Read Traducción Kadosh Israelita Mesiánica იგავნი სოლომონისა 7 Bible Online

იგავნი სოლომონისა 7 - Traducción Kadosh Israelita Mesiánica bible

იგავნი სოლომონისა 7

¹შვილო, ჩემი ნათქვამი დაიცავი და შენში დაიუნჯე ჩემი მცნებანი.

²დაიცავი ჩემი მცნებები და მოძღვრებები, როგორც საკუთარი თვალის ჩინი და იცოცხლებ.

³თითებზე დაიბნიე და გულის ფიცარზე დაიწერე.

⁴უთხარი სიბრძნეს: "ჩემი და ხარ შენ” და ახლო მეგობარი უწოდე გონიერებას.

⁵რათა დაგიფაროს სხვისი ცოლისგან, უცხო ქალისგან, ლაპარაკით რომ ხიბლავს;

⁶ვინაიდან, გავიხედე ჩემი სახლის სარკმლიდან და დარაბიდან

⁷და დავინახე გულუბრყვილონი, ვაჟებს შორის უგუნური ყმაწვილი შევამჩნიე.

⁸ქუჩაზე გადამავალი, ქალის სახლის კუთხესთან; მისი სახლის გზას დაადგა,

⁹შებინდებულზე, შუაღამესა და წყვდიადში.

¹⁰და აი, მეძავივით შემოსილი ქალი გამოეგება, ცბიერი გულით;

¹¹დაუდგრომელი და ურჩია იგი, შინ ფეხს ვერ აჩერებს:

¹²ხან ქუჩაშია, ხან მოედანზე, ყოველ კუთხეში საფრდება;

¹³ჩაებღაუჭა, კოცნის და ურცხვად ეუბნება:

¹⁴"სამშვიდობო მსხვერპლი აღვუთქვი და დღეს აღვასრულე ჩემი დანაპირები,

¹⁵ამიტომაც გამოვედი შენს შესახვედრად, გეძებდი და კიდეც გიპოვე!

¹⁶ფარდაგებით მოვფინე ჩემი სარეცელი, ეგვიპტის ნაქარგი ქსოვილით,

¹⁷მური ვაპკურე ჩემს საწოლს, ალოე და დარიჩინი,

¹⁸შემოდი, დილამდე გავძღეთ სიყვარულით, ვინეტაროთ ალერსით!

¹⁹რადგან სახლში არ არის ჩემი ქმარი, შორ გზაზე წავიდა.

²⁰ფულით სავსე ქისა წაიღო, შინ სავსე მთვარისას დაბრუნდება.

²¹მრავალსიტყვაობით აცდუნა, ლაქარდიანი ბაგით მონუსხა იგი.

²²მყისვე უკან გაჰყვა დასაკლავი ხარივით და შებორკილი სულელივით, დასასჯელად რომ მიჰყავთ.

²³ფრინველივით იჩქარის მახისკენ, სანამ ისარი არ დალახვრავს მის ღვიძლს; ის კი არ იცის, რომ სულს დაიღუპავს.

²⁴ამიტომ, მისმინეთ ახლა შვილებო, ყური დაუგდეთ ჩემს ნათქვამს:

²⁵ნუ გადაუხვევს თქვენი გულები იმ ქალის გზებისკენ და ნურც მის ბილიკებზე იხეტიალებთ,

²⁶რადგან მრავალი დასცა მან განგმირული, თვლა არ აქვს მისგან დახოცილთ.

²⁷მისი სახლი ქვესკნელის გზაა, მკვდართა სამყოფელში ჩამავალი.