Read ადიშის ოთხთავი 897 წ. – ძველი მონუსკრიპტები რომაელთა მიმართ 12 Bible Online

რომაელთა მიმართ 12 - ადიშის ოთხთავი 897 წ. – ძველი მონუსკრიპტები bible

რომაელთა მიმართ 12

¹გლოცავ თქუენ, ძმანო, მოწყალებითა ღმრთისაჲთა, წარუდგინენით ჴორცნი ეგე თქუენნი მსხუერპლად ცხოველად, წმიდად, სათნოდღმრთისა მეტყუელი ეგე მსახურებაჲ თქუენი.

²და ნუ თანა-ხატ ექმნებით სოფელსა ამას, არამედ მიიცვალენით განახლებითა მით გონებისა თქუენისაჲთა, რაჲთა გამოიცადოთ თქუენ, რაჲ-იგი არს ნებაჲ ღმრთისაჲ: კეთილ, სათნო და სრულ.

³რამეთუ ვიტყჳ მადლითა მით, რომელ მოცემულ არს ჩემდა ყოველსა მას, ვინცა-იგი არს თქუენ შორის: ნუ უფროჲს ბრძნობნუმეტჱს ჯერისა მის, არამედ ბრძნობდინ სიწმიდესა, და კაცად-კაცადსა, ვითარცა ღმერთმან განუყო საზომითა მით სარწმუნოებისაჲთა.

⁴ვითარცა-იგი ერთსა მას გუამსა მრავალ ასოებ აქუს, ხოლო ასოებსა მას ყოველსა არა იგივე საქმჱ აქუს,

⁵ეგრეცა ჩუენ ყოველნი ერთ გუამ ვართ ქრისტჱს მიერ, ხოლო თითოეულად ურთიერთას ასოებ ვართ.

⁶რამეთუ მაქუს ჩუენ ნიჭი იგი მადლითა მით ღმრთისაჲთა თითო-სახედ, გინა თუ წინაჲსწარმეტყუელებაჲ შემსგავსებულად საზომისა მისსარწმუნოებისა,

⁷გინა რომელი ჰმსახურებდეს -- მსახურებითა მით;

⁸გინა რომელი ნუგეშინის-სცემდეს -- ნუგეშინის-ცემითა მით; რომელი მისცემდეს -- უხუებით; რომელი ზედა-ადგრებოდის -- მოწრაფებით;რომელი სწყალობდეს -- მხიარულებით,

⁹სიყუარულითა შეუორგულებელითა, განეშოვრენით ბოროტსა და შეეყვენით კეთილსა;

¹⁰ძმათ მოყუარებითა ურთიერთას სურვიელად მოყუარე იყვენით; პატივის-ცემითა ურთიერთსა უსწრობდით;

¹¹წრაფასა ნუ მცონარე ხართ. სულითა მდუღარე იყვენით; უფალსა ჰმონებდით;

¹²სასოებასა გიხაროდენ, ჭირსა დაუთმეთ, ლოცვასა განკრძალულ იყვენით;

¹³ჴსენებასა წმიდათასა ეზიარებოდეთ, სტუმართ მოყუარებასა შეუდეგით;

¹⁴აკურთხევდით მდევართა თქუენთა, აკურთხევდით და ნუ სწყევთ;

¹⁵გიხაროდენ მოხარულთა თანა და ტიროდეთ მტირალთა თანა;

¹⁶და მასვე ურთიერთას ზრახევდით; ნუ მაღალსა მას ჰზრახავთ, არამედ მდაბალთა მათ შეეყვენით;

¹⁷და ნუვინ ბოროტსა ბოროტისა წილ მიაგებთ; წინაჲსწარ განიზრახევდით კეთილსა წინაშე ღმრთისა და კაცთა.

¹⁸უკუეთუ შესაძლებელ არს თქუენ მიერ, ყოველთა კაცთა თანა მშჳდობასა ჰყოფდით.

¹⁹ნუ თავით თჳსით შურსა ეძიებთ, საყუარელნო, არამედ ეცით ადგილ რისხვასა, ვითარცა წერილ არს: ჩემი არს შურის-გებაჲ, და მე მივაგო,იტყჳს უფალი.

²⁰არამედ ჰშიოდის თუ მტერსა შენსა, პური ეც მას; სწყუროდის თუ, ასუ მას; ესე რაჲ ჰყო, ნაკუერცხალი ცეცხლისაჲ შეჰკრიბო თავსამისსა.

²¹ნუ იძლევი ბოროტისაგან, არამედ სძლე კეთილითა მით ბოროტსა მას.