Read Traducción Kadosh Israelita Mesiánica გოდება იერემიასი 3 Bible Online

გოდება იერემიასი 3 - Traducción Kadosh Israelita Mesiánica bible

გოდება იერემიასი 3

¹მე ვარ კაცი, მისი რისხვის კვერთხით ტანჯვის მნახველი.

²განმდევნა და სიბნელეში მატარა, არა ნათელში.

³მხოლოდ მე მიღერებს ხელს ისევ და ისევ მთელი დღე.

⁴დააბერა ჩემი ხორცი და კანი, შემუსრა ჩემი ძვლები.

⁵შემომადგა და შემომარტყა სიმწარე და შეჭირვება.

⁶სიბნელეში მამყოფა საუკუნო მკვდარივით.

⁷ზღუდე შემომავლო, რომ ვერ გავიდე; ბორკილები დამიმძიმა.

⁸კიდეც რომ ვიღაღადო და შველა ვითხოვო, ის ახშობს ჩემს ლოცვას.

⁹თლილი ლოდებით გადამიღობა გზები, ბილიკები გამიმრუდა.

¹⁰ჩასაფრებული დათვივით არის ჩემთვის, დადარაჯებული ლომივით.

¹¹გზები გადამიადგილა, ნაკუწ-ნაკუწ დამგლიჯა, გამაპარტახა.

¹²მოზიდა მშვილდი და ისრის სამიზნედ დამაყენა.

¹³შიგნეულში გამიტარა კაპარჭიდან ამოღებული ისრები.

¹⁴მთელი ხალხის დასაცინი შევიქენი, მათ საშაიროდ მთელ დღეს.

¹⁵სიმწარით გამაძღო, აბზინდით დამათრო.

¹⁶ხრეშით მიმტვრებს კბილებს, მტვრით დამფარა.

¹⁷მშვიდობამ მიატოვა ჩემი სამშვინველი, დამავიწყდა კეთილდღეობა.

¹⁸ვთქვი: წამერთვა ღონე და უფლის იმედი.

¹⁹გაიხსენე, უფალო, ჩემი უბედურება, ტანჯვა, აბზინდა და სიმწარე.

²⁰დიახ, იხსენებს და დაღონებულია ჩემში სული,

²¹მაგრამ ამას გავიხსენებ გულში და ამიტომ ვიმედოვნებ,

²²რომ უფლის მოწყალება არ დასრულებულა, რომ მისი სიბრალული არ გამოლეულა.

²³განახლდება ყოველ დილით, დიდია შენი ერთგულება.

²⁴ჩემი ხვედრია უფალი, ამბობს ჩემი სული; ამიტომ მაქვს მისი იმედი.

²⁵კეთილია უფალი მისი მომლოდინესთვის, მისი მაძიებელი სულისთვის.

²⁶სიკეთე მას, ვინც მოთმინებით მოელის ხსნას უფლისგან.

²⁷სიკეთე კაცს, რომელმაც თავისი უღელი ზიდა სიჭაბუკეში,

²⁸რომელიც განმარტოვებით ზის და დუმს, რადგან უფალმა დაადგა მას იგი.

²⁹მტვერშიც რომ ჩადოს ბაგეები, მაინც ექნება იმედი.

³⁰ლოყაც მიუშვიროს თავის მცემელს, გაძღეს შერცხვენით.

³¹რადგან არ მიატოვებს უფალი საუკუნოდ.

³²რადგან თუ დაამწუხრებს, შეიბრალებს კიდეც თავისი დიდი მოწყალებით.

³³რადგან გულით როდი სტანჯავს და ამწუხრებს ადამიანთა შვილებს,

³⁴ფეხქვეშ რომ თელავენ ქვეყნის ყველა ტუსაღს,

³⁵სამართალს რომ ართმევენ კაცს უზენაესის წინაშე,

³⁶საქმეს რომ უმრუდებენ კაცს სასამართლოში, განა ვერ ხედავს ამას უფალი?

³⁷ვინ არის, რომ თქვას და შესრულდეს, თუ უფალმა არ ბრძანა?

³⁸განა უზენაესის პირიდან არ გამოდის უბედურება და სიკეთე?

³⁹რატომ ჩივის ცოცხალი ადამიანი, როცა თავისი ცოდვების გამო ისჯება?

⁴⁰გამოვცადოთ და გამოვიძიოთ ჩვენი გზები და მოვბრუნდეთ უფლისკენ.

⁴¹გულები და ხელები აღვაპყროთ ზეცაში მყოფი ღმერთისკენ და ვთქვათ:

⁴²ჩვენ დავაშავეთ და გეურჩებოდით, შენ არ გვაპატიე.

⁴³რისხვით შეიმოსე და გვდევნე, გვხოცე და არ შეგვიბრალე.

⁴⁴ღრუბლით შეიმოსე, რომ არ მოეღწია ჩვენს ლოცვას.

⁴⁵ნაგვად და სიბინძურედ გვაქციე ხალხებს შორის.

⁴⁶პირი დააღეს ჩვენზე ჩვენმა მტრებმა.

⁴⁷შიში და განსაცდელი გვხვდა წილად, ნგრევა და განადგურება.

⁴⁸ცრემლის ნაკადები სდის ჩემს თვალებს ჩემი ერის ასულის განადგურების გამო.

⁴⁹ჩემი თვალები განუწყვეტლივ იღვრება, არ ჩერდება,

⁵⁰ვიდრე არ გადმოიხედება და არ იხილავს უფალი ციდან.

⁵¹ჩემი თვალები ტკივილს აყენებენ ჩემს სულს ჩემი ქალაქის ასულთა გამო.

⁵²ჩიტივით მომინადირეს ჩემმა მტრებმა, უმიზეზოდ.

⁵³ჩემი ცხოვრება დილეგში დაღუპეს და ქვა მესროლეს.

⁵⁴წყალმა გადამიარა თავზე, ვთქვი: "დავიღუპე”.

⁵⁵შენს სახელს მოვუხმე, უფალო, ღრმა დილეგიდან.

⁵⁶შეისმინე ჩემი ხმა, ნუ მოარიდებ ყურს ჩემს ღაღადს, ჩემს ვედრებას.

⁵⁷შენ მომიახლოვდი იმ დღეს, როცა მოგიხმე; მითხარი: "ნუ გეშინია”.

⁵⁸შენ იცავდი, უფალო, ჩემი სულის საქმეს, შენ გამოისყიდე ჩემი სიცოცხლე.

⁵⁹შენ დაინახე ჩემი ჩაგვრა, ო, უფალო, განიკითხე ჩემი საქმე.

⁶⁰შენ დაინახე მთელი მათი შურისძიება, ყოველი მათი განზრახვა ჩემს წინააღმდეგ!

⁶¹შენ გაიგონე მათი ლანძღვა, ო, უფალო, ყოველი მათი მზაკვრული ზრახვა ჩემს წინააღმდეგ.

⁶²ჩემზე თავდამსხმელთა ბაგენი და ფიქრნი ჩემს წინააღმდეგაა ყოველდღე.

⁶³შეხედე მათ დაჯდომას და მათ ადგომას, დამცინიან თავიანთ სიმღერებში.

⁶⁴მიუზღე მათ საზღაური, უფალო, მათი ხელის ნამოქმედარის მიხედვით.

⁶⁵გული დაუბნელე მათ, უფალო; შენი წყევლა იყოს მათზე.

⁶⁶რისხვით დაედევნე და გაანადგურე ისინი უფალო, ცისქვეშეთში.