Read ადიშის ოთხთავი 897 წ. – ძველი მონუსკრიპტები 1 კორინთელთა მიმართ 4 Bible Online

1 კორინთელთა მიმართ 4 - ადიშის ოთხთავი 897 წ. – ძველი მონუსკრიპტები bible

1 კორინთელთა მიმართ 4

¹ესრჱთ შემრაცხენინ ჩუენ კაცმან, ვითარცა მსახურნი ქრისტჱსნი და მნენი საიდუმლოთა ღმრთისათანი.

²ხოლო აქა ამიერითგან საძიებელ არს მნეთა მათ შორის, რაჲთა საწმუნო ვინმე იპოვოს.

³ხოლო ჩემდა საწუნელება არს, უკუეთუ თქუენ მიერ განვიკითხო გინა თუ კაცობრივისაგან დღისა; არამედ არცაღა თავსა ჩემსა განვიკითხავ.

⁴რამეთუ არარაჲ თავსა ჩემსა შემიცნობიეს, არათუ ამით რას განვმართლდები; ხოლო განმკითხველი ჩემი უფალი არს.

⁵ამისთჳს ნუვინ წინაჲსწარ ჟამისა გან-რასმე-იკითხვიდეთ, ვიდრემდე მოვიდეს უფალი და განანათლოს დაფარული იგი ბნელისაჲდა გამოაცხადნეს ზრახვანი გულისანი, მაშინ ქებაჲ იყოს კაცად-კაცადისაჲ ღმრთისა მიერ.

⁶ხოლო ესე, ძმანო, სახედ დავდევ თავისა ჩემისათჳს და აპოლოჲსთჳს თქუენდა მიმართ, რაჲთა ჩუენ მიერ ისწავოთ, ნუ უფროჲს წერილისამის ჰზრახავთ; რაჲთა არა ერთი-ერთსა ზედა განჰლაღნეთ მოყუასი მოყუსისათჳს.

⁷ვინ განგიკითხავს შენ? ანუ რაჲ გაქუს, რომელ არა მიგიღებიეს? უკუეთუ მიგიღებიეს, რაჲსა იქადი, ვითარცა არა-მიღებულსა?

⁸აწვე სამე განმაძღარ ხართ და აწვე განჰმდიდრდით და თჳნიერ ჩუენსა ჰსუფევდით. და თუმცა ჰსუფევდით, რაჲთა ჩუენცა თქუენ თანავსუფევდეთ!

⁹ეგრეთ ვჰგონებ, ვითარმედ ღმერთმან ჩუენ მოციქულნი უკუანაჲსკნელად გამოგუაჩინნა ვითარცა სასიკუდინენი, რამეთუ თითისსაჩუენებელ ვიქმნენით სოფლისა, ანგელოზთა და კაცთა.

¹⁰ჩუენ სულელ ქრისტჱსთჳს, ხოლო თქუენ ბრძენ ქრისტჱს მიერ; ჩუენ უძლურ და თქუენ ძლიერ; თქუენ დიდებულ და ჩუენ გინებულ.

¹¹ვიდრე აქა ჟამადმდე გუშიისცა და გუწყურისცა, შიშუელ ვართ და ვიქენჯნებით, და განუსუენებელ ვართ და ვშურებით,

¹²რამეთუ ვიქმთ ჴელითა ჩუენითა. მაგინებელთა ჩუენთა ვაკურთხევთ; ვიდევნებით და თავს-ვიდებთ;

¹³და მგმობართა ჩუენთა ულოცავთ, ვითარცა ნარჩევნი სოფლისანი შევიქმნენით, ყოველთა ნასხურ მოაქამდე.

¹⁴არა თუ საკდემელად თქუენდა მივსწერ, არამედ ვითარცა შვილთა საყუარელთა გასწავებ თქუენ.

¹⁵დაღათუ ბევრ მზარდულ გესხნეს თქუენ ქრისტჱს მიმართ, არამედ არა მრავალ მამა, რამეთუ ქრისტე იესუჲს მიერ სახარებისა მისგან მეგშვენ თქუენ.

¹⁶გლოცავ თქუენ, მობაძავ ჩემდა იყვენით.

¹⁷ამისთჳს მივავლინე თქუენდა ტიმოთე, რომელ არს შვილი ჩემი საყუარელი და სარწმუნოჲ უფლისა მიერ, რომელმან მოგაჴსენნეს თქუენგზანი ჩემნი ქრისტე იესუჲს მიმართ, ვითარცა-იგი ყოველსა ადგილსა ყოველთა ეკლესიათა უწამებ.

¹⁸რეცა თუ არა მოსლვასა მას ჩემსა თქუენდა გან-ვინმე-ლაღნეს.

¹⁹არამედ მივიდე ადრე თქუენდა, უფალსა თუ უნდეს, და ვცნა არა თუ სიტყუაჲ იგი განლაღებულთაჲ მათ, არამედ ძალი,

²⁰რამეთუ არა სიტყჳთა არს სასუფეველი ღმრთისაჲ, არამედ ძალითა.

²¹აწ რაჲ გნებავს? კუერთხითა მოვიდე თქუენდა, ანუ სიყუარულითა სულითა მით მშჳდობისაჲთა?