Read ადიშის ოთხთავი 897 წ. – ძველი მონუსკრიპტები მოციქულთა საქმეები 18 Bible Online

მოციქულთა საქმეები 18 - ადიშის ოთხთავი 897 წ. – ძველი მონუსკრიპტები bible

მოციქულთა საქმეები 18

¹ამისა შემდგომად გამოვიდა პავლე ათენელთა მათგან და მოვიდა კორინთედ.

²და პოვა ვინმე ჰურიაჲ, სახელით აკჳლა, პონტიელი ნათესავით, რამეთუ მაშინ ოდენ მოსრულ იყო იტალიაჲთ, და პრისკილა, ცოლიმისი, _ რამეთუ ებრძანა კლავდის კეისარსა გამოშორებად ყოველნი ჰურიანი ჰრომით, _ მოვიდა მათა,

³რამეთუ ერთი ჴელოვნებაჲ იცოდეს, იყოფოდა მათ თანა და იქმოდა, რამეთუ იყვნეს მეპრატაკე ხუროებით.

⁴და ეტყოდა შესაკრებელსა მას ყოველსა შაბათსა, არწმუნებდა ჰურიათა და წარმართთა.

⁵და ოდეს მოვიდეს მაკედონიაჲთ შილა და ტიმოთე, აწუევდა სული პავლეს და უწამებდა ჰურიათა მათ, ვითარმედ არს იესუ ქრისტჱ.

⁶ხოლო იგინი ვითარცა უჴდებოდეს და ჰგმობდეს, განიყარა მათ ზედა სამოსელი მისი და ჰრქუა მათ: "სისხლი თქუენი თავსა თქუენსა!უბრალომცა ვარი მე! ამიერითგან წარმართთა მივიდე".

⁷და წარმოვიდა მიერ და შევიდა სახლსა ვისსამე, რომელსა სახელი ერქუა ტიტეოს, ძისა იუსტჱსა, ღმრთისმსახურისა, რომლისა სახლიეზღუანვოდა შესაკრებელსა მას.

⁸კრისპოს, შესაკრებელისა მის მთავრისა, ჰრწმენა უფალი ყოვლითურთ სახლეულით მისით. მრავალნი კორინთელნი ისმენდეს მისსა,და ჰრწმენა და ნათელ-იღებდეს.

⁹ჰრქუა უფალმან ღამჱ ჩუენებით პავლეს: "ნუ გეშინინ, არამედ იტყოდე და ნუ სდუმი,

¹⁰რამეთუ მე ვარ შენ თანა და არავინ შეგახოს შენ ბოროტის-ყოფად შენდა, რამეთუ ერი მრავალი არს ჩემდა ამას ქალაქსა შინა".

¹¹და დაყო მუნ ერთ წელ და ექუს თთუე და ასწავებდა მათ შორის სიტყუასა მას ღმრთისასა.

¹²ხოლო გალიოს მთავარი იყო აქაიაჲსაჲ, ზედა მიუჴდეს ერთბამად ყოველნი ჰურიანი პავლეს და მოიყვანეს იგი საყდარსა წინაშე

¹³და იტყოდეს, ვითარმედ: "თჳნიერ შჯულისა ურჩ იქმს ესე კაცთა მსახურებად ღმრთისა".

¹⁴და ვითარცა ეგულებოდა პავლეს აღებად პირისა, ჰრქუა გალიონ ჰურიათა მათ: "უკუეთუმცა რაჲმე იყო შეცოდებათაგან ძჳრისსაქმჱ,ჰურიანო, სიტყჳსაებრმცა თქუენისა თავს-ვიდევ თქუენი;

¹⁵უკუეთუ ძიება რაჲმე არს სიტყჳსათჳს და სახელებისა და შჯულისა თქუენისათჳს, თქუენ იხილეთ, რამეთუ მსაჯულ მეეგევითარისათჳს არა მნებავს ყოფად".

¹⁶და წარასხნა იგინი საყდრისაგან.

¹⁷მაშინ შეიპყრეს ყოველთა წარმართთა სუსთენე შესაკრებელისმთავარი და სცემდეს საყდარსა წინაშე; და მათი არარაჲ იხარკა გალიონ.

¹⁸ხოლო პავლე დაადგრა მუნ მრავალ დღე და ძმათაგან იჯმნა, და განვიდა ნავითა ასურეთა, და მის თანა პრისკილა და აკჳლა. იკუეცამან თმაჲ კენქრეს, რამეთუ აღთქუმაჲ აღეთქუა.

¹⁹მიიწია ეფესოდ, იგინი დაუტევნა მუნ, და იგი შევიდა შესაკრებელსა და ეტყოდა ჰურიათა.

²⁰ჰლოცვიდეს რაჲ იგინი, რაჲთამცა დაადგრა მუნ, არა ინება,

²¹არამედ იჯმნა მათგან და თქუა: "კუალად მოვიდე ნებითა ღმრთისაჲთა". შევიდა ნავსა ეფესოჲთ

²²და შთავიდა კესარიად; აღვიდა და მოიკითხა ეკლესიაჲ და წარვიდა ანტიოქიად.

²³და დაყო ჟამი რავდენიმე და განვიდა, და მიმოვიდოდა და შემდგომითი-შემდგომად გალატიაჲსა სოფლებსა და ფრიგჳასასა დაგანამტკიცებდა ყოველთა მოწაფეთა.

²⁴ჰურიაჲ ვინმე იყო, აპელჱ სახელი მისი, ალექსანდრელი ნათესავით, კაცი სიტყუამეცნიერი, მივიდა ეფესოდ, ძლიერ იყო წიგნთასა.

²⁵ესე იყო სწავლულ გზასა უფლისასა და მდუღარე სულითა იტყოდა და ასწავებდა ჭეშმარიტად იესუჲსთჳს, და იცოდა ნათლის-ცემაჲხოლო იოჰანჱსი.

²⁶და ამან იწყო განცხადებაჲ შესაკრებელსა შორის. ესმა მისი აკჳლას და პრისკილას, და მოიყვანეს იგი და უჭეშმარიტჱსადრე უთხრესმას გზაჲ იგი ღმრთისაჲ.

²⁷და ვითარ ეგულებოდა მას აქაიად წიაღსლვაჲ, უბრძანეს ძმათა მოწაფეთა მათ შეწყნარებაჲ მისი, რომელი მივიდა და შეეწეოდა მათმორწმუნეთა მათ მადლითა მით,

²⁸რამეთუ მაგრიად ჰურიათა მათ ამხილებდა ერსა და აჩუენებდა წიგნთასა, ვითარმედ არს ქრისტჱ იესუ.