Read Traducción Kadosh Israelita Mesiánica იგავნი სოლომონისა 9 Bible Online

იგავნი სოლომონისა 9 - Traducción Kadosh Israelita Mesiánica bible

იგავნი სოლომონისა 9

¹სიბრძნემ სახლი აიშენა თავისთვის და გამოკვეთა მისი შვიდი სვეტი,

²დაკლა თავისი საკლავი, თავისი ღვინო შეაზავა და თავისი სუფრა გაშალა.

³წარგზავნა თავისი მხევალნი, რათა მოეხმოთ ქალაქის მაღლობებიდან:

⁴"ვინც გულუბრყვილოა, აქეთ შემოუხვიოს”. გონიერებას მოკლებულთ კი ეუბნება:

⁵"მოდით, ჭამეთ ჩემი პური და სვით ღვინო - ჩემ მიერ შეზავებული;

⁶მიატოვეთ გულუბრყვილობა, იცოცხლეთ, იარეთ გონიერების გზით”.

⁷მქირდავის დამრიგებელი დამცირებას იღებს, ბოროტეულის მამხილებელი - შეურაცხყოფას.

⁸ნუ ამხელ მქირდავს, თორემ შეგიძულებს; შეაგონე ბრძენს და შეგიყვარებს.

⁹შეაგონე ბრძენი და უფრო დაბრძენდება, დამოძღვრე მართალი და ცოდნას გაიმრავლებს.

¹⁰სიბრძნის საწყისი უფლის შიშია და წმიდის შემეცნება - გონიერება.

¹¹ვინაიდან ჩემით გაგიმრავლდება დღენი და მოგემატება სიცოცხლის წლები.

¹²თუ დაბრძენდი, შენთვის დაბრძენდი და თუ მქირდავი ხარ, შენვე დაზარალდები.

¹³უგუნური ქალი მოლაყბეა, ბრიყვია და არაფრის მცოდნე.

¹⁴დაჯდება თავისი სახლის ზღურბლზე, ქალაქის ამაღლებულ, საპატიო ადგილებზე,

¹⁵რათა მოუხმოს გამვლელთ, თავის გზაზე მდგომთ:

¹⁶"ვინც გულუბრყვილოა, აქეთ გადმოუხვიოს”. გონიერებას მოკლებულთ კი ეუბნება:

¹⁷"ტკბილია მოპარული წყალი, გემრიელია ჩუმად შეჭმული პური”.

¹⁸არც კი იციან, რომ მკვდრები არიან იქ, შავეთის ჯურღმულებში - მის მიერ ხმობილნი.