Read ადიშის ოთხთავი 897 წ. – ძველი მონუსკრიპტები რომაელთა მიმართ 6 Bible Online

რომაელთა მიმართ 6 - ადიშის ოთხთავი 897 წ. – ძველი მონუსკრიპტები bible

რომაელთა მიმართ 6

¹აწ რაჲ-მე ვთქუათ? და-მე-ვადგრეთა ცოდვასა მას ზედა, რაჲთა მადლი განმრავლდეს? ნუ იყოფინ!

²რომელნი-ესე მოვკუედით ცოდვითა, ვითარ უკუე მერმე ვცხოვნდებოდით მას შინა?

³ანუ არა უწყითა, რამეთუ რომელთა-ესე ნათელ-ვიღეთ ქრისტჱს მიმართ, სიკუდილისა მისისა მიმართ ნათელ-ვიღეთ?

⁴და თანა-დავეფლენით მას ნათლის-ღებითა მით სიკუდილსა მისსა, რაჲთა ვითარცა აღდგა ქრისტე მკუდრეთით დიდებითა მამისაჲთა,ეგრეცა ჩუენ განახლებითა ცხოვრებისაჲთა ვიდოდით.

⁵უკუეთუ თანა-ნერგ ვიქმნნეთ მსგავსებასა სიკუდილისა მისისასა, ეგრეცა აღდგომასა მას მისსა ვიყვნეთ.

⁶და ესე უწყოდეთ, რამეთუ ძუელი იგი კაცი ჩუენი მის თანა ჯუარს-ეცუა, რაჲთა განქარდეს ჴორცი იგი ცოდვისაჲ და რაჲთა არღარავჰმონებდეთ ჩუენ ცოდვასა,

⁷რამეთუ რომელი მომკუდარ არს, განმართლებულ არს ცოდვისაგან.

⁸უკუეთუ მოვკუედით ქრისტჱს თანა, გურწამს, რამეთუ მის თანაცა ვცხოვნდეთ.

⁹ესე უწყით, რამეთუ ქრისტე აღდგა მკუდრეთით, არღარა მოკუდეს, და სიკუდილი მის ზედა არღარა უფლებდეს.

¹⁰რამეთუ რომელი-იგი მოკუდა, ცოდვითა მოკუდა ერთ-გზის, ხოლო რომელი ცხოველ არს, ცხოველ არს ღმრთისა.

¹¹ეგრეცა თქუენ შეჰრაცხენით თავნი თქუენნი მკუდრად ცოდვისათჳს და ცხოველად ღმრთისა ქრისტე იესუჲს მიერ.

¹²ნუ უკუე სუფევნ ცოდვაჲ მოკუდავთა მაგათ ჴორცთა თქუენთა ზედა მორჩილებად მისა გულისთქუმათა მისთა,

¹³ნუცა წარუდგინებთ ასოთა მაგათ თქუენთა საჭურველად სიცრუისა ცოდვასა, არამედ წარუდგინენით თავნი თქუენნი ღმერთსა, ვითარცამკუდრეთით ცხოველთა, და ასონი ეგე თქუენნი საჭურველად სიმართლისა ღმრთისა.

¹⁴ცოდვაჲ თქუენ ზედა არა უფლებდეს, რამეთუ არა ხართ შჯულსა ქუეშე, არამედ მადლსა.

¹⁵აწ უკუე ვცოდვიდეთ-მეა, რამეთუ არა ვართ შჯულსა ქუეშე, არამედ მადლსა? ნუ იყოფინ!

¹⁶არა უწყითა, რამეთუ რომელსა-იგი წარუდგინენით თავნი თჳსნი მონად მორჩილებისა, მონანი ხართ, რომელსაცა-იგი ერჩით; გინა თუცოდვასა სიკუდილდ, ანუ თუ მორჩილებად სიმართლესა?

¹⁷მადლი ღმერთსა, რამეთუ იყვენით მონა ცოდვისა და მორჩილ იქმნენით გულითა, რომელსაცა მიეცენით სახედ მოძღურებისა.

¹⁸ხოლო აწ განთავისუფლებულ ხართ ცოდვისაგან და მონა ყოფილ ხართ სიმართლისა.

¹⁹კაცობრივ ვიტყჳ უძლურებისათჳს ჴორცთა თქუენთაჲსა: ვითარცა-იგი წარუდგინენით ასონი თქუენნი მონებად არა-წმიდებასადა უშჯულოებასა უშჯულოებად, ეგრეცა აწ წარუდგინენით ასონი ეგე თქუენნი მონებად სიმართლესა სიწმიდედ.

²⁰ოდეს-იგი მონანი იყვენით ცოდვისანი, თავისუფალ იყვენით სიმართლისაგან.

²¹რაჲ უკუე ნაყოფი გაქუნდა მაშინ, რომლისათჳს აწ ეგერა გრცხუენის? რამეთუ აღსასრული მათი სიკუდილ არს.

²²ხოლო აწ განთავისუფლებულ ხართ ცოდვისაგან და დამონებულ ხართ ღმერთსა, გაქუს თქუენ ნაყოფი თქუენი სიმართლედ დააღსასრულსა -- ცხორებაჲ საუკუნჱ.

²³რამეთუ საგზალი ცოდვისაჲ სიკუდილი არს, ხოლო ნიჭი ღმრთისაჲ ცხოვრება საუკუნე არს ქრისტე იესუჲს მიერ უფლისა ჩუენისა.