Read Traducción Kadosh Israelita Mesiánica მეორე რჯული 14 Bible Online

მეორე რჯული 14 - Traducción Kadosh Israelita Mesiánica bible

მეორე რჯული 14

¹"უფლის, თქვენი ღმერთის ძეები ხართ; მკვდრის გამო სხეულს ნუ დაისერავთ და თვალთა შორის ნუ გაიპარსავთ;

²რადგან წმიდა ხალხი ხართ უფლისთვის, თქვენი ღმერთისთვის; მან ამოგირჩიათ თავის ხალხად - ყველა ხალხთაგან, დედამიწის პირზე.

³სისაძაგლე არაფერი ჭამოთ.

⁴ამ ცხოველების ჭამა შეიძლება: ხარი, კრავი, ცხვარი, თხა,

⁵ირემი, ქურციკი, შველი, ჯიხვი, ანტილოპა, კამეჩი და ნიამორი.

⁶ყოველი ცხოველი, რომელსაც ორად გაყოფილი ჩლიქი და ორივე ჩლიქზე ღრმა ჭრილი აქვს და რომელიც იცოხნება - ჭამეთ.

⁷ოღონდ ნუ შეჭამთ მხოლოდ მცოხნელთაგან ან მხოლოდ ღრმა ჭრილით ორად გაყოფილ ჩლიქიანთაგან. ნუ შეჭამთ აქლემს, კურდღელს და ბოცვერს, რადგან კი იცოხნიან, მაგრამ ჩლიქი არა აქვთ ორად გაყოფილი - თქვენთვის უწმიდურნი არიან ისინი;

⁸და ღორი, რომელსაც ჩლიქი კი აქვს ორად გაყოფილი, მაგრამ არ იცოხნება - უწმიდურია თქვენთვის; მათი ხორცი არ ჭამოთ და ნურც მათ მძორს შეეხებით.

⁹შეგიძლიათ ჭამოთ ყველაფერი, რაც კი არსებობს წყალში, რასაც ფარფლი და ქერცლი აქვს;

¹⁰რასაც ფარფლი და ქერცლი არ აქვს - ნუ შეჭამთ, სუფთა არ არის იგი თქვენთვის.

¹¹ჭამეთ ყოველი სუფთა ფრინველი;

¹²არ უნდა შეჭამოთ: არწივი, ორბი, სვავი,

¹³ძერა, შევარდენი, სონღული თავისი გვარებით,

¹⁴არც ერთი სახის ყორანი,

¹⁵სირაქლემა, ბუ, თოლია, ქორი თავისი გვარებით,

¹⁶კიოტა, ბუკნაჭო, ჭოტი,

¹⁷ვარხვი, ფსოვი, თევზიყლაპია,

¹⁸ყარყატი, ყანჩა თავისი გვარებით, ოფოფი და ღამურა.

¹⁹ყოველი ფრთოსანი მწერი უსუფთაოა თქვენთვის, არ ჭამოთ.

²⁰ყოველი სუფთა ფრინველი ჭამეთ.

²¹არავითარი ლეში არ ჭამოთ; თქვენს შორის მყოფ მდგმურს მიეცით და ჭამოს, ან უცხოელს მიჰყიდეთ; რადგან წმიდა ხალხი ხართ უფლისთვის, თქვენი ღმერთისთვის. ნუ მოხარშავთ თიკანს თავისი დედის რძეში.

²²ყოველწლიურად მინდვრის ნათესის მთელი მოსავლის მეათედი გამოყავით,

²³და ჭამეთ უფლის, თქვენი ღმერთის წინაშე იმ ადგილას, რომელსაც თვითონ ამოირჩევს თავისი სახელის დასამკვიდრებლად: თქვენი მარცვლეულის, ღვინის და ზეთის მეათედი; თქვენი საქონლისა და ფარის პირველმონაგებნი, რათა ისწავლოთ უფლის, თქვენი ღმერთის შიში სამუდამოდ.

²⁴თუ შორია გზა თქვენგან და ვერ შეძლებთ მის ზიდვას, იმ ადგილის სიშორის გამო, რომელიც ამოირჩია უფალმა, თქვენმა ღმერთმა, როდესაც გაკურთხებთ უფალი, ღმერთი თქვენი,

²⁵მაშინ ფულზე გადაცვალეთ, აიღეთ ეს ფული და წადით იმ ადგილზე, რომელიც ამოირჩია უფალმა, თქვენმა ღმერთმა;

²⁶შეიძინეთ ამ ფულით ყველაფერი, რასაც ისურვებთ: ძროხა, ცხვარი, ღვინო თუ მაგარი სასმელი, ყველაფერი, რასაც ინატრებთ და ჭამეთ იქ უფლის, თქვენი ღმერთის წინაშე და გაიხარეთ თქვენ და თქვენმა სახლეულმა.

²⁷არ მიატოვოთ თქვენს მხარეში მყოფი ლევიანი, ვინაიდან წილი და სამკვიდრებელი არა აქვს მას თქვენთან.

²⁸სამი წლის მიწურულს გამოიტანეთ იმ წლის მოსავლის მეათედი და დადეთ კარიბჭესთან.

²⁹მოვა ლევიანი, რადგან არა აქვს მას წილი და სამკვიდრებელი თქვენთან, მოვა მწირი, ობოლი და ქვრივი, რომლებიც თქვენთან ცხოვრობენ, ჭამენ და გაძღებიან, რათა გაკურთხოთ უფალმა, თქვენმა ღმერთმა, ყოველ საქმეში, რომლისკენაც ხელს გაიწვდი.