Read Traducción Kadosh Israelita Mesiánica ეზეკიელი 48 Bible Online

ეზეკიელი 48 - Traducción Kadosh Israelita Mesiánica bible

ეზეკიელი 48

¹ესაა ტომთა სახელები: ჩრდილოეთის კიდიდან ხეთლონის გზაზე ხამათისა და ჰაცარ-ყენანის შესასვლელისკენ, დამასკოს საზღვარზე, ჩრდილოეთისკენ, ჰამათის გვერდით ექნებათ ერთი საზღვარი - აღმოსავლეთიდან დასავლეთით, დანს ერთი ნაწილი.

²დანის საზღვართან, აღმოსავლეთიდან დასავლეთით, აშერს ერთი წილი.

³აშერის საზღვართან კი, აღმოსავლეთ კიდიდან დასავლეთ კიდემდე, ნაფთალს ერთი წილი.

⁴ნაფთალის საზღვართან, აღმოსავლეთ კიდიდან დასავლეთ კიდემდე, მენაშეს ერთი წილი.

⁵მენაშეს საზღვართან კი, აღმოსავლეთ კიდიდან დასავლეთ კიდემდე, ეფრემს ერთი წილი.

⁶ეფრემის საზღვართან, აღმოსავლეთ კიდიდან დასავლეთ კიდემდე, რეუბენს ერთი წილი.

⁷რეუბენის საზღვართან კი, აღმოსავლეთ კიდიდან დასავლეთ კიდემდე, იუდას ერთი წილი.

⁸იუდას საზღვართან, აღმოსავლეთ კიდიდან დასავლეთ კიდემდე შესაწირი იქნება, რომელსაც შესწირავთ: ოცდახუთი ათასი სიგანე, სიგრძე კი, სხვა მიწების მსგავსად აღმოსავლეთ კიდიდან დასავლეთ კიდემდე. საწმიდარი იქნება მის შუაგულში.

⁹შენაწირი, თქვენს უფალს რომ მიუძღვნით, სიგრძით ოცდახუთი ათასი იქნება და სიგანით - ათი ათასი.

¹⁰ეს იქნება წმიდა შენაწირი ღვთისმსახურთათვის: ჩრდილოეთით ოცდახუთი ათასი, დასავლეთით სიგანე ათი ათასი, აღმოსავლეთით სიგანე ათი ათასი, სამხრეთით კი სიგრძე ოცდახუთი ათასი. უფლის საწმიდარი მის შუაგულში იქნება.

¹¹წმიდა ღვთისმსახურთათვის ცადოკის ძეთაგან, რომლებმაც აღმისრულეს მოვალეობა და არ განმიდგნენ ისრაელის ძეთა განდგომისას, ლევიანთა მსგავსად;

¹²მათი წილი ლევიანთა საზღვართან, წმიდათა წმიდად შერაცხული შენაწირი მიწიდან იქნება.

¹³ლევიანთა წილი კი ღვთისმსახურთა საზღვრის მოპირდაპირედ იქნება, ოცდახუთი ათასი სიგრძით და ათი ათასი სიგანით. სრული სიგრძე ოცდახუთი ათასი და სიგანე ათი ათასი.

¹⁴არ უნდა გაყიდონ მისგან და არ გაცვალონ, არც ამ მიწის პირველნაყოფი გაასხვისონ, რადგან წმიდაა უფლისთვის.

¹⁵ხოლო დარჩენილი ხუთი ათასი სიგანით და ოცდახუთი ათასი სიგრძით ადგილია ქალაქის, გარეუბნებისა და მოედნისთვის; ქალაქი მის შუაგულში იქნება.

¹⁶ესაა მისი ზომები: ჩრდილოეთ მხარეს - ოთხიათას ხუთასი, სამხრეთ მხარეს - ოთხიათას ხუთასი, აღმოსავლეთ მხარეს - ოთხიათას ხუთასი და დასავლეთ მხარეს - ოთხიათას ხუთასი.

¹⁷ექნება ქალაქს შემოგარენი: ჩრდილოეთით - ორას ორმოცდაათი, სამხრეთით - ორას ორმოცდაათი, აღმოსავლეთით - ორას ორმოცდაათი და დასავლეთით - ორას ორმოცდაათი.

¹⁸დანარჩენი იმ მიწისა, რაც სიგრძეზე მორჩება, წმიდა შენაწირის პირდაპირ - ათი ათასი აღმოსავლეთით და ათი ათასი დასავლეთით, წმიდა შენაწირის პირდაპირ, ქალაქში მომუშავეთა სანოვაგედ იქნება.

¹⁹ქალაქში კი ისრაელის ყოველი ტომიდან შეეძლებათ მუშაობა.

²⁰მთელი წილი შემონაწირისა ოთხკუთხედად - ოცდახუთი ათასი ოცდახუთ ათასზე, წმიდის შესაწირად დაადგინეთ, ქალაქის მამულებთან ერთად.

²¹მონარჩენი კი მთავრისთვის იქნება, წმიდისთვის შენაწირის ორივე მხრიდან და ქალაქის მამულების მხრიდან ოცდახუთი ათას წყრთაზე, შენაწირის საზღვრამდე აღმოსავლეთით, დასავლეთისკენ ოცდახუთ ათასზე, დასავლეთის საზღვრის გასწვრივ, მთავრის წილი სხვათა წილების შესაბამისად. იქნება წმიდისთვის შენაწირი და საწმიდარი მის შუაგულში.

²²ლევიანთა ქონება და ქალაქის ქონება მთავრის კუთვნილი წილის შუაგულში იქნება, იუდას საზღვარსა და ბენიამინის საზღვარს შორის იქნება მთავრისთვის.

²³დანარჩენი ტომებისთვის კი აღმოსავლეთ კიდიდან დასავლეთ კიდემდე - ბენიამინს ერთი წილი.

²⁴ბენიამინის საზღვართან, აღმოსავლეთ კიდიდან დასავლეთ კიდემდე - სიმონს ერთი წილი.

²⁵სიმონის საზღვართან, აღმოსავლეთ კიდიდან დასავლეთ კიდემდე - ისაქარს ერთი წილი.

²⁶ისაქარის საზღვართან, აღმოსავლეთ კიდიდან დასავლეთ კიდემდე - ზებულუნს ერთი წილი.

²⁷ზებულუნის საზღვართან, აღმოსავლეთ კიდიდან დასავლეთ კიდემდე - გადს ერთი წილი.

²⁸გადის საზღვართან, სამხრეთით, თამარიდან მერიბათ-კადეშის წყლამდე, ხევის გასწვრივ, დიდ ზღვამდე, საზღვარი იქნება.

²⁹ესაა მიწა, რომელსაც გაუნაწილებთ ისრაელის ტომებს მემკვიდრეობად, ესაა მათი წილები!” - ამბობს უფალი ღმერთი.

³⁰"ესენია ქალაქის გასასვლელები - ჩრდილოეთის მხრიდან ოთხიათას ხუთასი წყრთა სიგრძეში.

³¹ისრაელის ტომთა სახელებით იწოდება ქალაქის კარიბჭენი: ჩრდილოეთით სამი კარიბჭე იქნება - რეუბენის კარიბჭე, იუდას კარიბჭე და ლევის კარიბჭე.

³²აღმოსავლეთის მხრიდან ოთხიათას ხუთასი წყრთა. სამი კარიბჭე იქნება: იოსების კარიბჭე, ბენიამინის კარიბჭე და დანის კარიბჭე.

³³სამხრეთის მხრიდან ოთხიათას ხუთასი წყრთა. სამი კარიბჭე იქნება: სიმონის კარიბჭე, ისაქარის კარიბჭე და ზებულუნის კარიბჭე.

³⁴დასავლეთის მხარე ოთხიათას ხუთასი წყრთა. სამი კარიბჭე იქნება: გადის კარიბჭე, აშერის კარიბჭე და ნაფთალის კარიბჭე.

³⁵გარშემოწერილობა თვრამეტი ათასი წყრთა იქნება. იმ დღიდან ქალაქს ერქმევა "უფალი არის იქ!”