Read ადიშის ოთხთავი 897 წ. – ძველი მონუსკრიპტები რომაელთა მიმართ 16 Bible Online

რომაელთა მიმართ 16 - ადიშის ოთხთავი 897 წ. – ძველი მონუსკრიპტები bible

რომაელთა მიმართ 16

¹შეგვედრებ თქუენ ფჳბეს, დასა ჩუენსა, რომელი-იგი არს მსახური ეკლესიაჲსა მის კენქრელთაჲსაჲ,

²რაჲთა იგი შეიწყნაროთ უფლისა მიერ ღირსად წმიდათა და თანა-დაუდეგით მას, საქმჱ თუ რაჲმე უქმდეს; რამეთუ იგიცა მრავალთა თანა-დამდგომ ექმნა და თჳთ მეცა.

³კითხვაჲ არქუთ პრისკილას და აკჳლას, თანა-შემწეთა ჩემთა ქრისტე იესუჲს მიერ,

⁴რომელთა-იგი სულისა ჩემისათჳს ქედნი მათნი წარუპყრნეს, რომელთა არა ხოლო მე მადლიერ ვარ, არამედ ყოველნი ეკლესიანიწარმართთანი,

⁵და სახლად-სახლად კრებულსა მათსა. კითხვაჲ არქუთ ეპენეტეს, საყუარელსა ჩემსა, რომელ-იგი არს პირველი ნაყოფი ასიაჲსაჲ ქრისტჱსმიმართ.

⁶კითხვაჲ არქუთ მარიას, რომელ-იგი ფრიად დაშურა თქუენდა მიმართ.

⁷კითხვაჲ არქუთ ანდრონიკეს და იუნიას, ნათესავთა ჩემთა და თანა-ტყუეთა ჩემთა, რომელნი არიან შესწავებულ მოციქულთა შორის,რომელნი ჩემსა წინაცა იყვნეს ქრისტჱს მიმართ.

⁸კითხვაჲ არქუთ ამპლიას, საყუარელსა ჩემსა, ქრისტჱს მიერ.

⁹კითხვაჲ არქუთ ურბანოსს, თანა-შემწესა ჩემსა ქრისტჱს მიერ, და სტაქჳს, საყუარელსა ჩემსა.

¹⁰კითხვაჲ არქუთ აპილესს, რჩეულსა ქრისტჱს მიერ. კითხვაჲ არქუთ არისტობილჱსგანთა მათ.

¹¹კითხვაჲ არქუთ ეროდიანას, ნათესავსა ჩემსა. კითხვაჲ არქუთ ნარკისოჲსგანთა მათ უფლისა მიერ.

¹²კითხვაჲ არქუთ ტრჳფენას და ტრჳფოსას, რომელნი მაშურალ არიან უფლისა მიმართ კითხვაჲ არქუთ პერსიდას, საყუარელსა, რომელიფრიად დაშურა უფლისა მიმართ.

¹³კითხვაჲ არქუთ რუფოსს, რჩეულსა უფლისა მიერ, და დედასა მისსა და ჩემსა.

¹⁴კითხვაჲ არქუთ ასჳნკრიტეს, ფლიგონს, ერმის, პატრობას, ერმას და მათ თანათა მათ ძმათა.

¹⁵კითხვაჲ არქუთ ფილოლოგეს და ივლიას, ნერეას და დასა მისსა, და ულუმპეას და მათ თანათა მათ ყოველთა წმიდათა.

¹⁶მოიკითხევდით ურთიერთას ამბორითა წმიდითა. გიკითხვენ თქუენ ეკლესიანი ქრისტჱსნი.

¹⁷გლოცავ თქუენ, ძმანო, ეკრძალებოდეთ მათგან, რომელნი-იგი წვალებასა და საცთურსა იქმან გარეშე მის მოძღურებისა, რომელი თქუენგისწავიეს, და განეშოვრენით მათგან.

¹⁸რამეთუ ეგევითართა მათ უფალსა ჩუენსა იესუ ქრისტესა არა ჰმონიან, არამედ თჳსსა მუცელსა და ტკბილად მეტყუელებითა მით დაკურთხევითა აცთუნნიან გულნი უმანკოთანი.

¹⁹ხოლო თქუენი ეგე მორჩილებაჲ ყოველთა მიმართ განთქუმულ იყავნ; მიხარის თქუენთჳს და მნებავს უკუე თქუენი, რაჲთა ბრძენ იყვნეთკეთილისათჳს და უმანკო -- ბოროტისათჳს.

²⁰ხოლო ღმერთმან მშჳდობისამან შემუსროს ეშმაკი ქუეშე ფერჴთა თქუენთა ადრე. მადლი უფლისა ჩუენისა იესუ ქრისტჱსი თქუენ ყოველთათანა.

²¹გიკითხავს თქუენ ტიმოთე, შემწე ჩემი, და ლუკიოს და იასონ და სოსიპატროს, თანა-შემწენი ჩემნი.

²²გიკითხავ თქუენ მე, ტერტჳროს, რომელმან დავწერე წიგნი ესე უფლისა მიერ.

²³გიკითხავს თქუენ გაიოს, მესტუმრჱ ჩემი და ყოველთა ეკლესიათაჲ. გიკითხავს თქუენ ერასტოს, მნჱ ქალაქისაჲ, და კუარტოს, ძმაჲ ჩუენი.

²⁴მადლი უფლისა ჩუენისა იესუ ქრისტჱსი სულისა თქუენისა თანა. ამენ.

²⁵ხოლო რომელ იგი შემძლებელ არს თქუენდა დამტკიცებად სახარებისაებრ ჩემისა და ქადაგებისა ქრისტე იესუჲსისა გამოცხადებითა მითსაიდუმლოჲსაჲთა, ჟამთა მათ საუკუნეთა დადუმებულთა,

²⁶რომელი გამოჩნდა აწ წიგნთაგან საწინაჲსწარმეტყუელოთა, ბრძანებითა მით საუკუნოჲსა ღმრთისაჲთა, დასამორჩილებელადსარწმუნოებისა, ყოველთა მიმართ წარმართთა უწყებული,

²⁷მხოლოსა ბრძენსა ღმერთსა, ქრისტე იესუჲს მიერ, რომლისაჲ არს დიდებაჲ უკუნითი უკუნისადმდე. ამენ.