქურციკით. დაე, მისი მკერდი გარწყულებდეს ყოველთვის და მუდამ გიტაცებდეს მისი სიყვარული!

²⁰შვილო, რად უნდა გატყვევებდეს უცხო ქალი და ეხვეოდე მკერდს უცხოტომელისას?

²¹რადგან უფლის თვალწინაა კაცის გზანი და მის ყველა ბილიკს ის სწონის.

²²ბოროტეული საკუთარი ურჯულოებით იქნება შეპყრობილი და მისივე ცოდვის საბელებით შეიბოჭება.

²³შეგონების გარეშე მოკვდება იგი და თავისი სიბრიყვის სიმრავლით დაიკარგება.