Read Traducción Kadosh Israelita Mesiánica 1 თესალონიკელთა მიმართ 5 Bible Online

1 თესალონიკელთა მიმართ 5 - Traducción Kadosh Israelita Mesiánica bible

1 თესალონიკელთა მიმართ 5

¹ხოლო დროზე და ვადებზე საჭირო არ არის რაიმე მოგწეროთ, ძმებო,

²ვინაიდან თქვენ თვითონაც დანამდვილებით იცით, რომ უფლის დღე ისე მოვა, როგორც ქურდი ღამით.

³რადგან როცა იტყვიან: მშვიდობა და უსაფრთხოებააო, მაშინ დაატყდებათ თავს მოულოდნელად განადგურება, როგორც ფეხმძიმეს მშობიარობის ტკივილები, და ვერ დააღწევენ თავს.

⁴მაგრამ, თქვენ, ძმებო, სიბნელეში არ იმყოფებით, რომ ქურდივით წამოგეწიოთ დღე.

⁵ვინაიდან თქვენ ყველანი სინათლის შვილები ხართ და დღის შვილები; არც ღამისანი ვართ და არც სიბნელისა.

⁶ამიტომ ნუ დავიძინებთ, როგორც სხვები, არამედ გვეღვიძოს და ვიფხიზლოთ.

⁷ვინაიდან მძინარეებს ღამღამობით სძინავთ და ლოთები ღამით თვრებიან.

⁸მაგრამ ჩვენ, რაკი დღის შვილები ვართ, ვიფხიზლოთ და შევიმოსოთ რწმენისა და სიყვარულის აბჯარი და ხსნის იმედის მუზარადი.

⁹რადგან ღმერთმა რისხვისთვის კი არ დაგვადგინა, არამედ ხსნის მისაღებად ჩვენი უფლის იესო ქრისტეს მეშვეობით,

¹⁰რომელიც ჩვენთვის მოკვდა, რათა ჩვენ, გვღვიძავს თუ გვძინავს, მასთან ერთად ვიცოცხლოთ.

¹¹ამიტომ შეაგონეთ ერთმანეთს, და აღაშენეთ ერთმანეთი, როგორც იქცევით კიდეც.

¹²გთხოვთ ძმებო, პატივი ეცით მომსახურეთ თქვენ შორის, თქვენს წინამძღოლთ უფალში და თქვენს დამრიგებელთ;

¹³უაღრესი სიყვარული გამოიჩინეთ მათდამი, მათი საქმის გამო; მშვიდობა გქონდეთ ერთმანეთში;

¹⁴და, აჰა, შეგაგონებთ თქვენ, ძმებო, დაარიგეთ უწესონი, ანუგეშეთ სულმოკლენი, მხარი დაუჭირეთ უძლურებს და სულგრძელნი იყავით ყველას მიმართ.

¹⁵თვალი გეჭიროთ, რომ ბოროტის წილ ვინმეს ბოროტი არავინ მიაგოს; არამედ მუდამ ეცადეთ სიკეთეს მისდიოთ, ერთმანეთის მიმართ იქნება ეს, თუ ყველას მიმართ.

¹⁶იხარეთ მუდამ.

¹⁷ილოცეთ განუწყვეტლივ.

¹⁸მადლიერნი იყავით ყველაფრისთვის, რადგან ეს არის ღმერთის ნება თქვენთვის ქრისტე იესოში.

¹⁹სულს ნუ ჩააქრობთ.

²⁰წინასწარმეტყველებას ნუ დაამცირებთ,

²¹არამედ ყველაფერი გამოსცადეთ და კეთილს ჩაეჭიდეთ.

²²ერიდეთ ყოველგვარ ბოროტებას.

²³თავად მშვიდობის ღმერთმა კი წმიდაგყოთ სრულად და მთლიანად, რათა თქვენი სული, სამშვინველი და სხეული დაცულ იქნეს უბიწოდ ჩვენი უფლის იესო ქრისტეს მოსვლისთვის.

²⁴ერთგულია, ვინც მოგიწოდათ, რომელიც აღასრულებს კიდეც ამას.

²⁵ძმებო, ილოცეთ ჩვენთვის.

²⁶მოიკითხეთ ყველა ძმა წმიდა ამბორით.

²⁷გაფიცებთ უფალს, ეს წერილი ყველა ძმას წაუკითხეთ.

²⁸ჩვენი უფლის იესო ქრისტეს მადლი თქვენთან, ამინ!