Read ადიშის ოთხთავი 897 წ. – ძველი მონუსკრიპტები რომაელთა მიმართ 15 Bible Online

რომაელთა მიმართ 15 - ადიშის ოთხთავი 897 წ. – ძველი მონუსკრიპტები bible

რომაელთა მიმართ 15

¹თანა-გუაც ჩუენ ძლიერთა უძლურებანი იგი უსუსურთანი ტჳრთვად და ნუ ხოლო თავთა თჳსთა სათნო-ყოფად,

²არამედ კაცად-კაცადი ჩუენი მოყუასსაცა სათნო-ეყოფოდენ კეთილისათჳს აღსაშჱნებელად.

³რამეთუ ქრისტჱცა არა თავსა თჳსსა სათნო-ეყო, არამედ ვითარცა წერილ არს: ყუედრებანი მაყუედრებელთა შენთანი დამეცნეს ჩემ ზედა.

⁴რამეთუ რაოდენნი-იგი წინაჲსწარ დაიწერნეს, ჩუენდა სამოძღურებელად დაიწერნეს, რაჲთა მოთმინებითა მით და ნუგეშინის-ცემითაწიგნთაჲთა სასოებაჲ გუაქუნდეს.

⁵ხოლო ღმერთმან მოთმინებისამან და ნუგეშინის-ცემისამან მოგეცინ თქუენ იგივე ზრახვად ურთიერთას ქრისტე იესუჲს მიმართ,

⁶რაჲთა ერთბამად ერთითა პირითა ადიდებდეთ ღმერთსა და მამასა უფლისა ჩუენისა იესუ ქრისტჱსსა.

⁷ამისთჳს შეიწყნარებდით ურთიერთას, ვითარცა-იგი ქრისტემან შეგიწყნარნა თქუენ სადიდებელად ღმრთისა.

⁸რამეთუ ვიტყჳ ქრისტესა, მსახურ-ყოფილს წინადაცუეთილებისა ჭეშმარიტებისათჳს ღმრთისაჲსა, რაჲთა მტკიცე იყოს აღთქუმაჲ იგიმამათაჲ,

⁹ხოლო წარმართნი -- წყალობისათჳს დიდებად ღმრთისა, ვითარცა წერილ არს: ამისთჳს აღგიარო შენ წარმართთა შორის დასახელსა შენსა უგალობდე.

¹⁰და მერმე იტყჳს: იხარებდით წარმართნი ერისა მისისა თანა.

¹¹და კუალად იტყჳს: აქებდით ყოველნი თესლნი უფალსა, და უგალობდით მას ყოველი ერი.

¹²და მერმე ესაია იტყჳს: და იყოს ძირი იგი იესჱსი, და რომელ-იგი აღდგომად არს მთავრად წარმართთა, და მას წარმართნი ესვიდენ.

¹³ხოლო ღმერთმან სასოებისამან აღგავსენინ თქუენ ყოვლითა სიხარულითა და მშჳდობითა სარწმუნოებად და აღმატებად თქუენდასასოებითა და ძალითა სულისა წმიდისაჲთა.

¹⁴მრწამს მეცა, ძმანო, თქუენთჳს, ვითარმედ თქუენცა სავსე ხართ სახიერებითა და სრულ ყოვლითა მეცნიერებითა, შემძლებელ ხართურთიერთასცა სწავლად.

¹⁵უკადნიერესად-რე მივწერე თქუენდა, ძმანო, ზოგსრეცა თუ მოგაჴსენებ თქუენ მადლითა მით ღმრთისაჲთა, რომელ მოცემულ არს ჩემდაღმრთისა მიერ,

¹⁶რაჲთა ვიყო მე მსახურ ქრისტე იესუჲსა წარმართთა მიმართ, მღდელობის მოღუაწე სახარებასა მას ღმრთისასა, რაჲთა იყოსმსხუერპლი იგი წარმართთაჲ შეწირულ და წმიდა სულითა წმიდითა.

¹⁷მაქუს მე სიქადული ქრისტე იესუჲს მიერ ღმრთისა მიმართ.

¹⁸რამეთუ არა ვიკადრო რაჲსმე სიტყუად, რომელი არა ქმნა ქრისტემან ჩემ მიერ დასამორჩილებელად წარმართთა სიტყჳთა და საქმითა.

¹⁹და ძალითა სასწაულებისა და ნიშებისაჲთა და ძალითა სულისა წმიდისაჲთა, რამეთუ მე იერუსალჱმითგან და გარემო ვიდრე ილჳრიკემდემოვივლინე აღსრულებად სახარებასა მას ქრისტჱსსა.

²⁰ესრჱთ პატივ-ცემულად სახარებად, არა თუ სადა სახელ-დებულ არს ქრისტე, რაჲთა არა სხუასა საფუძველსა ზედა ვაშჱნებდე,

²¹არამედ ვითარცა წერილ არს: რომელთა არა თხრობილ არს მისთჳს, იხილონ, და რომელთა არა უხილავს, გულისხმა-ყონ.

²²ამისთჳსცა წარვემატებოდე ფრიად მოსლვად თქუენდა.

²³ხოლო აწ არღარა ადგილ მაქუს მე ამიერ კერძოთა ამათ ადგილთა, ხოლო მსურის მე მოსლვად თქუენდა მრავლით წლითგან.

²⁴ოდეს წარვიდოდი სპანიად, ვესავ, მი-რაჲ-ვიდოდი მუნ, ხილვასაცა თქუენსა, და თქუენ მიერ წარვიგზავნო მუნ, უკუეთუ თქუენითახილვითა განვძღე ზოგს-რაჲმე პირველად.

²⁵აწ ესერა მივალ იერუსალჱმდ მსახურებად წმიდათა.

²⁶რამეთუ ჯერ-იჩინა მაკედონიამან და აქაიამან ზიარება რაჲსმე ყოფად გლახაკთა მათთჳს წმიდათა, რომელნი არიან იერუსალჱმს.

²⁷ჯერ-იჩინეს და თანა-მდებცა არიან მათა. უკუეთუ სულიერთა მათ თანა-ეზიარნეს წარმართნი, თანა-აც ჴორციელითაცა მსახურებად მათა.

²⁸ესე აღვასრულო და დავჰბეჭდო ნაყოფსა მათსა და წარვიდე თქუენ მიერ სპანიად,

²⁹ესე უწყი, რამეთუ მო-რაჲ-ვიდოდი თქუენდა, სავსებითა მით კურთხევითა ქრისტჱსითა მოვიდე.

³⁰გლოცავ თქუენ, ძმანო, უფლისა ჩუენისა მიერ იესუ ქრისტჱსა და სიყუარულითა მით სულისაჲთა, თანა-მოღუაწე მექმნენით მე ლოცვასაჩემთჳს ღმრთისა მიმართ.

³¹რაჲთა განვერე მე ურჩთა მათგან ჰურიასტანს და რაჲთა მსახურებაჲ იგი ჩემი იერუსალჱმს შეწირულ იყოს წმიდათა მიმართ,

³²რაჲთა მხიარულებითა მით სახარებისაჲთა მოვიდე თქუენდა ნებითა ღმრთისაჲთა და თქუენ თანა განვისუენო.

³³ხოლო ღმერთი მშჳდობისაჲ იყავნ თქუენ ყოველთა თანა. ამენ.