Read Traducción Kadosh Israelita Mesiánica ზაქარია 6 Bible Online

ზაქარია 6 - Traducción Kadosh Israelita Mesiánica bible

ზაქარია 6

¹კვლავ აღვაპყარი თვალები და აჰა, ოთხი ეტლი გამოდის ორ მთას შუა; ეს მთები სპილენძისა იყო.

²პირველ ეტლში წითელი ცხენები ება, მეორეში - შავი ცხენები.

³მესამე ეტლში - თეთრი ცხენები, მეოთხეში - ამლაყები, ძლიერი ცხენები.

⁴მივმართე და ვკითხე ჩემთან მოლაპარაკე ანგელოზს: რა არის ესენი, ბატონო ჩემო?

⁵მიპასუხა ანგელოზმა და მითხრა: ესენი ცის ოთხი სულია, მთელი ქვეყნის ბატონთან წარდგომის შემდეგ გამოდიან.

⁶შავცხენიანი ეტლები ჩრდილოეთის ქვეყნისკენ გამოდიან, თეთრები და მათ უკან ამლაყცხენებიანი - სამხრეთისკენ.

⁷გამოვიდნენ ძლიერნი და მოითხოვეს ქვეყნიერების შემოსავლელად წასვლა. უთხრა მათ: წადით, მოიარეთ ქვეყნიერება! და მათაც მოიარეს ქვეყნიერება.

⁸დამიძახა და მითხრა: ნახე, ჩრდილოეთის ქვეყნისკენ გამოსულებმა დაამშვიდეს ჩემი სული ჩრდილოეთის ქვეყანაში.

⁹და იყო უფლის სიტყვა ჩემდამი ნათქვამი:

¹⁰აიღე ოქრო-ვერცხლი განდევნილთაგან: ხელდაისგან, ტობიასგან, იედაყიასგან, მიდი იმავე დღეს და შედი იოშია სოფონიას ძის სახლში, სადაც ბაბილონიდან მივიდნენ.

¹¹აიღე ვერცხლი და ოქრო, გააკეთე გვირგვინი და თავზე დაადგი მღვდელმთავარს, იეშუა იეჰოცადაკის ძეს.

¹²ეტყვი, ასე ამბობს-თქო ცაბაოთ უფალი: აჰა, კაცი, მორჩია მისი სახელი. თავისი ადგილიდან აღმოცენდება და ააშენებს უფლის ტაძარს.

¹³ის ააშენებს უფლის ტაძარს და ატარებს სამეფო დიდებას! დაჯდება ტახტზე, იმეფებს და მღვდლობასაც გასწევს თავის ტახტზე! ერთმანეთთან შეთანხმებული იქნება ეს ორი მსახურება.

¹⁴ის გვირგვინები კი, ხელემისთვის, ტობიასთვის, იედაყიასთვის და ხენია სოფონიას ძისთვის იქნება სამახსოვროდ უფლის ტაძარში.

¹⁵მოვლენ შორეულნი და ააშენებენ უფლის ტაძარს. მაშინ მიხვდებით, რომ ცაბაოთ უფალმა წარმომგზავნა თქვენთან. ეს აღსრულდება, თუ ყურადღებით მოისმენთ უფლის, თქვენი ღმერთის ხმას.