Read Traducción Kadosh Israelita Mesiánica იგავნი სოლომონისა 8 Bible Online

იგავნი სოლომონისა 8 - Traducción Kadosh Israelita Mesiánica bible

იგავნი სოლომონისა 8

¹განა არ მოუხმობს სიბრძნე და ხმას არ იმაღლებს გონიერება?

²მაღლობთა მწვერვალებზე დგას, გზებსა და გზაჯვარედინებზე,

³კარიბჭეებთან, ქალაქის შესასვლელთან, ჭიშკრებთან ღაღადებს:

⁴თქვენ მოგიხმობთ კაცნო, ადამის ძეთ მიმართავს ჩემი ხმა.

⁵შეიგნეთ გამჭრიახობა გულუბრყვილნო და სიბრძნე - უგუნურნო.

⁶ისმინეთ, რადგან უმთავრესზე ვილაპარაკებ; გავხსნი ბაგეებს სიმართლის სათქმელად.

⁷რადგან, ჭეშმარიტებას წარმოსთქვამს ჩემი პირი და ბოროტება სისაძაგლეა ჩემს ბაგეთათვის.

⁸სამართლიანია ყოველი ნათქვამი ჩემი პირისა, მზაკვრული და მრუდე არაფერია მათში.

⁹წრფელია ყოველი მათგანი გამგებისთვის და მართებული - ცოდნის მპოვნელისთვის.

¹⁰აიღეთ ჩემი დარიგება და არა ვერცხლი; ცოდნა და არა რჩეული ოქრო.

¹¹რადგან, ძვირფას თვლებზე უკეთესია სიბრძნე, ვერავითარი სანატრელი რამ ვერ შეედრება”.

¹²მე, სიბრძნე, გონიერებასთან ვმკვიდრობ და ცოდნასა და წინდახედულობას ვპოვებ.

¹³უფლის შიში ბოროტების სიძულვილია; მძულს სიამაყე, ქედმაღლობა, ბოროტი გზა და უკუღმართი ბაგე.

¹⁴ჩემთანაა რჩევა და ჯანსაღი სიბრძნე; მე ვარ გონიერება და მაქვს ძლიერება.

¹⁵ჩემით მეფობენ მეფენი და აწესებენ სამართალს ხელისუფალნი,

¹⁶ჩემით მთავრობენ მთავარნი და კეთილშობილნი, ქვეყნის ყველა მოსამართლე.

¹⁷მიყვარს ჩემი მოყვარულნი და გულმოდგინედ მაძიებელნი მიპოვნიან.

¹⁸ჩემთანაა სიმდიდრე და პატივი, ულევი დოვლათი და სიმართლე.

¹⁹ჩემი ნაყოფი ბაჯაღლო ოქროზე უმჯობესია და ჩემი მოსავალი - რჩეულ ვერცხლზე.

²⁰სიმართლის გზით დავდივარ, სამართლიანობის ბილიკების შუაგულში,

²¹რათა სიმდიდრე დავუმკვიდრო ჩემს მოყვარულებს და ავავსო მათი საგანძურები.

²²თავისი გზის დასაწყისშივე ვყავდი უფალს, თავის ქმნილებამდე, ძველთაგანვე.

²³ოდითგანვე ვარ ცხებული, თავიდანვე - დედამიწის უწინარეს.

²⁴მაშინ გამოვჩნდი, როცა არც უფსკრულები იყო და არც უხვი წყაროს წყლები.

²⁵სანამ მთები დადგინდებოდნენ, ბორცვებზე ადრე გამოვჩნდი.

²⁶როცა არც დედამიწა იყო შექმნილი, და არც მინდვრები და ქვეყნიერების პირველი მტვერი.

²⁷იქ ვიყავი ცათა დაფუძნებისას, როცა წრე შემოავლო ზღვის ზედაპირს,

²⁸როცა მაღლა ღრუბლებს ამაგრებდა და უფსკრულში წყაროებს აძლიერებდა,

²⁹როცა წესი დაუდგინა ზღვებს, რათა წყლებს არ გადაელახათ მათი ნაპირი და ბრძანებით დაადგინა დედამიწის საფუძვლები.

³⁰ხუროთმოძღვარივით გვერდში ვყავდი, დღენიადაგ მისი სიხარული ვიყავი და ყოველთვის ვხარობდი მის წინაშე:

³¹ვხარობდი სამყაროთი და ქვეყნიერებით, ადამიანის ძეებში იყო ჩემი ნეტარება.

³²ამიტომ მისმინეთ ახლა, შვილებო, რადგან ნეტარნი არიან ჩემი გზების შემნახველნი.

³³ისმინეთ ჩემი დარიგება და დაბრძენდით, ნუღარ წაუყრუებთ.

³⁴ნეტარია კაცი, ვინც მისმენს, ყოველდღე ფხიზლობს ჩემს კართან და ჩემი შესასვლელის ზღურბლთან მომელის.

³⁵რადგან ჩემი მპოვნელი სიცოცხლეს ჰპოვებს და კეთილგანწყობას იღებს უფლისგან.

³⁶ჩემს წინააღმდეგ შემცოდე კი თავს იზიანებს. ყოველ ჩემს მოძულეს, სიკვდილი უყვარს.