Read Traducción Kadosh Israelita Mesiánica იგავნი სოლომონისა 6 Bible Online

იგავნი სოლომონისა 6 - Traducción Kadosh Israelita Mesiánica bible

იგავნი სოლომონისა 6

¹შვილო, თუ თავდებად ჩადექი შენი ახლობლისთვის და ხელი ხელზე დაარტყი უცხოსათვის,

²მახეში გაები შენი ბაგის ნათქვამით; დაჭერილი ხარ შენი სიტყვით.

³თუ ხელში ჩაუვარდი ახლობელს, ასე მოიქეცი შვილო და გადაირჩენ თავს: წადი, თავი დაიმდაბლე და ევედრე.

⁴თვალებს ძილს ნუ მიაკარებ და ქუთუთოებს - რულს,

⁵გადაირჩინე თავი, როგორც შველმა მონადირის ხელიდან და ფრინველმა ფრინველმჭერის ხელიდან.

⁶ჭიანჭველასთან მიდი უქნარავ, მის გზებს დააკვირდი, და ჭკუა ისწავლე.

⁷არც უფროსი ჰყავს მას, არც ბატონი და არც ზედამხედველი;

⁸ზაფხულში იმარაგებს თავის საზრდოს, მკის დროს აგროვებს თავის საკვებს.

⁹როდემდე უნდა იწვე ზარმაცო? როდის გაიღვიძებ?

¹⁰ცოტა ძილი, ცოტა თვლემა, ცოტა გულზე ხელის დაკრეფა მოსასვენებლად,

¹¹და მაწანწალასავით მოგადგება სიღატაკე და იარაღიანი კაცივით - გაჭირვება.

¹²უღირსი ადამიანი, ბოროტი კაცი, უკუღმართი პირით დაიარება,

¹³თვალს ჩაუკრავს, ფეხებითა და თითებით ანიშნებს.

¹⁴უკუღმართობაა მის გულში, გამუდმებით ბოროტს განიზრახავს და შუღლს ავრცელებს.

¹⁵ამის გამო უეცრად დაატყდება უბედურება, მყისიერად შეიმუსრება და არ ექნება კურნება.

¹⁶ექვსი რამ სძულს უფალს და შვიდი რამ ეზიზღება:

¹⁷ამპარტავანი თვალები, მატყუარა ენა, უდანაშაულო სისხლის დამღვრელი ხელები,

¹⁸ბოროტების მზრახველი გული, საბოროტოდ აჩქარებული ფეხები,

¹⁹ცრუ მოწმე, სიცრუის გამავრცელებელი და ძმათა შორის განხეთქილების მთესველი.

²⁰შვილო, მამაშენის მცნებები დაიცავი და დედაშენის სწავლებას ნუ მიატოვებ.

²¹განუწყვეტლივ გულზე გქონდეს შებმული, ყელზე მოხვეული.

²²სიარულისას წინ წაგიძღვება, ძილში გიდარაჯებს და გამოღვიძებულს დაგელაპარაკება.

²³რადგან, მცნება ლამპარია და სწავლება - სინათლე, ხოლო სამხილებელი შეგონება ცხოვრების გზაა.

²⁴რათა დაგიფაროს ავი ქალისგან, უცხო ქალის ლაქარდიანი ენისგან.

²⁵ნურც მის სილამაზეს ისურვებ გულში და ნურც მისი თვალების ხამხამი გაგიტაცებს,

²⁶რადგან მეძავი ქალის გამოა ლუკმა პურამდე რომ მათხოვრდებიან; სხვისი ცოლი კი შენს ძვირფას სულზე ნადირობს.

²⁷განა ჩაიდებს კაცი ცეცხლს უბეში ტანისამოსის დაუწველად?

²⁸ნაკვერჩხლებზე თუ გაივლის ვინმე ფეხების დაუწველად?

²⁹ასევეა მოყვასის ცოლთან მიმსვლელიც; დაუსჯელი ვერ გადარჩება, ვინც მოყვასის ცოლს მიეკარება.

³⁰არ შეიზიზღებენ ქურდს, თუ შიმშილის დასაკმაყოფილებლად მოიპარავს;

³¹მაგრამ თუ წაასწრებენ, შვიდმაგად ზღავს, თავისი სახლის მთელ ქონებას გადაიხდის.

³²ვინც ქალთან მრუშობს - ჭკუანაკლულია; თავს იღუპავს, ვინც ამას სჩადის.

³³გვემასა და შერცხვენას ჰპოვებს და მისი სირცხვილი არ წარიხოცება.

³⁴რადგან ეჭვი განარისხებს კაცს და არ დაინდობს შურისძიების დღეს,

³⁵არც რაიმე გამოსასყიდს მიიღებს და არც ძღვენთა სიმრავლეს დათანხმდება.