Read Traducción Kadosh Israelita Mesiánica რიცხვნი 8 Bible Online

რიცხვნი 8 - Traducción Kadosh Israelita Mesiánica bible

რიცხვნი 8

¹უთხრა უფალმა მოსეს:

²ელაპარაკე აჰარონს და უთხარი: "ლამპრებს რომ აანთებ, სასანთლის წინ, შვიდი ლამპარი ანათებდეს”.

³ასე გააკეთა აჰარონმა: ისე აანთო ლამპრები, რომ სინათლე სასანთლის წინ ანათებდა, როგორც უბრძანა უფალმა მოსეს.

⁴ასეთი ნაკეთობის იყო სასანთლე: ნაჭედი ოქროსი იყო; ღეროდან ყვავილებამდე ნაჭედი იყო. ისეთი გააკეთა სასანთლე, როგორც უჩვენა უფალმა მოსეს, ისე გააკეთა იგი.

⁵უთხრა უფალმა მოსეს:

⁶"გამოიყვანე ლევიანები ისრაელის ძეთაგან და გაწმიდე ისინი.

⁷ასე მოიქეცი, რომ გაწმიდო ისინი: აპკურე მათ გამწმენდი წყალი, გაიპარსონ მთელი ტანი, გაირეცხონ სამოსელი და განიწმიდებიან.

⁸აიყვანონ ნორჩი მოზვერი და პურეული ძღვენი, ზეთში აზელილი გამტკიცული ფქვილი და მეორე ნორჩი მოზვერი ცოდვის შესაწირად.

⁹მიიყვანე ლევიანები საკრებულო კარვის წინ და შეკრიბე ისრაელის ძეთა მთელი თემი.

¹⁰წარადგინე ლევიანები უფლის წინაშე და ხელები დაასხან ლევიანებს ისრაელის შვილებმა.

¹¹წარადგენს აჰარონი ლევიანებს შესარხევ შესაწირად ისრაელის ძეთაგან უფლის წინაშე, რათა შეასრულონ მათ უფლის მსახურება.

¹²დაასხამენ ხელებს ლევიანები მოზვრებს თავზე და შესწირე ერთი ცოდვის მსხვერპლად, ხოლო მეორე სრულადდასაწველად უფლისთვის, ლევიანთა გამოსასყიდად.

¹³დააყენე ლევიანები აჰარონის წინაშე და მისი ძეების წინაშე და წარადგინე ისინი შესარხევ შესაწირად უფლისთვის.

¹⁴გამოყავი ლევიანები ისრაელის შვილებიდან და ჩემი საკუთრება იქნებიან ისინი.

¹⁵ამის შემდეგ შევლენ ლევიანნი სამსახურებლად საკრებულო კარავში, გაწმიდე ისინი და წარადგინე შესარხევ შესაწირად.

¹⁶რადგან ისრაელის შვილებიდან მომეცა ისინი, ყოველი საშოს გამღების, ისრაელის შვილთა ყოველი პირმშოს ნაცვლად ავიყვანე ისინი ჩემთვის.

¹⁷რადგან ჩემია ისრაელის შვილთა ყოველი პირმშო, ადამიანიდან პირუტყვამდე; იმ დღეს, როცა განვგმირე ყოველი პირმშო ეგვიპტის ქვეყანაში, ჩემთვის გამოვყავი ისინი;

¹⁸და ავიყვანე ლევიანები ყოველი პირმშოს ნაცვლად ისრაელის ძეთაგან.

¹⁹მივეცი ლევიანები აჰარონსა და მის ძეებს ისრაელის ძეთაგან, რათა შეასრულონ მსახურება ისრაელიანთათვის საკრებულო კარავში და შესწირონ მათთვის გამოსასყიდი; რათა არ იყოს ისრაელიანთა შორის მომსვრელი სენი, როცა კი მიეკარებიან საწმიდარს”.

²⁰ასე გააკეთეს მოსემ, აჰარონმა და ისრაელიანთა მთელმა თემმა ლევიანთათვის; ყოველივე, როგორც უბრძანა უფალმა მოსეს ლევიანთა შესახებ, ისე გააკეთეს მათთვის ისრაელიანებმა.

²¹განიწმიდნენ ლევიანები, გაირეცხეს სამოსელი და წარადგინა ისინი აჰარონმა უფლის წინაშე, როგორც ძვირფასი შესაწირი და შესწირა გამოსასყიდი აჰარონმა, რათა განეწმიდა ისინი.

²²ამის შემდეგ შევიდნენ ლევიანები თავისი მსახურების შესასრულებლად საკრებულო კარავში აჰარონისა და მისი ძეების წინაშე. როგორც უბრძანა უფალმა მოსეს ლევიანთა შესახებ, ისე მოექცნენ.

²³უთხრა უფალმა მოსეს:

²⁴"ესაა კანონი ლევიანთათვის: ოცდახუთი წლიდან მოყოლებული და უფროსი უნდა შეუდგეს საკრებულო კარავში სამსახურს.

²⁵მაგრამ ორმოცდაათი წლის ასაკიდან უნდა შეწყვიტოს სამსახური და აღარ იმსახუროს.

²⁶მხოლოდ მიეხმარონ თავიანთ ძმებს საკრებულო კარვის სიწმიდეების დაცვაში, ოღონდ სამსახურს ნუ გასწევენ. ასეთი მოვალეობა დაუდგინე ლევიანებს”.