Read ადიშის ოთხთავი 897 წ. – ძველი მონუსკრიპტები რომაელთა მიმართ 10 Bible Online

რომაელთა მიმართ 10 - ადიშის ოთხთავი 897 წ. – ძველი მონუსკრიპტები bible

რომაელთა მიმართ 10

¹ძმანო, ნებაჲ გულისა ჩემისაჲ და ვედრებაჲ ჩემი ღმრთისა მიმართ მათთჳს არს საცხოვრებელად.

²და ვეწამები მათ, რამეთუ შური საღმრთოჲ აქუს, არამედ არა მეცნიერებით.

³რამეთუ უმეცარ იყვნეს იგინი სიმართლესა მას ღმრთისასა და თჳსსა მას ეძიებდეს დამტკიცებად და სიმართლესა ღმრთისასა არადაემორჩილნეს,

⁴რამეთუ დასასრული შჯულისაჲ ქრისტე არს მაცხოვრად ყოვლისა მორწმუნისა.

⁵რამეთუ მოსე ესრე დაწერა, ვითარმედ: სიმართლჱ შჯულისაგანი რომელმან ქმნეს კაცმან, ცხოვნდეს მას შინა.

⁶ხოლო სარწმუნოებისაგან სიმართლისათჳს ესრე იტყჳს: ნუ იტყჳ გულსა შენსა, ვითარმედ: ვინ აღვიდეს ცად? ესე იგი არს,ქრისტჱსი გარდამოყვანებაჲ.

⁷ანუ: ვინ შთავიდეს უფსკრულად? ესე იგი არს, ქრისტჱსი მკუდრეთით აღმოყვანებაჲ.

⁸არამედ რასა-იგი იტყჳს: მახლობელ არს სიტყუაჲ იგი პირსა შენსა და გულსა შენსა, ესე იგი არს, სიტყუაჲ სარწმუნოებისაჲ, რომელსავქადაგებთ,

⁹ვითარმედ აღ-თუ-იარო პირითა შენითა უფალი იესუ და გრწმენეს გულითა შენითა, რამეთუ ღმერთმან აღადგინა იგი მკუდრეთით,სცხოვნდე.

¹⁰რამეთუ გულსა გრწამს სიმართლედ და პირითა აღიარებ საცხოვრებელად.

¹¹რამეთუ იტყჳს წიგნი: ყოველსა რომელსა ჰრწმენეს მისი, არასადა ჰრცხუენეს.

¹²რამეთუ არა არს განწვალება ჰურიაჲსა და წარმართისა, რამეთუ თავადი არს უფალი ყოველთაჲ, რომელი განამდიდრებს ყოველთა,რომელნი ჰხადიან მას.

¹³ყოველმან რომელმან ჰხადოს სახელსა უფლისასა, ცხოვნდეს.

¹⁴ვითარ-მე უკუე ჰხადონ, რომელ-იგი არა ჰრწმენა? ვითარ-მე უკუე ჰრწმენეს, რომლისაჲ არა ისმინეს? ანუ ვითარ-მე ისმინონ თჳნიერქადაგებისა?

¹⁵ანუ ვითარ-მე ქადაგებდენ, არა თუ ვინ წარავლინნეს? ვითარცა წერილ არს: ვითარ შუენიერ არიან ფერჴნი მახარებელთა მათმშჳდობისათანი, რომელნი ახარებენ კეთილსა!

¹⁶არამედ არა ყოველთა ისმინეს სახარებისაჲ მის. ესაია იტყჳს: უფალო, ვის-მე ჰრწმენა სასმენელი ჩუენი?

¹⁷აწ უკუე სარწმუნოებაჲ სმენისაგან არს, ხოლო სმენაჲ -- სიტყჳთა ღმრთისაჲთა.

¹⁸არამედ ვთქუა-ვე: ნუუკუე არა ესმაა? ვითარმედ ყოველსა ქუეყანასა განჴდა ჴმაჲ მათი და კიდეთა სოფლისათა -- სიტყუანი მათნი.

¹⁹არამედ ვიტყჳ: ნუუკუე ისრაჱლმან არა იცნაა? პირველად მოსე იტყჳს: მე ვაშურო მათ არა ნათესავსა მას ზედა და ნათესავითა მითუგულისხმოჲთა განვარისხნე იგინი.

²⁰ესაია იკადრებს და იტყჳს: ვეპოე მათ, რომელნი მე არა მეძიებდეს, და განვეცხადე მათ, რომელნი მე არა მიკითხვიდეს.

²¹ხოლო ისრაჱლისათჳს ესრე იტყჳს: დღესა ყოველსა განვიპყრენ ჴელნი ჩემნი ერისა მიმართ ურჩისა და მაცილობელისა.