Read Traducción Kadosh Israelita Mesiánica ლუკას სახარება 3 Bible Online

ლუკას სახარება 3 - Traducción Kadosh Israelita Mesiánica bible

ლუკას სახარება 3

¹ტიბერიუს კეისრის მეფობის მეთხუთმეტე წელს, როცა იუდეას პონტოელი პილატე განაგებდა, ჰეროდე გალილეას მეოთხედმთავარი იყო, მისი ძმა ფილიპე - იტირეასა და ტრაქონელთა ოლქის მეოთხედმთავარი, ხოლო ლისანისი - აბილინეს მეოთხედმთავარი.

²ანნასა და კაიაფას მღვდელმთავრობისას, ღმერთის სიტყვა იყო იოანე ზაქარიას ძისადმი, უდაბნოში.

³დადიოდა იგი იორდანეს მთელ მიდამოებში და ქადაგებდა სინანულის ნათლისცემას ცოდვათა მისატევებლად.

⁴როგორც ესაია წინასწარმეტყველის სიტყვათა წიგნშია დაწერილი: "ხმა მღაღადებლისა უდაბნოში, განუმზადეთ გზა უფალს, მოასწორეთ მისი ბილიკები.

⁵ყოველი ხევი ამოივსება, ყოველი მთა და ბორცვი დადაბლდება, მრუდე გაიმართება და ოღროჩოღრო გზა მოსწორდება.

⁶და ყოველი ხორციელი იხილავს ხსნას ღმერთისას”.

⁷ეუბნებოდა მოსანათლად მოსულ ხალხს: "იქედნეთა ნაშობნო, ვინ შთაგაგონათ რომ გაექცეთ მომავალ რისხვას?

⁸მაშ, გამოიღეთ მონანიების ღირსი ნაყოფი! და ნუ იფიქრებთ: მამად აბრაჰამი გვყავსო; ვინაიდან, გეუბნებით თქვენ, ღმერთს შეუძლია ამ ქვებიდანაც აღუდგინოს აბრაჰამს შვილები.

⁹ცულიც უკვე დევს ხეთა ფესვებთან. ყოველ ხეს, რომელიც კეთილ ნაყოფს არ გამოიღებს, მოჭრიან და ცეცხლში ჩააგდებენ”.

¹⁰და ეკითხებოდა მას ხალხი, მაშ რაღა ვქნათო?

¹¹ეუბნებოდა მათ პასუხად: "ვისაც ორი მოსასხამი აქვს, მისცეს უქონელს. ვისაც საზრდო აქვს, ისიც ასე მოიქცეს”.

¹²მებაჟეებიც მოვიდნენ მოსანათლად და ჰკითხეს მას: "მოძღვარო, რა ვქნათ?”

¹³ხოლო მან უპასუხა: "თქვენთვის დაწესებულზე მეტს ნურაფერს მოითხოვთ”.

¹⁴ჯარისკაცებიც ეკითხებოდნენ: "ჩვენ რაღა ვქნათ?” უთხრა მათ: "ნურავის შეავიწროვებთ, ცილს ნუ დასწამებთ და თქვენი ჯამაგირი იკმარეთ”.

¹⁵ხალხი მოლოდინში იყო და გულში ყველა ფიქრობდა იოანეზე - ქრისტე ხომ არ არისო.

¹⁶იოანე ყველას პასუხობდა: "მე წყლით გნათლავთ, მაგრამ მოდის ჩემზე ძლიერი, რომლის სანდლის თასმის გახსნის ღირსიც არა ვარ. ის მოგნათლავთ თქვენ სულიწმიდითა და ცეცხლით;

¹⁷მისი ფიწალი მის ხელთ არის, იგი გაწმედს თავის კალოს და ბეღელში მოაგროვებს ხორბალს, ბზეს კი ჩაუქრობელი ცეცხლით დაწვავს”.

¹⁸ბევრ სხვა რამესაც ახარებდა და შეაგონებდა ხალხს.

¹⁹მეოთხედმთავარმა ჰეროდემ კი, რომელსაც ამხელდა იგი მისი ძმის ცოლის ჰეროდიას და ყველა იმ ბოროტების გამო, რაც ჩაედინა,

²⁰ყოველივე ამას ისიც დაუმატა, რომ საპყრობილეში ჩასვა იოანე.

²¹როცა ინათლებოდა მთელი ხალხი და იესოც მოინათლა და ლოცულობდა, ზეცა გაიხსნა

²²და გადმოვიდა მასზე სულიწმიდა სხეულებრივად, როგორც მტრედი და გაისმა ხმა ზეცით: "შენ ხარ ძე ჩემი საყვარელი, რომელიც მოვიწონე მე”.

²³თვით იესო, როცა იწყებდა მსახურებას, ოცდაათი წლისა იქნებოდა, და, როგორც ფიქრობდნენ, იყო ძე იოსებისა, ყელისა,

²⁴მატთათისა, ლევისა, მელხისა, იანაისა, იოსებისა,

²⁵მატათიასი, ამოსისა, ნახუმისა, ხესლისა, ნაგაისა,

²⁶მახათისა, მატათიასი, შემეინისა, იოსებისა, იუდასი,

²⁷იოხანანისა, რესასი, ზერუბაბელისა, შეალთიელისა, ნერისა,

²⁸მელხისა, ადდისა, კოსამისა, ელმადამისა, ყერისა,

²⁹იესოსი, ელიეზერისა, იორიმისა, მატათისა, ლევისა,

³⁰სიმონისა, იუდასი, იოსებისა, იორამისა, ელიაკიმისა,

³¹მელეასი, მენასი, მატათასი, ნათანისა, დავითისა,

³²იესესი, ყობედისა, ბოყაზისა, სალმონისა, ნახშონისა,

³³ამინადაბისა, ადმინისა, არნისა, ხეცრონისა, ფერეცისა, იუდასი,

³⁴იაკობისა, ისაკისა, აბრაჰამისა, თერახისა, ნახორისა,

³⁵სერუგისა, რეგისა, ფელეგისა, ყებერისა, შელახისა,

³⁶კეინანისა, არფახშადისა, სემისა, ნოესი, ლამეხისა,

³⁷მეთუშელახისა, ხანოქისა, იარედისა, მაჰალალელისა, კეინანისა,

³⁸ენოშისა, შეთისა, ადამისა, ღმერთისა.