Read Traducción Kadosh Israelita Mesiánica ზაქარია 5 Bible Online

ზაქარია 5 - Traducción Kadosh Israelita Mesiánica bible

ზაქარია 5

¹კვლავ აღვაპყარი თვალები და ვხედავ: აჰა, აფრიალებული გრაგნილი.

²მკითხა: რას ხედავ? მივუგე: აფრიალებულ გრაგნილს ვხედავ, სიგრძით ოცი წყრთაა, სიგანით - ათი წყრთა.

³მითხრა: "ეს არის წყევლა, რომელიც მთელი დედამიწის პირზე გადმოვა, ვინაიდან ყოველი ქურდი მოისპობა გრაგნილის ერთ გვერდზე დაწერილის მიხედვით და ყოველი ცრუმოფიცარი მოისპობა გრაგნილის მეორე გვერდზე დაწერილისამებრ.

⁴მე მოვავლენ - ამბობს ცაბაოთ უფალი - და შევა მპარავის სახლში და ჩემი სახელის ცრუდ მოფიცარის სახლში, ღამეს გაათევს და მოსპობს მას, მის ხესა და მის ქვას.

⁵გამოვიდა ანგელოზი, მე რომ მელაპარაკებოდა და მითხრა: აღაპყარი თვალები და ნახე, ეს რა არის, რომ გამოჩნდა?

⁶ვკითხე, რა არის-მეთქი? მიპასუხა: ეს საწყაული გამოჩნდა; კიდევ თქვა: ეს არის ცოდვა, რომლითაც აივსო მთელი ქვეყანა.

⁷და აჰა, ტყვიის სარქველმა აიწია და ერთი ქალი ზის შუაგულ საწყაულში.

⁸თქვა: ეს ქალი ბოროტებაა! ჩააგდო იგი საწყაულში და ტყვიის ზოდის სარქველი დაახურა.

⁹აღვაპყარი თვალები და დავინახე: აჰა, გამოჩნდა ორი ქალი, ქარი ჰქონდათ ფრთებში, ფრთებად კი წეროს ფრთები ჰქონდათ და ასწიეს საწყაული მიწასა და ცას შორის.

¹⁰ვკითხე ანგელოზს, მე რომ მელაპარაკებოდა: სად მიაქვთ-მეთქი ეს საწყაული?

¹¹მიპასუხა: შინყარის ქვეყანაში, ტაძარი რომ აუშენონ; როცა მზად იქნება, თავის კვარცხლბეკზე დაიდგმება იგი.