Read ადიშის ოთხთავი 897 წ. – ძველი მონუსკრიპტები მოციქულთა საქმეები 24 Bible Online

მოციქულთა საქმეები 24 - ადიშის ოთხთავი 897 წ. – ძველი მონუსკრიპტები bible

მოციქულთა საქმეები 24

¹შემდგომად ხუთისა დღისა შთავიდა მღდელთმოძღუარი ანანია ხუცესთა ვიეთმე თანა და ტერტჳლოს ჯადაგოჲს ვისთანამე,რომელთა აუწყეს მთავარსა მას.

²და ვითარცა მოუწოდეს მას, იწყო ტერტჳლოს შესმენად მისა და თქუა:

³მრავალსა მშჳდობასა შინა ვართ შენ ძლით და განგებულებასა,რომელ იქნების ნათესავსა მას შინა შენითა განზრახვითა,

⁴სადავე და ყოველთა ადგილთა შეუწყნარებთ, მჴნეო ფელიქს, ყოვლითა მადლობითა.

⁵გლოცავ, რაჲთა არა უფროჲს დაგაშრო შენ, ისმინე ჩუენი ადრე შენითა სახიერებითა.

⁶რამეთუ ვპოვეთ კაცი ესე ბილწი და რომელი ჰყოფდა შფოთსა ყოველთა შორის ჰურიათა, რომელნი არიან ყოველსა სოფელსა,წინამძღუარი გალილეველთა წვალებისაჲ,

⁷რომელმან ბაგინსაცა აზმნა შეგინებად, რომელი შე-ცა-ვიპყართ,

⁸რომლისა შემძლებელ ხარ შენ განკითხვად ყოვლისა ამის ცნობად, რომლისათჳს ჩუენ შეგასმენთ მაგას".

⁹ეწამებოდეს მას სხუანიცა ჰურიანი და იტყოდეს, ვითარმედ ეგრე არს.

¹⁰მიუგო პავლე წამის-ყოფითა მით მთავრისაჲთა და თქუა: "მრავლით წლითგან გიცოდე შენ მსაჯულად ნათესავისა ამის,გულსმოდგინედ თავისა ჩემისა სიტყუაჲ მიუგო.

¹¹რომლისა შემძლებელ ხარ შენ გულისხმის-ყოფად, რამეთუ არა უმრავლჱს არს ჩემი ათორმეტისა დღისა, ვინაჲთგან აღვედ მეთაყუანის-ცემად იერუსალჱმდ.

¹²და არცა ბაგინსა შინა მპოვეს მე, ვითარმცა ვეტყოდე ვისმე გინათუ ერის კრებას ვჰყოფდ, არცა შესაკრებელთა შორის და არცა ქალაქსაშინა.

¹³არცა აჩინონ შენ წინაშე, რომლისათჳს აწ შემასმენენ მე.

¹⁴ხოლო ესე აღგიარო შენ, რამეთუ გზასა ზედა, რომელსა-ეგე იტყჳან წვალებასა, ესრჱთ ვმსახურებ მამათა ღმერთსა და მრწამს ყოველი,რომელი წინაჲსწარმეტყუელთა წერილ არს.

¹⁵და სასოებაჲ მაქუს ღმრთისა მიმართ, რომელსაცა ეგენი მოელიან, აღდგომაჲ ყოფად არს მართალთაჲ და ცოდვილთაჲ.

¹⁶ამას ზედაცა მე ვშურები და დაუპკოლებელი გონებაჲ მაქუს ღმრთისა მიმართ და კაცთა მარადის.

¹⁷და მრავლისა წლისა შემდგომად ქველისსაქმის-ყოფად ნათესავისა ჩემისათჳს მოსრულ ვიყავ და შესაწირავისა,

¹⁸რომელთა მპოვეს მე განწმედილი ბაგინთა შორის, არა ერითა, არცა შფოთითა,

¹⁹არამედ ასიაჲთ ვინმე ჰურიანი, რომელთაჲ ჯერ-იყო შენ წინაშე მოსლვაჲ და შესმენაჲ, რაჲ-იგი აქუს ჩემდა მომართ სიტყუად.

²⁰ანუ მაგათ თჳთ თქუედ, რაჲ პოვეს ჩემ თანა ბრალი, ვდეგ რაჲ-იგი კრებულსა შორის,

²¹ანუ ერთისა მის სიტყჳსათჳს, რომელ ღაღად-ვყავ, მათ შორის რაჲ-იგი ვდეგ, ვითარმედ: "აღდგომისათჳს მკუდართაჲსა ვისაჯები მეთქუენ მიერ"".

²²დრო-უყო ფელიქს, ჭეშმარიტად იცოდა გზისა მისთჳს, და თქუა: "რაჟამს ლუსია ათასისთავი მოვიდეს, მაშინ ვიკითხო თქუენთჳს".

²³და უბრძანა ასისთავსა მას დამარხვაჲ მისი და რაჲთა იყოს იგი მოლხინედ და ნუ ვინ აყენებნ თჳსთა მისთა მსახურებად მისა.

²⁴შემდგომად რავდენთამე დღეთა მოვიდა ფელიქს დროსილჱს თანა, ცოლისა თჳსისა, რომელი იყო ჰურიაჲ, და მოუწოდა პავლეს დაისმინა მისი ქრისტე იესუჲს მიმართ სარწმუნოებისათჳს.

²⁵და ვითარ ეტყოდა იგი სიმართლისათჳს და მოთმინებისა და საშჯელისათჳს მერმისა, შეეშინა ფელიქსს და ჰრქუა: "აწ კმა არს,წარვედ და ჟამსა მოცალესა მოგიწოდი შენ".

²⁶ამას თანა ჰგონებდა, ვითარმედ ფასი მოიღოს მან პავლჱსგან. ამისთჳსცა ზედაჲსზედა მოუწესნ და ზრახავნ მას.

²⁷ვითარცა ორი წელი აღესრულა, მოუჴდა მსახური ფელიქს პორტიელი ფესტოს, უნდა მომადლებაჲ ჰურიათაჲ ფელიქს, და დაუტევაპავლე კრული.