Read Traducción Kadosh Israelita Mesiánica გოდება იერემიასი 5 Bible Online

გოდება იერემიასი 5 - Traducción Kadosh Israelita Mesiánica bible

გოდება იერემიასი 5

¹გაიხსენე, უფალო, რაც დაგვემართა; შეხედე და დაინახე ჩვენი შერცხვენა.

²ჩვენი სამკვიდრო უცხოთ გადაეცა, ჩვენი სახლები - უცხოტომელებს.

³დავობლდით, მამა აღარ გვყავს, დაქვრივდნენ ჩვენი დედები.

⁴ჩვენსავე წყალში ვერცხლს გვახდევინებენ, ჩვენი ტყის შეშას ვყიდულობთ.

⁵ფეხდაფეხ მოგვდევენ; დავიქანცეთ, არ გვაქვს მოსვენება.

⁶ეგვიპტეს გავუშვირეთ ხელი და აშურს, რომ გავძღეთ პურით.

⁷ჩვენმა მამებმა შესცოდეს და აღარ არიან, ჩვენ კი მათ უმართლობის გამო ვისჯებით.

⁸მონები ბატონობენ ჩვენზე და არავინაა, რომ მათი ხელიდან დაგვიხსნას.

⁹ჩვენი სიცოცხლის ფასად ვშოულობთ პურს, უდაბნოში მახვილის შიშით.

¹⁰ღუმელივითაა გავარვარებული ჩვენი კანი, შიმშილის მწველი ხვატის გამო.

¹¹გააუპატიურეს ქალები სიონში, ქალწულნი - იუდას ქალაქებში.

¹²მთავრებს ხელებით ჰკიდებენ, უხუცესებს პატივს არ სცემენ.

¹³ჭაბუკები საფქვავს ეზიდებიან, ბიჭები ბარბაცებენ შეშის ტვირთის ქვეშ.

¹⁴უხუცესები კარიბჭესთან აღარ სხდებიან, ჭაბუკნი აღარ მღერიან.

¹⁵შეწყდა ჩვენი გულის სიხარული, გლოვად იქცა ჩვენი ცეკვა.

¹⁶გვირგვინები დაგვცვივდა თავებიდან; ვაი ჩვენ, რადგან შევცოდეთ.

¹⁷ამიტომ დაგვიუძლურდა გული, ამიტომ დაგვიბნელდა თვალები,

¹⁸რადგან გაუკაცრიელდა სიონის მთა და მელიები მიდი-მოდიან იქ.

¹⁹შენ კი, საუკუნოდ ხარ, უფალო, შენი ტახტი თაობიდან თაობამდეა.

²⁰სამუდამოდ რატომ დაგვივიწყე? ასე დიდხანს რად მიგვატოვე?

²¹შენკენ მოგვაბრუნე, უფალო, და მოვბრუნდებით! განგვიახლე დღეები, როგორც უწინ,

²²თუ საბოლოოდ მოგვიძულე და უზომოდ მრისხანებ ჩვენზე?