Read Traducción Kadosh Israelita Mesiánica ეზეკიელი 42 Bible Online

ეზეკიელი 42 - Traducción Kadosh Israelita Mesiánica bible

ეზეკიელი 42

¹გამომიყვანა გარე ეზოში ჩრდილოეთისკენ და შემიყვანა სენაკში, ტაძრის დერეფნისა და ჩრდილოეთისკენ მიმართული შენობის პირდაპირ რომ იყო.

²ჩრდილოეთ შესასვლელის სიგრძე - ასი წყრთა, ხოლო სიგანე ორმოცდაათი წყრთა იყო.

³ოც წყრთაზე შიდა ეზოში, გარე ეზოს ქვაფენილის გასწვრივ, დერეფანი იყო ერთმანეთის პირდაპირ სამ სართულზე.

⁴სენაკთა წინ გასასვლელი ათი წყრთის სიგანით ეზოს შიგნით, გზა - ერთი წყრთა; შესასვლელები ჩრდილოეთიდან ჰქონდა.

⁵ზედა სენაკები ვიწრო იყო დერეფნების გამო, რომელთაც მეტი ადგილი ეჭირათ შენობის ქვემო და შუა სართულებზე.

⁶რადგან სამ სართულიანი იყო და ეზოს სვეტების მსგავსი არ ჰქონდა; ამის გამო უფრო ვიწრო იყო დაბლითა და შუა სენაკებზე.

⁷გარე კედელს, სენაკების მხარეს რომ იყო გარე ეზოში, სენაკების წინ, სიგრძე ორმოცდაათი წყრთა ჰქონდა.

⁸რადგან გარე ეზოს სენაკების სიგრძე ორმოცდაათი წყრთა იყო, ხოლო ტაძრის პირდაპირ - ასი.

⁹ამ სენაკების ქვემოთ შემოსასვლელი იყო აღმოსავლეთიდან, გარე ეზოდან თუ მიადგებოდი.

¹⁰ეზოს კედლის სიგრძეზე აღმოსავლეთით, ტაძრის დერეფნის პირდაპირ და შენობის წინ სენაკები იყო.

¹¹მათ წინ გასავლელი ჩრდილოეთის სენაკების გასასვლელის მსგავსი იყო როგორც სიგრძითა და სიგანით, ისე გასასვლელებით, აგებულებითა და კარით.

¹²სამხრეთ სენაკების მსგავსი შესასვლელი იყო იმ გზის სათავეშივე, აღმოსავლეთის კედელს რომ მიუყვებოდა.

¹³მითხრა: "ჩრდილოეთისა და სამხრეთის სენაკები, დერეფნის წინ რომაა მოთავსებული, წმიდა სენაკებია; აქ ის მღვდლები უნდა ჭამდნენ, რომლებიც უფლის წმიდათა წმიდას უახლოვდებიან; წმიდათა წმიდაში ტოვებენ მსხვერპლებსა და პურეულ ძღვენს, ცოდვისა და დანაშაულის გამოსასყიდ შესაწირს, რადგან წმიდაა ეს ადგილი.

¹⁴მღვდლები რომ შევლენ, ამ წმიდა ადგილიდან გარე ეზოში მანამ არ უნდა გავიდნენ, სანამ აქ არ დატოვებენ სამოსელს, რომლითაც მსახურებენ, რადგან წმიდაა იგი. სხვა სამოსელი უნდა ჩაიცვან და ისე მიუახლოვდნენ იმ ადგილს, ხალხს რომ ეკუთვნის!”

¹⁵დაასრულა შიდა ტაძრის გაზომვა, აღმოსავლეთით მიმართული კარიბჭის გზით გამომიყვანა და ირგვლივ გაზომა.

¹⁶ლერწმის საზომით გაზომა აღმოსავლეთის მხარე - ხუთასი ლერწამი, ლერწმის საზომით გარშემო.

¹⁷გაზომა ჩრდილოეთის მხარე - ხუთასი ლერწამი, ლერწმის საზომით გარშემო.

¹⁸გაზომა სამხრეთის მხარე - ხუთასი ლერწამი, ლერწმის საზომით.

¹⁹მიტრიალდა ზღვის მხარეს და გაზომა - ხუთასი ლერწამი, ლერწმის საზომით.

²⁰ოთხი მხრიდან გაზომა გალავანი მის გარშემო, სიგრძე - ხუთასი, სიგანე - ხუთასი, რათა განესხვავებინა წმიდა უწმიდურისგან.